O María Isabel e dua na dautukutuku gone gugumatua ena siti o San Bernardo, e Chile, Sauca Amerika. Na nona vuvale eratou itaukei ni vanua oya, era vakatokai na Mapuche. Dua na ka na nodratou tokona tiko vakavuvale me dua na ivavakoso vou e vosataki kina na nodra vosa na Mapuche, e vakatokai tale ga me Mapudungun.

Ena gauna a kacivaki kina ni na caka tale ga ena vosa vakaMapudungun na iVakananumi ni mate i Karisito, me veisoliyaki tale ga

e 2,000 na ivola ni veisureti ni iVakananumi ena vosa ya, e vakasamataka sara o María Isabel na ka e rawa ni cakava me veivuke kina. A nanuma lesu sara na kedra irogo eso tale na itabagone iVakadinadina era marautaka na vuavuaivinaka ni nodra vunau vei ira na lewe ni nodra kalasi kei ira na qasenivuli. E veivosakitaka qori kei rau na nona itubutubu, ratou sa qai nanuma me vakasamataka o María Isabel e dua na ituvatuva me veisoliyaki kina na ivola ni veisureti e koronivuli. Na cava sa qai nanuma me cakava?

Na imatai ni ka a cakava oya nona lai kerei ratou na vakailesilesi ni koronivuli ke rawa ni vakabira e dua na ivola ni veisureti ena matamata levu ni koronivuli. Ratou vakadonuya, ratou qai vakacaucautaki koya ena nona vakaliuliu me cakava qori. Ena gauna e kacivi kina na yacadra na gonevuli ena dua na mataka me kilai era tiko se sega, a kacivaka tale ga na iliuliu ni koronivuli ena sipika na veika me baleta na ivola ni veisureti!

Oti qori sa qai kerea o María Isabel ke rawa ni sikova na kalasi kece e koronivuli. Ena gauna sa vakadonui kina me cakava qori, sa qai taroga ena kalasi kece ke dua vei ira e Mapuche. E tukuna: “Au nanuma de 10 se 15 ga na gonevuli era Mapuche, ia nira le levu sara ga, au mani veisoliyaka kina e 150 na ivola ni veisureti!”

A taroga e dua na marama a raica na ivola ni veisureti ena matamata ni koronivuli se o cei me na lai raica me baleta na soqo oya. Vakasamataka mada na nona kidroa ni a tukuni me lai raica e dua na goneyalewa lailai yabaki tini! E dredre ga o María Isabel ni tukuna: “A namaka tiko me sotava e dua e uabula.” A solia o María Isabel e dua na nona ivola ni veisureti qai vakamacala vakalekaleka vua, a taroga sara vua na marama oya na vanua e vakaitikotiko kina me rawa ni lai sikovi koya yani kei rau na nona itubutubu me tukuni tale vua e levu na ka me baleta na Matanitu ni Kalou. Dua na ka na nodra marau na 20 na dautukutuku era qarava tiko na yalava ena vosa vakaMapudungun nira raica na marama oya kei na 26 tale na tataleitaki era Mapuche nira gole yani ena iVakananumi. A dua toka ga na iwasewase lailai e liu, ia qo sa dua sara na ivavakoso bulabula!

Se mani o yabaki vica, o rawa ni vakaliuliu tale ga mo sureti ira na lewe ni nomu kalasi se itokani vakacakacaka ena iVakananumi, dua na ivunau, se dua na soqo ni tikina. Vakacava mo vakadidike ena noda ivola ni isoqosoqo mo raica kina eso na irogo e rawa ni solia vei iko eso na vakasama me rawa ni vuavuaivinaka kina na nomu sasaga? Kerea tale ga na yalo tabu i Jiova mo rawa ni tukuna kina ena doudou na veika me baleti koya. (Luke 11:13) Ke o cakava qori, o na rairai kurabui sara ga, qai vakayaloqaqataki iko vakalevu na ka e rawati mai na sasaga e lalawataki vinaka.