E tukuni ni “sega ni cala qai turaga yalododonu” na peteriaki o Jope. (Jope 1:1, ivakamacala e ra) A vakatokai o Loti me “turaga yalododonu.” (2 Pita 2:8) O Tevita e dau vakayacora “na ka e donu” ena mata ni Kalou. (1 Tui 14:8) Ia dikeva vinaka mada na kedratou itukutuku ena iVolatabu. Eda na kila kina qo: (1) nodratou malumalumu, (2) levu na ka eda na vulica ena nodratou ivakaraitaki, (3) rawa tale ga nida vakamarautaka dina na Kalou na kawa ivalavala ca.

E levu na ka dredre a yaco vakatawadodonu ena bula i Jope. E cala nona nanuma ni sega ni kauaitaki koya na Kalou, ke mani yalodina tiko ga se sega. (Jope 9:20-22) E kauaitaka vakasivia nona yalododonu era nanuma kina eso ni dodonu cake vua na Kalou.—Jope 32:1, 2; 35:1, 2.

O Loti a lomalomarua ni cakava e dua na ka e dodonu  me matata qai rawarawa vua. A cata na nodra itovo vakasisila na bula tiko e Sotoma kei Komora qai “vakararawataka na turaga yalododonu qo” na nodra ivalavala. (2 Pita 2:8) E kaya na Kalou ni na vakarusai rau na koro ca qori, ia ena vakabulai Loti kei na nona vuvale. De o nanuma ni na biubiu sara ga vakatotolo o Loti ena vuku ni ka e rarawataka. Ia ena gauna bibi qori e vakaberabera tale. Mani taura na ligadratou na agilosi a tala yani na Kalou, me kauti iratou ina taudaku ni koro.—Vakatekivu 19:15, 16.

O Tevita a sega ni lewai koya vinaka ena dua na gauna, a veibutakoci tale ga kei na dua na yalewa vakawati. Na nona saga me vunitaka, e vakarota kina me mate na watina na yalewa qori. (2 Samuela, wase 11) E tukuni ena iVolatabu ni “sega ni taleitaka o Jiova” na ka e cakava o Tevita.—2 Samuela 11:27.

Eratou a cala kece o Jope, Loti kei Tevita, so mada ga na nodratou cala e bibi sara. Ia eda na qai raica ni ratou a talairawarawa ni qarava na Kalou ena lomadratou taucoko. Ratou via vakaraitaka nodratou veivutuni, ratou qai cakava na veiveisau e vinakati. E vakadonui ratou kina na Kalou, tukuni tale ga ena iVolatabu ni ratou turaga yalododonu.

Eda na dau cala ga nida kawa ivalavala ca. (Roma 3:23) Ia na gauna eda cala kina, dodonu me laurai nida veivutuni, da qai saga meda vakadodonutaka noda sala.

Na cava ratou cakava o Jope, Loti kei Tevita me ratou vakadodonutaka kina nodratou sala? E turaga  yalodina ga o Jope. E vakadodonutaka nona rai o Jope ni vosa oti vua na Kalou, e veivutunitaka tale ga na ka e tukuna. (Jope 42:6) Na rai i Loti me baleta nodra itovo vakasisila e Sotoma kei Komora e tautauvata kei na ivakatagedegede ni Kalou. Na nona leqa ga ni a wele. E qai dro mai na koro sa cudruvi tu qori me kua ni tau vua na lewa ni Kalou. E talairawarawa qai sega ni raica lesu na veika sa biuta laivi tu yani. O Tevita a cala bibi ni beca na lawa ni Kalou, ia e vakaraitaka na ka dina e tu e lomana ena nona veivutuni kei na nona vakamasuta na loloma ni Kalou.—Same 51.

Na nona vakadonui ratou gona na Kalou e yavutaki ena nona kilai keda vinaka na kawatamata, nida kawa ivalavala ca. E “kila vinaka” na Kalou “na keda ibulibuli, e nanuma tiko nida kuvuniqele.” (Same 103:14) Ke kila tiko na Kalou nida na dau cala ena so na gauna, cava gona ena namaka vei keda?

Eda rawa ni kila na ka meda cakava meda vakamarautaka na Kalou nida vakasamataka na ivakasala vuku i Tevita vua na luvena o Solomoni. “O iko Solomoni na luvequ, mo kila na Kalou i tamamu, mo qaravi koya ena lomamu taucoko.” (1 Veigauna 28:9) Na cava na ibalebale ni lomamu taucoko? Kena ibalebale noda lomana na Kalou, da qai vakadeitaka nida na cakava na lomana kei na ka e vinakata. E sega ni uasivi na lomada, ia eda na saga meda qarava na Kalou ena talairawarawa, da tu vakarau tale ga nida vakadodonutaki. E lomana na Kalou o Jope, e talairawarawa tale ga, tukuni kina ni “sega ni cala.” O Loti e “yalododonu,” o Tevita tale ga e “vakayacora ga na ka e donu” ena mata ni Kalou. Eratou cala, ia ratou se rawa tiko ga ni vakamarautaka na Kalou.

Ke da dau vakananuma gona eso na ka eda diva meda a kua ni vakasamataka, se tauca e dua na ka ena vakamadualaki keda tale, se cakava na ka da qai kila e muri ni cala, me vakayaloqaqataki keda mada ga na vica na ivakaraitaki qo. E kila na Kalou ni sega tu ga ni dua vei keda e uasivi rawa ena gauna qo. Ia e namaka meda lomani koya, da qai gumatua ni talairawarawa vua. Ke vu dina mai lomada qori eda na vakadeitaka nida rawa tale ga ni vakamarautaka na Kalou.