A veisere o Linda kei watina e liu, dua na ka na nona marau ni vakamautaki Herman. Ia me vaka ga erau tukuna ena itekivu ni ulutaga qo, eso na ituvaki dredre ena basika ena ikarua ni vakawati. *

Ke o vakawati tale, e vakacava na nomu rai me baleti watimu ena gauna qo? E kaya o Tamara, a vakawati tale ni oti e tolu na yabaki nona veisere: “Ni o vakawati ena imatai ni gauna, o nanuma ni na dei na nomu vakawati. Ia ena sega ni va qori nomu rai ni o vakawati tale, o na vakasamataka tiko ga na leqa a yaco ena imatai ni nomu vakawati.”

Ia e levu era marautaka tiko ena gauna qo na  ikarua ni nodra vakawati. Na cava era cakava me dei qai marautaki kina na nodra vakawati? Dikeva mada qo e tolu na ituvaki dredre, kei na sala e rawa ni veidusimaki kina na ivakavuvuli vakaivolatabu. *

E kaya o Ellen, mai Sauca Aferika: “Ni keirau dau gade kei watiqu ena gauna qo ena vanua vata ga keirau dau gade tu kina kei watiqu e liu, au dau nanumi koya sara ga. So na gauna au dau vakatauvatani rau.” Ena yasana adua, o na rairai sega ni taleitaka nona dau talanoataka o watimu na imatai ni watina.

VAKATUTU: Mo namaka ni na taura toka na gauna me qai guilecava o watimu na watina e liu, vakabibi ke balavu na gauna erau vakawati tu kina. Eso mada ga era kaya nira kilalecataki watidra ena gauna qo nira kacivi ira ena yacai watidra e liu! Na cava mo cakava ke o sotava na ituvaki va qori? E kaya na iVolatabu mo “dauveikauaitaki.”—1 Pita 3:8, New Century Version.

Kua ni vuvutaki watimu ke talanoataka na imatai ni nona vakawati. Ke via talanoataka, mo kauaitaka na ka e tukuna. Kua ni totolo mo nanuma ni vakatauvatani iko o watimu. E kaya o Ian, a vakawati tale ena tini na yabaki sa oti: “E sega ni vakatabuya o Kaitlyn meu talanoataka e dua na ka me baleti watiqu e liu. E raica ga me dua na sala e kilai au vinaka kina.” Na ivakarau ni veivosaki va qori drau na veivolekati kina vakaveiwatini.

Mo dau kauaitaka nona itovo vinaka o watimu. E macala ni na sega ni tautauvata sara kei watimu e liu. Ia e tiko eso tale na ka e vinaka kina. Mo saga gona mo drau veivolekati tiko ga, “[kua] . . . ni vakatauvatani koya kei na dua tale,” vakasamataka ga na veika vinaka me baleti koya qai vakaraitaka ni o domoni koya dina. (Kalatia 6:4) E kaya e dua na turaga na yacana o Edmond, sa vakawati tale: “Na nomu veitokani kei na dua, ena sega ni tautauvata kei na dua tale, e va tale ga qori ni o sa vakawati tale.”

Na cava mo cakava me kua ni vakaleqa kina nomu vakawati na nomu dau vakasamataki watimu e liu? E kaya o Jared: “Au vakamacalataka vei watiqu ni so na gauna au dau vakananuma na veika totoka keirau cakava vata kei watiqu e liu. Ia sa oti na gauna qori. Au sa marautaka noqu vakawati ena gauna qo.”

E kaya o Javier e dua na turaga a vakawati tale ni oti e ono na yabaki nona veisere: “Ni keirau se qai vakamau ga, e tukuna o watiqu nira dau vakalewai koya eso na noqu itokani.” E duidui na ka e sotava o Leo. E kaya: “So na gauna au rogo sara tu ga, era tukuna eso vei watiqu nira taleitaki watina e liu!”

VAKATUTU: Vakasamataka mada na vuna era tukuna kina ya. E kaya o Ian sa cavuti oti mai: “De dua e dau dredre vei ira eso mera ciqoma e dua tale era sega ni veikilai vinaka me vakataki watina e liu.” Koya gona, saga mo “yalorawarawa, . . . qai yalomalua sara vei ira kece” na tamata. (Taito 3:2) Ni o vakawati tale, ena rairai veisau na nodra rai na nomu vuvale kei na nomu itokani. Sa na so tale nomu itokani vou. E kaya o Javier, sa cavuti oti mai: “Ni oti toka e dua na gauna neirau vakawati, keirau saga me vinaka tale neirau veimaliwai kei ira na neirau itokani e liu.” E tomana: “Keirau dau saga me so tale na neirau itokani, qori na ka e vukei keirau vakalevu.”

Vakasamataka se na tarai watimu vakacava nomu dau galeleti ira nomu itokani e liu. Kena  ivakaraitaki, ke o rogoca ni veivosakitaki eso na ka me baleti watimu e liu, mo lewa vinaka na ka o tukuna me kua kina ni nanuma o watimu ni beci. E kaya e dua na vosa vakaibalebale ena iVolatabu: “Na vosa vakalialia e vaka na isua ni iseleiwau, ia na yamedra na vuku ena qarauna na ka era tukuna. Ena veivakabulai na nodra vosa.”—Vosa Vakaibalebale 12:18, Holy Bible—Easy-to-Read Version.

Ni biuti Andrew o watina erau vakamau sara kei Riley. E kaya o Andrew: “Au leqataka ni dua na siga ena biuti au tale ga o watiqu. De dua ena nanuma o Riley niu sega ni lomani koya me vakataki watina e liu, qai lai vakawati tale.”

VAKATUTU: Veivosakitaka kei watimu na ka o dau leqataka. E kaya na iVolatabu: “Ni sa sega na bose, sa sega ni yaco na ka e nanumi.” (Vosa Vakaibalebale 15:22) Ni rau cakava qori o Andrew kei Riley, erau veinuitaki kina. E kaya o Andrew: “Keirau duavata kei Riley ni sega ni iwali ni leqa na veisere. Au sa qai nuitaki koya ga vakaoti.”

Ke a sega ni yalodina vei watimu o watina e liu, saga ena nomu vinaka taucoko me nuitaki iko. Kena ivakaraitaki, erau duavata o Michel kei Sabine me rau tukuna ke rau veivosaki kei na watidrau e liu. E kaya o Sabine: “Keirau nuidei qai lomavakacegu ni keirau cakava qori.”—Efeso 4:25.

E levu era vakawati tale era sa marautaka tiko ena gauna qo na nodra bula vakawati, o rawa tale ga ni va qori. O sa na kila vinaka na veika o lekata ena nomu vakawati e liu. E kaya o Andrew sa cavuti oti mai, “dua na ka noqu marau niu mai vakawatitaki Riley. Sa oti qo e 13 na yabaki neirau vakamau, keirau sa qai veivolekati ga vakaveiwatini, keirau sega ni vinakata me seavu.”