iVakasala Vuku Mo Marautaka Kina na Bula Vakavuvale
E iloloma talei ni Dauveibuli na vakawati kei na vakaluveni. E vinakata meda marautaka noda bula vakavuvale. E dusimaki keda gona ena dua na ivola makawa sara, me vinaka kina noda bula vakavuvale da qai marautaka. Dikeva mada qo eso na kena ivakasala vuku.
Tagane, Lomana na Watimu
“E dodonu . . . vei ira na tagane mera lomani watidra me vaka ga nodra lomana na yagodra. Na tagane e lomani watina e lomani koya, e sega ni dua na tagane e cata na yagona, ia ena vakania qai karona.”—EFESO 5:28, 29.
E ulu ni vuvale o tagane. (Efeso 5:23) Ia na tagane vakawati vinaka e sega ni dauvoravora se namaka vakasivia na ka. Ena mareqeti watina, ena kauaitaka na veika me bula kina kei na ivakarau ni lomana. Ena saga tiko ga me vakamarautaki watina, qai sega ni vakaliuca ga na veika me baleti koya. (Filipai 2:4) Ena dau talaucaka vua na lomana, qai rogoca na ka e tukuna o watina. Ena sega ni ‘cudruvi koya vakaukaua,’ se cakava vua na itovo kaukaua se tauca vua na vosa mosimosi.—Kolosa 3:19.
Yalewa, Dokai Watimu
“Na yalewa me dokai watina vakalevu.”—EFESO 5:33.
Ni dokai watina o yalewa qai tokona nona vakatulewa, sa uqeta tiko na veiyaloni ena vuvale. Ke cakava e dua na cala o tagane, ena sega ni vosabeci koya o watina. Ia ena yalomalua qai dokai koya tiko ga. (1 Pita 3:4) Ke via tukuna vei tagane e dua na leqa, ena digitaka na gauna veiganiti qai vosa vua ena veidokai.—Dauvunau 3:7.
Yalodina Vua na Nomu iSa ni Vakawati
“O tagane ena kabiti watina, erau na lewe dua ga.”—VAKATEKIVU 2:24.
Ni rau vakamau e dua na yalewa kei na tagane, rau sa bucina e dua na veiwekani voleka ena vuvale. E dodonu gona vei rau na veiwatini me rau sasaga vagumatua me dei tiko ga nodrau vakawati. Ya na nodrau dau veivosaki vakadodonu, kei na nodrau dauveilomani ena ka lalai mada ga. Me rau yalodina tiko ga ena nodrau ivau ni vakamau, ya me rau kua ni veiyacovi kei na dua tale. E dua na ka mosimosi na lasaituba. Ena sega kina na veinuitaki, ena rawa tale ga ni kavoro na vuvale.—Iperiu 13:4.
iTubutubu, Vakavulici Luvemu
“Mo vakavulica na gone ena sala me muria, ni qase mai ena sega ni gole tani mai kina.”—VOSA VAKAIBALEBALE 22:6.
Na Kalou e lesi ira na itubutubu mera vakavulici luvedra, ya me vinaka na nodra itovo. Mera ivakaraitaki vinaka tale ga na itubutubu vei ira na gone. (Vakarua 6:6, 7) Ke talaidredre o gone, na itubutubu yalomatua ena sega ni cudru. Ia ena ‘totolo ni vakarorogo . . . berabera ni vosa, berabera ni cudru.’ (Jemesa 1:19) Ke raica o itubutubu ni vinakati me vakadodonutaki luvena, ena cakava qori ena loloma sega ena cudru.
Gone, Talairawarawa Vei Rau Nomu iTubutubu
“Kemuni na gone, ni talairawarawa vei ira nomuni itubutubu . . . ‘Mo rokovi tamamu kei tinamu.’”—EFESO 6:1, 2.
E dodonu mera talairawarawa na gone vei ira nodra itubutubu, qai dokai ira vakalevu. Nira dokai ira nodra itubutubu, ena vakilai kina na marau, vakacegu kei na duavata ena vuvale. Nira sa lai uabula na gone era na dokai ira tiko ga nodra itubutubu, ya nira raica mera qaravi vinaka. Qori e okati kina na nodra raica me vinaka tu na nodra vale se mera vukei vakailavo.—1 Timoci 5:3, 4.
Rawa ni o Wilika Tale ga
E RAWA NI MAMARAU NOMU VUVALE
Nuitaka na Kalou me Marautaki Kina na Bula Vakawati
Rua na taro rawarawa ena vakavinakataka nomu vakawati.
SAUMI NA TARO VAKAIVOLATABU
Cava na Rai ni iVolatabu ena Nodra Qaravi na iTubutubu iTabaqase?
E tu ena iVolatabu na kedra italanoa eso na tagane kei na yalewa vakabauta era qaravi ira nodra itubutubu itabaqase. E tiko tale ga kina na ivakasala yaga me vukei ira na veiqaravi tiko ena gauna qo.
YADRA!
Sala Mera Veiyaloni Kina na Vuvale
Rawa ni uqeta na iVolatabu na veiyaloni ena vanua e sega ni dau vakilai tu kina na ivakarau ni bula qori? Raica mada na ka era kaya o ira na muria na kena veiuqeti.
YADRA!
Sala Mo Veidokai Kina
Na veidokai e sega ni dodonu me vakaraitaki ga vagauna, ia me vakaraitaki e veigauna. O na vakaraitaka vakacava ni o dokai watimu?
