Biblu ɖɔ: “Mɛ e ɖò gbɛ̀ lɛ ma tuùn ɖɔ emi na kú vɔ́vɔ́ à? Loɔ, mɛ e ko kú lɛ sɔ́ tuùn nǔɖe ǎ.” (Nǔnywɛtɔ́xó 9:5; Ðɛhan 146:4) Enɛ wu ɔ, enyi mǐ kú ɔ, mǐ sɔ́ nɔ tíìn ǎ. Mɛkúkú lɛ sɔ́ sixu lin tamɛ, wà nǔ, alǒ ɖè lee nǔ cí nú ye é xlɛ́ ǎ.

‘A na lɛ́ huzu kɔ́’

 Mawu tinmɛ nǔ e nɔ jɛ ɖò kú mǐtɔn gudo é hwenu e é ɖɔ xó nú sunnu nukɔntɔn ɔ Adamu é. Ðó Adamu tlitó wutu ɔ, Mawu ɖɔ n’i ɖɔ: “Kɔ́ wɛ a nyí, bo ka na lɛ́ huzu kɔ́.” (Bǐbɛ̌mɛ 3:19) Cobonu Mawu na “kán kɔ́ dó mɛ” Adamu ɔ, Adamu ko tíìn ǎ. (Bǐbɛ̌mɛ 2:7) Mɔ̌ ɖokpo ɔ, hwenu e Adamu kú é ɔ, é lɛkɔ yì kɔ́gudu mɛ bo sɔ́ tíìn ǎ.

 Nǔ ɖokpo ɔ wɛ nɔ jɛ dó mɛ e nɔ kú dìn lɛ é wu. Biblu ɖɔ xó dó gbɛtɔ́ lɛ kpo kanlin lɛ kpo wu, bo ɖɔ: “Nǔ e ɖò gbɛ̀ é bǐ wɛ è zé kɔ́ dó bló; bǐ wɛ na lɛ́ huzu kɔ́.”—Nǔnywɛtɔ́xó 3:19, 20.

Kú wɛ nyí vivɔnu nǔ lɛ bǐ tɔn dandan ǎ

 Biblu nɔ sɔ́ kú jlɛ́ dó amlɔ wu hwɛhwɛ. (Ðɛhan 13:4; Jaan 11:11-14; Mɛsɛ́dó 7:60) Mɛ e ɖò sɛnmlɔ dɔ́ wɛ é ɖé nɔ tuùn nǔ e ɖò jijɛ wɛ ɖò akpá tɔn lɛ é ǎ. Mɔ̌ ɖokpo ɔ, mɛkúkú lɛ nɔ tuùn nǔtí ǎ. Amɔ̌, Biblu kplɔ́n mɛ ɖɔ Mawu sixu fɔ́n mɛkúkú lɛ cí nǔ ɖɔ amlɔ dɔ́ wɛ ye ɖɔhun, bo na lɛ́ na ye gbɛ̀. (Jɔbu 14:13-15) Kú nyí vivɔnu nǔ lɛ bǐ tɔn nú mɛ e Mawu na fɔ́n sín kú lɛ é ǎ.