Watch Tower Bible and Tract Society of Pennsylvania ɔ, tutoblonunu e ma nyí ajɔ̌wiwa tɔn ǎ é ɖé wɛ, bɔ è ɖó ayǐ ɖò 1884 sɔgbe xá Tokpɔn Pennsylvanie tɔn e ɖò États-Unis é sín sɛ́n lɛ. Kúnnuɖetɔ́ Jehovah tɔn lɛ wɛ nɔ zán dó nɔ gudo nú azɔ̌ e ye nɔ wà gbɔn gbɛ̀ ɔ bǐ mɛ, bɔ Biblu kpo wema jinjɔn Biblu jí lɛ kpo ɖiɖetɔ́n ɖ’emɛ é.

 Sɔgbe xá sɛ́n ɖěɖee jí tutoblonunu enɛ jinjɔn lɛ é ɔ, nǔ e gbé é nɔ nya lɛ é wɛ nyí nǔ ɖěɖee kúnkplá “sinsɛn, mɛkplɔnkplɔn, kpo alɔ didó mɛ kpo” lɛ é, taji ɔ, bo na dó “jla wɛnɖagbe Axɔ́suɖuto Mawu tɔn e nu Jezu Klisu ɖè é tɔn, bo lɛ́ kplɔ́n nǔ mɛ d’ewu.” Enyi lee mɛɖé na nǔ sɔ é wɛ nɔ zɔ́n bonu é nɔ byɔ tutoblonunu enɛ mɛ ǎ, é nyɔ́ wà ɔ, ylɔ̌ wɛ è nɔ ylɔ́ mɛ d’emɛ. Mɛ e ɖò tutoblonunu enɛ mɛ lɛ é kpo mɛ e nɔ kpé nukún d’ewu lɛ é kpo nɔ d’alɔ Hagbɛ̌ Alixlɛ́mɛtɔ́ Kúnnuɖetɔ́ Jehovah tɔn lɛ tɔn.

 Gɔ́ nú Watch Tower Bible and Tract Society of Pennsylvania ɔ, Kúnnuɖetɔ́ Jehovah tɔn lɛ nɔ lɛ́ zán tutoblonunu e sɛ́n tuùn é gegě ɖevo lɛ ɖò tò vovo lɛ mɛ. Tutoblonunu enɛ lɛ ɖé lɛ nɔ sɔ́ xógbe “Watch Tower” abǐ “Watchtower,” alǒ lilɛdógbeɖevomɛ xógbe enɛ lɛ ɖokpo tɔn ɖé dó nyikɔ yetɔn mɛ.

 Sín hwenu e è ɖó tutoblonunu vovo enɛ lɛ e sɛ́n tuùn é ayǐ é ɔ, ye ko d’alɔ mǐ bɔ mǐ wà nǔ gegě, ɖi elɔ lɛ:

•   Wema lɛ winwlán kpo wema lɛ ɖiɖetɔ́n kpo. Mǐ ko ɖè Biblu livi 220 mɔ̌ kpo wema jinjɔn Biblu jí liva 40 mɔ̌ kpo tɔ́n. Wema mǐtɔn lɛ ko tíìn ɖò gbè 900 jɛji mɛ. Tɛn Ɛntɛnɛti tɔn jw.org nɔ d’alɔ gbɛtɔ́ lɛ bɔ ye nɔ xà Biblu ɔ vɔ̌nu ɖò Ɛntɛnɛti jí ɖò gbè 160 jɛji mɛ, bo nɔ lɛ́ mɔ xósin nú nǔkanbyɔ Biblu tɔn lɛ, ɖi “Etɛ ka nyí Axɔ́suɖuto Mawu tɔn?”

•   Mɛkplɔnkplɔn. Mǐ nɔ kpé nukún dó wemaxɔmɛ Biblu kplɔnkplɔn tɔn vovo lɛ wu. Ði kpɔ́ndéwú ɔ, sín 1943 ɔ, Kúnnuɖetɔ́ Jehovah tɔn 9 000 mɔ̌ wɛ Wemaxɔmɛ Biblu Kpinkplɔn Watchtower Galadi tɔn ko kplɔ́n azɔ̌ dó nǔjɔnǔ mɛ. Enɛ d’alɔ ye bɔ ye nɔ wà mɛsɛ́dózɔ́ alǒ bló bɔ azɔ̌ e wà gbɔn gbɛ̀ ɔ bǐ mɛ wɛ mǐ ɖè é nɔ lidǒ. Gɔ́ na ɔ, ɖò aklunɔzán gbla ɖokpo ɖokpo mɛ, ɖò kplé e è nɔ bló ɖò agun mǐtɔn lɛ ɖokpo ɖokpo mɛ lɛ é hwenu ɔ, è nɔ kplɔ́n nǔ gbɛtɔ́ livi mɔkpan, kaka jɛ mɛ e ma nyí Kúnnuɖetɔ́ ǎ lɛ é jí. Mǐ nɔ lɛ́ kpé nukún dó klási nyɔ̌wlan-nyɔ̌xa tɔn lɛ wu, bo ko ɖè wema ɖé tɔ́n dó gbè 120 mɛ, b’ɛ nɔ d’alɔ mɛ lɛ bɔ ye nɔ kplɔ́n nǔxixa kpo nǔwlanwlán kpo.

•   Alɔ didó mɛ. Mǐ ko sɔnǔ nú agbaza sín nǔ lɛ dó hɛn sɔ mɛ ɖěɖee awě xò lɛ é; é sixu nyí awěxomɛ e gbɛtɔ́ zɔ́n é, ɖi kún súsú dó nú akɔ e tíìn ɖò 1994 ɖò Rwanda é, alǒ awěxomɛ e sín adla lɛ wu é, ɖi ayikúngban e dánwǔ ɖò 2010 ɖò Haïti é.

 Mǐ nɔ zán Watch Tower Bible and Tract Society of Pennsylvania kpo tutoblonunu ɖevo e sɛ́n tuùn lɛ é kpo dó wà nǔ gegě có, ye ɖě wɛ nɔ nyí tɔn cobɔ mǐ nɔ wà azɔ̌ mǐtɔn ǎ. Klisanwun ɖokpo ɖokpo wɛ ɖó na wà wɛnɖagbejijla kpo nǔ kpinkplɔn mɛ d’ewu kpo sín azɔ̌ e Mawu zɔ́n mɛ é mlɛ́mlɛ́. (Matie 24:14; 28:19, 20) Mǐ ɖi nǔ ɖɔ Mawu ɖò gudo nú azɔ̌ mǐtɔn, bo na lɛ́ kpò ɖò mɛ ɖokpo e nɔ “bló bɔ atín ɔ [nɔ] sù” é nyí wɛ.—1 Kɔlɛntinu lɛ 3:6, 7.