Éǒ. Kúnnuɖetɔ́ Jehovah tɔn lɛ́ nɔ gbɛ́ abǎhwɛ gbigbo ǎ. È ná gbo abǎhwɛ alǒ gbɔ ɔ, Klisánwun ɖokpóɖokpó wɛ ɖó ná wá gbeta tɔn kɔn. Kúnnuɖetɔ́ Jehovah tɔn gěgé yí gbe bó gbo abǎhwɛ.

 Mǐ nɔ ba nukúnkpédómɛwú dotóoxwé tɔn e nyɔ́ húgǎn é. Gɔ́ ná ɔ, nukɔnyiyi tobutóbú e tíin ɖo nǔnywɛ́ xwítíxwítí linu bónú azɔn syɛ́nsyɛ́n lɛ́ ná dó ɖe kpo é nɔ su nukún mǐtɔn mɛ tawun. Azɔ̌ syɛ́nsyɛ́n ɖěɖěe mɛ e nɔ kpé nukún dó lanmɛ ná nɔ ganjí wútu lɛ́ é nɔ wa lɛ́ é, ɖo tají ɔ, ɖo jɛmɛjí alǒ adla ɖé sín hwenu lɛ́ é, bǐ wɛ nɔ xɔ akwɛ́ nú mǐ.

 Kúnnuɖetɔ́ Jehovah tɔn lɛ́ nɔ wa nǔ ɖó kpɔ́ xá gǎn e kpa acɛ dó lanmɛ ná nɔ ganjí nu lɛ́ é. Ði kpɔ́ndéwú ɔ, sín hwenu e jɛmɛjí Covid-19 ɔ bɛ́ é ɔ, Kúnnuɖetɔ́ Jehovah tɔn lɛ́ nɔ ɖo nǔflínmɛ lɛ́ ɖe tɔ́n wɛ dó gbe kanweko mɔ̌kpán mɛ, ɖo tɛn Ɛntɛnɛ́ti tɔn élɔ́ jí. Nǔflínmɛ énɛ́ lɛ́ nɔ dó wǔsyɛ́n lanmɛ nú mɛ lɛ́ ɖɔ yě ní se tónú nú alixlɛ́mɛ lanmɛ ná nɔ ganjí tɔn ɖěɖěe gǎntosɔ́ lɛ́ ná lɛ́ é. Alixlɛ́mɛ énɛ́ lɛ́ hǎbǔ kúnkplá mɛ ɖěvo ma sɛkpɔ́ tútútú, mɛkplékpɔ́mɛ sín nǔwiwa lɛ́, glɔ̌nglɔ́n jí ninɔ, alɔ klɔ́klɔ́, nǔ cyɔ́ncyɔ́n awɔntín kpó nu kpó, gɔ́ nú nǔ ɖěvo ɖěɖěe acɛkpikpa lɛ́ byɔ́ alǒ dó wǔsyɛ́n tɔn lanmɛ nú mɛ lɛ́ é.—Hlɔ̌manu lɛ́ 13:1, 2.

 Sín xwe mɔ̌kpán ɖíe é ɔ, Kúnnuɖetɔ́ Jehovah tɔn lɛ́ nɔ tɛɖɛ̌ nǔgbódodó élɔ́ lɛ́ e bɔ d’é wú é jí:

•   Gbeta lɛ́ kɔn wíwá ɖo lanmɛ ná nɔ ganjí kpáxwé ɔ, mɛɖésúnɔ sín xó wɛ.—Galátinu lɛ́ 6:5.

   “[Xójláwéma élɔ́] dó gesí atínkɛ́n alǒ nukúnkpédómɛwú ɖé lě tawun nú mɛ ǎ, é ka lɛ́ ɖe wě xá mɛ dó nukúnkpédómɛwú dotóoxwé tɔn lɛ́ kpáxwé ǎ. É nɔ xwlé nǔ lɛ́ mɛ kpowun wɛ, bó nɔ jó nǔxatɔ́ ɔ dó bónú é ná wá gbeta éɖésúnɔ tɔn lɛ́ kɔn.”—Réveillez-vous!, 8 février 1987.

   “Nú hwi kpó vǐ towe lɛ́ kpó ná gbo abǎhwɛ alǒ gbɔ ɔ, gbeta mɛɖésúnɔ tɔn ɖé wɛ.”—Réveillez-vous!, 8 août 1993.

•   Mǐ nɔ yí gbe nú nukúnkpédómɛwú dotóoxwé tɔn lɛ́, ɖó gbɛ xɔ akwɛ́ tawun nú mǐ.—Mɛsɛ́dó 17:28.

   “Nú Kúnnuɖetɔ́ Jehovah tɔn lɛ́ sín lanmɛ ma ɖo ganjí ǎ ɔ, yě nɔ yi ba alɔdó lanmɛnánɔganjízɔ́watɔ́ lɛ́ tɔn. Yě yí wǎn nú gbɛ, bɔ yě nɔ lɛ́ wa nǔ ɖěbǔ e sɔgbe xá Mawuxówéma ɔ é bó ná dó dɔ́ ji lěe é nyɔ́ bló gbɔn é.”—Atɔxwɛ [Flanségbe] 1^er octobre 1975.

   “Kúnnuɖetɔ́ Jehovah tɔn lɛ́ nɔ yí gbe nú nukúnkpédómɛwú dotóoxwé tɔn lɛ́ kpó jlǒ kpó. Yě nɔ ba bónú lanmɛ yětɔn ná nɔ ganjí, bó nɔ lɛ́ ba ná dɔ́ ji. Nǔgbó ɔ, Kúnnuɖetɔ́ Jehovah tɔn ɖé lɛ́ nyí dotóo, Klisánwun xwe kanweko nukɔntɔn ɔ tɔn Luki ɖɔhun. . . . É ɖo wɛn ɖɔ azɔ̌ syɛ́nsyɛ́n e mɛ e nɔ kpé nukún dó mɛ wú ɖo dotóoxwé lɛ́ é nɔ wa lɛ́ é nɔ su Kúnnuɖetɔ́ Jehovah tɔn lɛ́ nukúnmɛ tawun. Ényí mɛ énɛ́ lɛ́ d’alɔ yě bónú azɔn yětɔn lɛ́ gbɔ ɔ, é nɔ lɛ́ su nukún yětɔn mɛ tawun.”—Atɔxwɛ [Flanségbe] 1^er février 2011.