Au sucu e Székesfehérvár, e Hungary, e kilai levu eso na kena itukutuku makawa ena 1,000 na yabaki sa sivi. Au se nanuma vinaka tu ga qo na revurevu ni ikarua ni valu levu.

Rau susugi au na tubuqu. Au se nanumi rau vinaka tu ga, vakabibi o Elisabeth, na buqu. O koya sara ga a tugana i lomaqu meu vakabauta vakalevu na Kalou. Niu se qai yabaki tolu keirau sa dau cavuta tiko e veiyakavi na Masu ni Turaga. Ia au sa qai kila na ibalebale dina ni masu qori niu sa yabaki 20 vakacaca.

Rau susugi au na tubuqu baleta ni rau cakacaka siga kei na bogi na noqu itubutubu. Rau via maroroi ilavo me voli kina e dua na neitou vale. Keitou dau kana vata vakavuvale ena ikarua ni veisiga Vakarauwai kece. Gauna talei vei au qori.

Yaco dina na ka rau navuca tu na noqu itubutubu ena 1958 ni sa voli e dua na neitou vale. Au marautaka niu sa na qai tiko vata keirau na noqu itubutubu! Vuki na marau qori me rarawa ni oti ga e ono na vula. Tauvi kenisa o tamaqu, tini rawai koya.

Dua na ka noqu rarawa. Nanuma sara noqu qaqanimasu: “Kemuni na Kalou, au a vakamasuti kemuni moni vakabulai tamaqu. Au sega ni vinakata me mate. Cava oni sega ni sauma kina na noqu masu?” Au via kila na vanua sa tiko kina o tamaqu. Au dau lomatarotarotaka: ‘Sa rairai tiko mai lomalagi? Se sa takali vakadua?’ Dau mositi au niu raici ira na gone se bula tiko na tamadra.

Voleka ni veisiga kece ena vica na yabaki au dau lai sikova tiko nona ibulubulu. Au dau tekiduru kina au qai masu: “Yalovinaka kemuni na Kalou, au via kila na vanua sa tiko kina o tamaqu.” Au kerea tale ga me vakaraitaka vei au na inaki dina ni noda bula.

Au via vuli vosa vakaJamani niu sa yabaki 13. Levu na ivola vakaJamani era tabaki, nanuma gona ni na tiko kina na  isaunitaro au dau vaqaqa voli. Au tekivu vuli ena 1967 ena koro o Jena, a wili tu ena gauna ya ina Tokalau kei Jamani. Au gumatua ni wilika nodra ivola na vuku ni Jamani, vakauasivi na kena e baleta na inaki ni bula. Au raica kina eso na ivakamacala totoka, au sega ga ni lomavakacegu. Ia au masu tiko ga me saumi kina noqu lomatarotaro.

Au lesu i Hungary ena 1970, au sotavi Rose kina, keirau a qai vakawati. Na gauna ya a matanitu vaKominisi tu o Hungary. Oti ga vakalailai neirau vakamau kei Rose, keirau dro i Austria. Neirau sasaga me keirau na dewa sara i Serene, e Ositerelia, na vanua e tiko kina o ganei tinaqu.

Dua sara noqu cakacaka e Austria. Tukuna vei au ena dua na siga e dua noqu itokani vakacakacaka ni rawa ni sauma na iVolatabu noqu taro kece. E solia vei au e vica na ivola e vakamacalataki kina na iVolatabu. Au wilika kece na ivola qori, au qai via kila e levu tale na ka. Au mani volavola vei ira na vola na ivola qori, o ira na iVakadinadina i Jiova, me so tale mai na noqu ivola.

Sikovi keirau yani vakaveiwatini e dua na iVakadinadina cauravou ni Austria ena siga keirau vakananuma kina na imatai ni yabaki ni neirau bula vakawati. E kauta yani na ivola au a kerea, veisureti sara meu vuli iVolatabu, au vakadonuya. Niu dau gumatua ena vuli, keirau vuli vakarua ena dua na macawa, dau rauta ni va na aua ena veigauna ni vuli!

Au kurabuitaka na ka au vulica vei ira na iVakadinadina me baleta na iVolatabu. Au kidroataka nodra vakaraitaka vei au na yaca ni Kalou o Jiova ena noqu iVolatabu vakaHungary. Ena loma ni 27 na yabaki noqu dau lai lotu tu, au sega vakadua ni rogoca na yaca ni Kalou me bau cavuti. E uqeti au na isaunitaro vakaivolatabu e matata qai dina. Kena ivakaraitaki, au vulica nira sega tu ni kila e dua na ka na mate, e vaka ga nira moce lutu tu. (Dauvunau 9:​5, 10; Joni 11:​11-​15) Au vulica tale ga na ka e yalataka na iVolatabu me baleta na vuravura vou ena “sega tale [kina] na mate.” (Vakatakila 21:​3, 4) Ena vuravura vou qori era ‘na vakaturi na mate,’ dua na ka noqu rai vakanamata kina niu na sotavi tamaqu tale. ​—Cakacaka 24:15.

E yalodina tale ga o Rose me keirau vulica vata na iVolatabu. Toso vinaka neirau vuli, rua ga na vula keirau sa vakaotia kina na ivola e vulici tiko! Keirau tiko ena nodra soqoni kece na iVakadinadina ena nodra Vale ni Soqoni. Uqeti keirau nodra ivakaraitaki nira dau loloma, veivukei, ra duavata tale ga.​—Joni 13:​34, 35.

E vakatarai ena 1976 me keirau gole i Ositerelia. Keirau gole sara vei ira na iVakadinadina e kea, dua na ka nodra veikauaitaki, keirau sega ni vaka na vulagi. Keirau papitaiso me keirau iVakadinadina ena 1978.

Au sa kunea na isaunitaro kece au dau vaqaqa voli ena dua na gauna balavu. Noqu volekati Jiova na Kalou, au kunea tale ga kina e dua na Tama vinaka au dau diva tu. (Jemesa 4:8) Uqeti au vakalevu na noqu via raici tamaqu ena vuravura vou.​—Joni 5:​28, 29.

Keirau vakatulewataka kei Rose ena 1989 me keirau lesu i Hungary, me keirau lai wasea vei ira na neirau itokani kei ira na neirau vuvale na neirau vakabauta, vaka kina o ira keirau na sotava. Marautaki dina neirau rawa ni vakavulici ira e le drau vakacaca ena iVolatabu. Sivia e le 70 vei ira qori era tomani keirau ena qaravi Jiova, wili kina na tinaqu lomani.

E 17 na yabaki noqu masu tiko me saumi na noqu taro. Oti tale e 39 na yabaki au se masu tiko ga, ia na gauna qo au sa rawa ni cavuta, “Vinaka vakalevu Tamaqu vakalomalagi ena nomuni sauma na taro kece au dau vaqaqa voli niu se gone.”