KA E YACO TU

Na lomaocaoca e okati kina na taqaya, rere, se lomaleqa. Nida bula tu ena vuravura veilecayaki, eda na vakila kece na lomaocaoca.

KA E KAYA NA IVOLATABU

E vola o Tui Tevita: “Ena vakacava na dede ni noqu nuiqawaqawa, ni rarawa voli na lomaqu e veisiga?” (Same 13:2) E vosota vakacava o Tevita? A talaucaka na lomana vua na Kalou ena masu, e nuitaka vakaoti na loloma dei ni Kalou. (Same 13:5; 62:8) E sureti keda na Kalou meda talaucaka vua noda lomaocaoca kece. E kaya na 1 Pita 5:7: “Biuta vua na nomuni lomaocaoca kece, ni kauaitaki kemuni o koya.”

Ia eda rawa ni cakava na ka meda lewa vakamatau kina noda lomaocaoca. Kena ivakaraitaki ni “lomaleqataka na ivavakoso kece” na dauvola iVolatabu o Paula, a cakacaka vakaukaua me veivakacegui, me veivakayaloqaqataki tale ga vei ira e dau kauaitaka. (2 Korinica 11:28) Ena ituvaki qo, e laurai ni yaga nona lomaocaoca baleta ni uqeti koya me veivuke vakalevu. Eda rawa tale ga ni va qori. Ia na noda sega ni veikauaitaki ena rawa ni dusia nida sega ni dauloloma.—Vosa Vakaibalebale 17:17.

“Ni oni sega ni kauaitaka ga na ka e baleti kemuni, ni kauaitaka tale ga na ka e baleti ira tale eso.”—Filipai 2:4.

KA E YACO TU

De dua era lomaocaocataka tu eso na nodra cala makawa, nodra veisiga nimataka, se na veika vakailavo. *

KA E KAYA NA IVOLATABU

Vakasamataki ni cala makawa: Ni bera nira mai lotu vaKarisito eso ena imatai ni senitiuri, era dau mateni tu, daukovekove, veiyacovi tawadodonu, ra dau butako tale ga. (1 Korinica 6:9-11) Ia era sega ni vakasamataka tiko ga qori, era veisau ra qai nuitaka na nona yalololoma levu na Kalou, ni dau yalorawarawa me cakava vaka kina. E kaya na Same 130:4: “E tu ga vei kemuni [Kalou] na veivosoti dina, me rawa ni oni qoroi tu ga.”

Leqataki ni veisiga nimataka: “Kua vakadua ni lomaocaocataka na siga nimataka,” e kaya o Jisu Karisito, “ni siga nimataka e tu vata kei na kena lomaocaoca.” (Maciu 6:25, 34) Cava e vakaibalebaletaka? Kauaitaka mada ga na leqa ni dua na siga. Kua ni vakuria na lomaocaoca ni dua na siga ena nomu lai leqataka tiko na siga nimataka. Qori o na sega ni vakasama vinaka kina, vakavuna nomu vakatulewa vakariri. Nanuma tale tiko ga ni levu na ka eda dau lomaocaocataka era na rairai sega ni yaco.

Leqataki ni ilavo: A masulaka e dua na turaga vuku: “Moni kua ni soli au meu dravudravua se vutuniyau.” (Vosa Vakaibalebale 30:8) E qara ga na lomavakacegu—na ivakarau ni bula e vakadonuya na Kalou. E tukuna na Iperiu 13:5: “Me kua ni laurai ena nomuni bula ni oni lomana na ilavo, ni lomavakacegu ga ena ka e sa tiko vei kemuni. Ni a kaya: ‘Au na sega sara ni laivi iko, au na sega tale ga ni biuti iko.’” E rawa ni oti yani na ilavo, ia na Kalou ena sega ni biuti ira era nuitaki koya, era bula rawarawa tale ga.

“Au sega ni raica e dua na yalododonu me biu wale tu, se ra vaqara madrai na luvena.”—Same 37:25.

KA ERA TUKUNA ESO

E tukuna na dauvolaitukutuku o Harriet Green ena dua na ulutaga ni niusiveva The Guardian ena 2008: “Eda bula tu qo ena gauna e sa qai lomaocaocataki ga kina e levu na ka.” E vola ena 2014 o Patrick O’Connor ena Wall Street Journal, “E laurai nira sa lomaocaoca tiko vakalevu na kai Merika.”

KA E KAYA NA IVOLATABU

“Na nuiqawaqawa ni loma ni tamata e lomabibi kina, ia na vosa vinaka ena vakamarautaka.” (Vosa Vakaibalebale 12:25) E rawa ni kune sara ga na “vosa vinaka” ena itukutuku vinaka ni Matanitu ni Kalou. (Maciu 24:14) E tauyavutaka na Kalou na Matanitu qori, ena vakarau vakaotia na lomaocaoca ni kauta laivi na ka sara ga e vakavuna tiko, okati kina na tauvimate kei na mate! Qori eda sega ni cakava rawa na tamata. ‘Na Kalou ena qusia tani tale ga na wainimata kece mai na matada, sa na sega tale na mate, na lolosi, na tagiyaso, kei na mosi.’—Vakatakila 21:4.

“Me vakasinaiti kemuni mada ga na Kalou o koya na vu ni noda inuinui, ena marau kece kei na vakacegu ena vuku ni nomuni vakabauti koya.”—Roma 15:13.