È jì mì ɖò Ouganda ɖò tokpɔn Gomba tɔn mɛ. Mɛ e ɖò finɛ lɛ é gegě nyí wamamɔnɔ klókló. Kuláan ɖò toxo mǐtɔn mɛ ǎ, enɛ wu ɔ, myɔtágbɛ́n wɛ mǐ nɔ zán ɖò zǎnmɛ.

 Mɛjitɔ́ ce e nyí glesi lɛ é sɛ̀ tɛn sín Rwanda yì Ouganda. Ye nɔ lɛ̀ kafée kpo kwékwé kpo sín gle, bo nɔ sɔ́ kwékwé ɔ dó bló ahan syɛnsyɛn e è tuùn tawun bɔ è nɔ ylɔ́ ɖɔ waragi é na. Mɛjitɔ́ ce lɛ nɔ lɛ́ nyi kokló lɛ, gbɔ̌ lɛ, lɛngbɔ̌ lɛ kpo nyibu lɛ kpo. Fí e un sù ɖè é kpo kplɔ́n e un yí é kpo zɔ́n bɔ un kúdeji ɖɔ asì ɖé ɖó na setónú nú asú tɔn hwebǐnu, bo ka ɖó na nɔ ɖɔ linlin tɔn gbeɖé ǎ.

 Ee un ɖó xwè 23 é ɔ, un sɛ̀ tɛn yì Rwanda, finɛ ɔ, nyi kpo gbɛ̌ ce ɖevo lɛ kpo nɔ yì zǎnweɖútɛn lɛ. Un nɔ yì zǎnweɖútɛn lɛ ɖokpo hwɛhwɛ, kaka bɔ è na mì káti e na mì gbè ɖɔ má nɔ wá ma sú ɖɔ̌la ɖokpo é ɖé. Un nɔ kpɔ́n fímu ɖěɖee mɛ è nɔ ɖò hun xò ɖè wɛ, bɔ dakaxixo gbɛɖe gbɛɖe nɔ lɛ́ ɖò dindín wɛ ɖè lɛ é. Mɛ e lɛlɛ̌ dó mì lɛ é kpo nǔ e un nɔ zán dó ɖè ayi ɖ’ayǐ na lɛ é kpo zɔ́n bɔ un huzu ahannumunɔ e kpò nú dakaxixo kpo nǔbliblíwiwa kpo é ɖé.

 Ðò 2000 ɔ, un jɛ kpɔ́ xá ɖyɔvǐ e nɔ nyí Skolastique Kabagwira é, bɔ mǐ jì vǐ atɔn. Lee un kplɔ́n gbɔn ɖò winnyawinnya mɛ é ɔ, un nɔ ɖó nukún ɖɔ cobonu asì ce na dó gbè mì, alǒ byɔ nǔɖe mì ɔ, é ɖó na tó jɛkpo hwɛ̌. Un nɔ lɛ́ lin ɖɔ nyi wɛ ɖó acɛ dó nǔ e mǐ ɖó lɛ é bǐ jí, bo na nɔ zán lee é jló mì gbɔn é. Hwɛhwɛ wɛ un nɔ tɔ́n zǎnmɛ, bo nɔ lɛkɔ wá gan atɔn mɛ ayitéhɔnnu mɔ̌, lobo nɔ ɖò vɛ́jɛ́vɛ́jɛ́. Nú un xúxú hɔn ɔ bonu Skolastique ma yawǔ hun ǎ ɔ, un nɔ zɔn jǐ tɔn, bo nɔ xò.

 Hwenɛnu ɔ, un nɔ w’azɔ̌ nǔjikpɔntɔ́ ɖɔhun nú azɔ̌xwé mɛɖesunɔ tɔn e nɔ ɖɔ nǔ dó ayijayǐ wu é ɖé, bɔ sunzánfókwɛ e un nɔ yí é nɔ jɛmɛ nú mì. Nú un wá xwégbe ɔ, Skolastique nɔ ɖɔ nǔ bǐ bonu má byɔ amǐsa tɔn e nɔ nyí Pentecôte é mɛ, ɖó é nɔ lin ɖɔ enɛ na ɖyɔ mì. Amɔ̌, é jló mì nú ma yì amǐsa tɔn ǎ. É nyɔ́ wà ɔ, un jɛ wǎn yí nú nyɔnu tlɛnnɔ ɖevo jí. Nǔ e mɛ dakaxixo ce kpo nǔbliblíwiwa ce kpo tɔ́n kɔ dó é wɛ nyí ɖɔ Skolastique kplá vǐ mǐtɔn atɔn lɛ bo yì jɛ mɛjitɔ́ tɔn lɛ kpá.

 Xɔ́ntɔn mǐtɔn xóxó ɖé ɖɔ xó nú mì dó gbɛ̀ e zán wɛ un ɖè é wu. É dó wusyɛn lanmɛ nú mì ɖɔ nyi ni yì kplá Skolastique. É ɖɔ nú mì ɖɔ é kún jɛxa bonu vǐ ce ɖagbeɖagbe enɛ lɛ ni nɔ zɔ nú tɔ́ yetɔn ó. Enɛ wu ɔ, ɖò 2005 ɔ, un ɖó ahan nunu te, bo jó nyɔnu ɖě ɔ dó, lobo lɛ́ yì kplá Skolastique. Ðò 2006 ɔ, mǐ wlí alɔ. É ɖò mɔ̌ có, un kpò ɖò daka xò asì ce wu wɛ, bo nɔ lɛ́ nylahun d’è.

 Ðò 2008 ɔ, Joël e nyí Kúnnuɖetɔ́ Jehovah tɔn ɖé é wá ba mǐ kpɔ́n, bɔ un ɖótó wɛn e é hɛn wá é. Nú sun gegě ɔ, é kpo Kúnnuɖetɔ́ ɖevo e nɔ nyí Bonaventure é kpo nɔ wá ba mì kpɔ́n hwɛhwɛ, bɔ mǐ nɔ ɖɔ xó ɖó kpɔ́ dó Biblu jí dó nǔjɔnǔ mɛ. Un nɔ kan nǔ gegě byɔ, taji ɔ, dó wema Nǔɖexlɛ́mɛ tɔn wu. Un nɔ tɛ́n kpɔ́n tawun bo na xlɛ́ ɖɔ Kúnnuɖetɔ́ lɛ nyí adingbannɔ. Ði kpɔ́ndéwú ɔ, un kanbyɔ ɖɔ aniwu ye nɔ ɖɔ ɖɔ “mɛ wɔbuwɔbu” e xó Nǔɖexlɛ́mɛ 7:9 ɖɔ é na nɔ ayikúngban jí, bɔ wemafɔ ɔ ka ɖɔ ɖɔ ye “ɖò te ɖò axɔ́suzinkpo [Mawu tɔn] ɔ kpo Lɛngbɔ̌ví ɔ [Jezu Klisu] kpan nukɔn” à jí. Joël nɔ ɖó suúlu bo nɔ na xósin nú nǔkanbyɔ ce lɛ. Ði kpɔ́ndéwú ɔ, é xlɛ́ mì Ezayíi 66:1, ɖò finɛ ɔ, Mawu ylɔ́ ayikúngban ɔ ɖɔ “afɔɖótɛn” emitɔn. Enɛ wu ɔ, mɛ wɔbuwɔbu ɔ ɖò ayikúngban jí cobo ka ɖò te ɖò axɔ́suzinkpo Mawu tɔn nukɔn. Enɛ gudo ɔ, un xà Ðɛhan 37:29 ee ɖɔ ɖɔ hwɛjijɔnɔ lɛ na nɔ ayikúngban jí kaka sɔyi é.

 Nukɔnmɛ ɔ, un yí gbè nú Biblu kplɔnkplɔn ɖé. Enɛ wu ɔ, Bonaventure kplɔ́n Biblu xá nyi kpo Skolastique kpo. Ee mǐ ɖò Biblu kplɔ́n wɛ é ɔ, un jɛ huzuhuzu lɛ bló jí ɖò gbɛzán ce mɛ. Un kplɔ́n bo na nɔ wà nǔ xá asì ce kpo sísí kpo. Un sɔ́ nɔ ɖó nukún ɖě ɖɔ asì ce ni nɔ jɛkpo cobo dó gbè nú mì, alǒ, cobo byɔ nǔ mì ǎ, un sɔ́ nɔ lɛ́ ɖɔ ɖɔ nyi wɛ ɖó acɛ dó nǔ e mǐ ɖó lɛ é bǐ jí ɖě ǎ. Un lɛ́ ɖó fímu e mɛ dakaxixo ɖè lɛ é kpinkpɔn te. Huzuhuzu enɛ lɛ biblo vɛwǔ bo lɛ́ byɔ mɛɖéejiɖuɖe kpo mɛɖéesɔ́hwe kpo tawun.

 Xwè ɖé lɛ jɛ nukɔn ɔ, un kplá Christian e nyí vǐ sunnu ce mɛxo ɔ é yì ɖó hɛ̌nnumɔ ce lɛ gɔn ɖò Ouganda. Amɔ̌, ee un xà Sɛ́nflínmɛ 6:4-7 gudo é ɔ, un wá mɔ nǔ jɛ mɛ ɖɔ azɔ̌ nukúnkpíkpé dó vǐ mǐtɔn lɛ wu tɔn ɔ nyi kpo asì ce kpo wɛ Mawu zɔ́n; enɛ lɛ́ byɔ ɖɔ mǐ na nɔ kplɔ́n nǔgbododó Mawu tɔn lɛ ye. Gbè e gbè mǐ kplá vǐ sunnu mǐtɔn wá xwégbe é ɔ, mǐ kpo é kpo bǐ wɛ é víví na!

 Un kplɔ́n ɖɔ Jehovah nyí Mawu nǔblawukúnúmɛtɔ́ ɖé, bɔ un lɛ́ ɖi nǔ ɖɔ é sɔ́ nǔwalɔ ce kpo gbɛ̀ blíblí e un zán wá yì é kpo kɛ mì. É víví nú mì ɖɔ Skolastique gɔ́ nú mì bɔ mǐ kplɔ́n Biblu. Mǐ sɔ́ gbɛzán mǐtɔn jó nú Jehovah bo bló baptɛm ɖó kpɔ́ ɖò 4 décembre 2010. Dìn ɔ, mǐ ɖeji dó mǐɖée wu bo nɔ ɖu vivǐ nǔgbododó Biblu tɔn lɛ xwixwedó ɖò xwédo mǐtɔn mɛ tɔn. É nɔ víví nú asì ce tawun ɖɔ nú un gosin azɔ̌mɛ dìn ɔ, un nɔ wá xwégbe tlɔlɔ. É lɛ́ sù nukún tɔn mɛ ɖɔ un nɔ wà nǔ xá ɛ kpo yɛ̌yi kpo kpodo sísí kpo, bo lɛ́ wá gbeta ɔ kɔn nyiɖesunɔ bo sɔ́ na nɔ nu ahan syɛnsyɛn ɖě ǎ, lobo ka sɔ́ lɛ́ nyí dakaxotɔ́ ǎ. Ðò 2015 ɔ, è sɔ́ mì mɛxo agun tɔn bonu má wà lɛngbɔ̌nyitɔ́zɔ́ ɖò agun mǐtɔn mɛ. Vǐ atɔ́ɔ́n wɛ mǐ ɖó, bɔ atɔn ko bló baptɛm.

 Hwenu e Kúnnuɖetɔ́ Jehovah tɔn lɛ jɛ Biblu kplɔ́n xá mì jí é ɔ, un nɔ yí gbè nú nǔ e kplɔ́n mì wɛ ye ɖè lɛ é mɔ̌ kpowun ma kan nǔ byɔ ǎ. Amɔ̌, nǔ e jiwǔ nú mì é wɛ nyí ɖɔ ye zán Biblu dó na xósin nú nǔkanbyɔ ce lɛ. É nɔ sù nyi kpo Skolastique kpo nukúnmɛ tɛgbɛ ɖɔ mɛ ɖěɖee nɔ ɖɔ ɖɔ ye ɖò Mawu nǔgbo ɔ sɛn wɛ lɛ é ɖó na zán gbɛ̀ sɔgbe xá nǔgbododó tɔn lɛ bǐ, bo na nɔ xwedó ee jló ye lɛ é kɛɖɛ ǎ. Nǔ e sù nukún ce mɛ hugǎn é wɛ nyí ɖɔ Jehovah hun ali nú mì, bɔ un ɖó kancica syɛnsyɛn ɖé xá é kpo mɛ ɖevo e nɔ sɛn ɛ kpo gbejininɔ kpo lɛ é kpo. Un dó nukún lee nǔ lɛ yì gbɔn ɖò gbɛzán ce mɛ é mɛ kpɔ́n é ɔ, é na jiɖe mì ɖɔ kpo alɔdó Mawu tɔn kpo ɔ, mɛ e ɖó ayi ɖagbe é ɖebǔ sixu bló huzuhuzu e é byɔ é bo na dó nyɔ́ nukún tɔn mɛ.