Ðó mǐ nyí Kúnnuɖetɔ́ Jehovah tɔn lɛ wutu ɔ, xóɖiɖɔ dó nǔ e kúnkplá nǔɖiɖi lɛ é jí xá mɛ e ɖò sinsɛn lɛ bǐ mɛ lɛ é nɔ víví nú mǐ, amɔ̌, mǐ nɔ ɖ’alɔ ɖò nǔwaɖókpɔ́ sinsɛn lɛ tɔn mɛ xá mɛ ɖěɖee ɖi nǔ nú nǔ ɖevo lɛ gbɔn vo nú mǐtɔn lɛ é ǎ. Biblu xlɛ́ ɖɔ Klisanwun nǔgbo lɛ “bǐ ɖò bǔ,” bɔ nǔɖiɖi ɖokpo ɔ ɖiɖó ɖò nǔ taji e nɔ dó gesí bǔninɔ enɛ ɔ lɛ é mɛ. (Efɛzinu lɛ 4:16; 1 Kɔlɛntinu lɛ 1:10; Filipunu lɛ 2:2) Enɛ ɔ ka nɔte dó gbeyiyi kpowun ɖɔ jujɔ lěhun lɛ xɔ akwɛ jí ǎ: wanyiyi, wuvɛ̌sexámɛ, kpo hwɛsɔ́kɛmɛ kpo. Nukúnnúmɔjɛnǔmɛ e sɔgbe bo gosin Biblu mɛ é jí wɛ nǔ e mǐ ɖi nǔ na lɛ é junjɔn, enɛ mɛvo ɔ, nǔɖiɖi mǐtɔn na ɖó ta ɖé ǎ.—Hlɔmanu lɛ 10:2, 3.

Biblu jlɛ́ Mawu sinsɛn ɖó kpɔ́ xá mɛ e ɖi nǔ nú nǔ ɖevo lɛ é dó gbɛ̌didó e ma sɔgbe ǎ é ɖé wu, kpɔ́ jijɛ ee na hɛn nǔɖiɖi Klisanwun ɖé tɔn gblé é ɖé wɛ. (2 Kɔlɛntinu lɛ 6:14-17) Enɛ wu ɔ, Jezu lɔn nú ahwanvu tɔn lɛ ɖ’alɔ ɖò nǔwaɖókpɔ́ sinsɛn lɛ tɔn mɛ ǎ. (Matie 12:30; Jaan 14:6) Mɔ̌ ɖokpo ɔ, Sɛ́n e Mawu na gbɔn Mɔyizi jí é gbɛ́ ɖɔ Izlayɛli-ví lɛ ni ma sɛn nǔ ɖevo ɖó kpɔ́ xá mɛ e ɖò xá yetɔn mɛ lɛ é ó. (Tíntɔ́n 34:11-14) Nukɔnmɛ ɔ, Izlayɛli-ví gbejinɔtɔ́ lɛ gbɛ́ alɔdómɛ e na zɔ́n bɔ ye na jɛ akɔ xá mɛ e ɖi nǔ nú nǔ ɖevo lɛ ɖò sinsɛn linu lɛ é.—Ɛsidlasi 4:1-3.

Ɛɛn. Nǔgbo ɔ, ɖò 2022 ɔ, mǐ zán ganxixo 1 501 797 703 dó ɖɔ xó xá mɛ e ɖò sinsɛn ɖevo lɛ mɛ lɛ é. Mɛsɛ́dó Pɔlu ɖɔhun ɔ, mǐ nɔ jló na tuùn “mɛ gegě” sín linlin kpo nǔ e ye ɖi nǔ na lɛ é kpo ɖò sinsɛnzɔ́ mǐtɔn hwenu. (1 Kɔlɛntinu lɛ 9:19-22) Ðò xó ɖɔ ɖó kpɔ́ xá mɛ lɛ hwenu ɔ, mǐ nɔ tɛ́n kpɔ́n bo nɔ zán wěɖexámɛ Biblu tɔn e ɖɔ ɖɔ mǐ ni nɔ na xósin “kpo mɛ sísí kpo” é.—1 Piyɛ́ɛ 3:15, 16a.