Ena iVolatabu, na vosa vaKirisi e vakadewataki taumada ena so na gauna me “dau dina” e vakaibalebaletaki ina dua na ka e totoka vakaoti. Rawa ni tiko tale ga kina na vakasama ni dua na ka totoka me vakaduiduitaka na ka vinaka kei na kena e ca.

Era sega ni vakawalena na lotu vaKarisito na vosa uqeti vakalou i Paula ena nona kaya: “Keitou vinakata me keitou dina ena ka kece.” Cava e okati kina?

E levu era dau tirovi ira ena iloilo e veimataka ni bera nira lako yani ena dua na vanua. Na vuna? Era vinakata me totoka na kedra irairai. Ia e bibi sara na ivakarau ni lomada mai na noda kauaitaka vakasivia na ikotikoti ni uluda se noda tokara na isulu sa takalevu tu nikua. Ni ivakarau ni lomada ena laurai kina na vinaka se ca ni keda irairai e taudaku.

E kaya vakadodonu na Vosa ni Kalou ni dau malele na lomada ina ka ca. E tukuni ena Vakatekivu 8:21: ‘Ni ca na malele ni lomada mai na gauna sara eda se gone kina.’ Ena vinakati gona meda valuta na gagadre ca va qori eda sucukaya mai. E kaya vakamatata na yapositolo o Paula ena nona saga me valuta nona ivalavala ca: “E vu dina mai lomaqu noqu marautaka na lawa ni Kalou, au qai raica ni dua tale na lawa e tiko ena yagoqu e veivala tiko kei na lawa ni noqu vakasama qai vakabobulataki au ina lawa ni ivalavala ca e tiko e yagoqu.”—Roma 7:22, 23.

Kena ivakaraitaki, ni uqeti na lomada meda cakava na ka ca, da qai malele tale ga kina, e sega ni kena ibalebale meda bobula ina ivakarau ni lomada. Eda se rawa tiko ga ni vakatulewataka na ka meda cakava. Ke da vakatulewataka meda cata na vakasama ca, eda rawa kina ni dina tiko ga se mani vakacava sara na levu ni tamata era sega ni dau dina era maliwai keda tu.

Ke da vinakata meda dau dina, e bibi me muri na ivakatagedegede savasava. Ia ka ni rarawa ni levu nikua era ogaoga ga ena vakatulewataki ni ka mera tokara, sa sega ni kauaitaki na muri ni ivakatagedegede savasava. Era vakaiulubaletaka na kedra ituvaki me vu ni nodra lasu. E kaya kina na ivola The (Honest) Truth About Dishonesty: “Na veika eda cakava ena gauna eda lasu kina, eda na saga me vakabauti nida se dina tiko ga.” Ia vakacava e tiko na ivakatagedegede me dusimaki keda meda kila kina ni sega ni dua na lasu e vinaka? Io e tiko na idusidusi.

E vica vata na milioni e vuravura raraba era vakila na yaga ni iVolatabu ena tikina qori. E tiko ena iVolatabu na ivakatagedegede savasava e sega ni vakatauvatani rawa. (Same 19:7) E tu kina na veidusimaki yaga me baleta na bula vakavuvale, cakacaka, itovo, kei na bula vakayalo. E se yaga tiko ga nikua. Na kena lawa kei na ivakavuvuli e baleti ira sara tiko ga na lewenivanua, duikaikai, yavusa kei  na matatamata kece. Na noda wilika na iVolatabu, noda vakasamataka vakatitobu kei na muri ni kena ivakasala, eda sa vakavulica tiko na lomada me dau dina, me caka dodonu tale ga.

E sega ni yaga na noda kila wale ga na veika e volai tu ena iVolatabu meda valuta kina na lasu. E tiko eso tale na ka meda cakava, vakabibi nida bula tu qo ena vuravura e torosobu tiko ga na kena ivakarau, da qai uqeti meda muria na kena itovo ca. Ena vinakati gona meda masuta na Kalou me vukei keda, me veitokoni tale ga. (Filipai 4:6, 7, 13) Nida cakava qori, eda na doudou ni cakava na ka e dodonu, da qai dau dina ena ka kece.

E yaga vei Hitoshi, a tukuni mai ena imatai ni ulutaga, na nona kilai me dau dina. Sa cakacaka tiko qo vua e dua e dau taleitaka na nona dau dina. E kaya o Hitoshi: “Au vakavinavinaka niu rawa ni cakacaka ena dua na vanua e savasava tiko ga kina noqu lewaeloma.”

Qori tale ga na ka era vakila eso tale. Wilika mada qo na yaga ni nodra muria na ivakavuvuli vakaivolatabu mera “dina ena ka kece.”

• Lewaeloma e Savasava

  “Au biu vuli niu se qai yabaki 13 meu cakacaka kei ira na dau butako. E 95 gona na pasede ni ilavo butakoci e kequ isau. Au qai vakawati, keirau vulica sara vakaveiwatini na iVolatabu kei ira na iVakadinadina i Jiova. Keirau vulica kina ni cata na Kalou o Jiova * na cakacaka vakatawadodonu, keirau mani veisautaka neirau bula. Keirau yalataka neirau bula vei Jiova ena 1990, oti keirau papitaiso me keirau iVakadinadina i Jiova.”—Vosa Vakaibalebale 6:16-19.

  “E liu era bini ena noqu vale na iyaya butakoci, ia qo sa sega, e vinaka kina noqu lewaeloma. Niu dau vakasamataka lesu na noqu sega ni dau dina ena vica vata na yabaki sa sivi, au vakavinavinakataka na yalololoma levu i Jiova. Niu moce gona ena veibogi, dua na ka noqu lomavakacegu niu kila ni marautaki au.”—Cheryl, mai Ailadi.

  “Ni kila noqu boso niu a vakasuka nona veivaqumi e dua a mai volivoli, e kaya vei au: ‘E vakavuna na nomu Kalou mo nuitaki! O vu ni veivakalougatataki sara ga ena kabani qo.’ Na noqu dau dina ena ka kece e savasava kina noqu lewaeloma vei Jiova. Au rawa kina ni vukea noqu vuvale kei ira eso tale mera cakava tale ga qori.”—Sonny, mai Hong Kong.

• Vakacegu ni Vakasama

  “Au nona ivukevuke e dua na vakailesilesi ni dua na baqe ni vuravura. Ena buturara ni bisinisi qo, e sega ni kauaitaki vakalevu na dau dina, na rawa iyau ga. Takalevu na rai qo, ‘Sega ni ca keu lasu ga vakalailai meu rawaka kina, vukea tale ga na itukutuku vakailavo ni matanitu!’ Ia niu dau dina, e vakacegu na noqu vakasama. Au vakadeitaka meu dau dina se mani vakacava na veika ca au na sotava kina. Era kila na vakacakacakataki au niu na sega ni lasutaki ira se lasu ena vukudra.”—Tom, mai Merika.

• O na Dokai Kina

  “E uqeti au na noqu iliuliu e valenicakacaka meu lasu ena kena yali eso na iyaya, ia au sega ni duavata kina. Nira sa kune na butako e vakavinavinakataki au sara o boso ena noqu dina. Ena vinakati na doudou meda dina tiko ga ena vuravura sa lomoci tu qo ena lasu. Ena yaga qo baleta nida na rawa ni dokai, da qai nuitaki.”—Kaori, mai Japani.

Na lewaeloma vinaka, vakacegu ni vakasama, kei na nomu dokai—era icocovi kece e vakadinadinataki kina ni yaga vakalevu na noda dau dina. O duavata kina?