Vola o Marika 4:1-41
4 E tekivu veivakavulici tale mai baravi o Jisu. Era torovi koya yani e dua na ilala levu, e mani vodo o koya ena dua na waqa qai lai dabe toka mai kina, ia era tu kece ga e matasawa na ilala levu ya.+
2 E levu sara na ka e vakavulici ira kina ena vosa vakatautauvata.+ Ni veivakavulici tiko e tukuna vei ira:+
3 “Ni rogoca mada! E lako e dua na dauteitei me lai kaburaka+ na nona itei.
4 Ni se kakaburaki tiko, e lutu eso na itei ena batinisala, era lako mai na manumanuvuka ra qai kania.
5 E lutu eso tale ena vanua veivatu e lailai kina na qele, era kadre totolo sara ni sega ni vavaku na qele.+
6 Ia ni cila mai na siga era malai, ra qai mate sara ni sega na wakadra.
7 Eso tale na itei e lutu ena veiwavakavotona, e tubu na wavakavotona qai solegi ira, ra sega kina ni vua.+
8 Ia eso e lutu ena qele vinaka, era tubu qai levu sara, era tekivu vua, eso e 30 na vuana, eso e 60, eso e 100 vakacaca.”+
9 E tomana: “Me rogoca o koya e vakadaligana, me rogoca sara.”+
10 Ni sa tiko duadua o Jisu, era qai mai tarogi koya o ira na tiko vata kei koya, kei ratou na le Tinikarua me baleta na vosa vakatautauvata.+
11 E kaya vei ira: “E vakatarai vei kemuni moni kila na ka vuni tabu+ ni Matanitu ni Kalou, ia vei ira tale eso ena tukuni ga vei ira ena vosa vakatautauvata.+
12 E dina nira rai tu, ia era sega ni raica rawa na ka, era rogoca, ia era sega ni kila na kena ibalebale, era na sega sara ga ni saumaki mera qai vosoti.”+
13 E qai kaya tale vei ira: “Ke oni sega ni kila na ibalebale ni vosa vakatautauvata qo, oni na qai kila vakacava na ibalebale ni vosa vakatautauvata tale eso?
14 “E kaburaka na vosa+ ni Kalou o koya na dauteitei.
15 Qo na kena e kaburaki ena batinisala, ia nira rogoca oti ga, e lako mai o Setani+ qai mai kauta tani na vosa e kaburaki e lomadra.+
16 E vaka tale ga kina na kena e kaburaki ena vanua veivatu, nira rogoca ga na vosa, era ciqoma sara ena levu ni nodra marau.+
17 Ia ni sega ni vakawakana na vosa, e sega kina ni dei e lomadra, nira vakararawataki se vakacacani ena vuku ni vosa, era tarabe sara.
18 Eso tale e kaburaki ena veiwavakavotona, qo o ira era rogoca na vosa,+
19 ia na nuiqawaqawataki+ ni bula ena gauna qo,* na kaukaua ni veitemaki ni iyau,+ kei na gadrevi+ ni veika tale eso, e curuma yani na lomadra me tarova na tubu ni vosa, mani sega kina ni vua.
20 Ia na kena e kaburaki ena qele vinaka o ira era rogoca na vosa ra ciqoma ena marau, ra qai vua. Eso e 30 na vuadra, eso e 60, eso tale e 100 vakacaca.”+
21 E kaya tale ga vei ira: “E sega ni kau mai na cina me biu e ruku ni basikete* se ruku ni imocemoce se vakacava? Sega ni dau biu ga ena itutu ni cina?+
22 Ni sega ni dua na ka e tabonaki me sega ni vakatakilai; se dua na ka e vunitaki matua me sega ni vakavotui.+
23 Me rogoca vinaka o koya e vakadaligana.”+
24 E kaya tale vei ira: “Ni vakasamataka vinaka na ka oni rogoca tiko.+ Na ivakarau oni vakarautaka ena vakarautaki tale vei kemuni, io, ena vakaikuritaki vei kemuni.
25 Ni o koya e tu vua na ka ena soli vakalevu vua,+ ia o koya e sega vua na ka, ena kau laivi na ka mada ga e bau tu vua.”+
26 E tomana: “E vaka kina na Matanitu ni Kalou ni vaka na itei e kaburaka e dua ina qele.
27 E moce ena bogi qai yadra ena mataka, sa kadre na itei qai tubu me levu—e sega ni kila se yaco vakacava.
28 E vakavuna ga na qele me vua na itei. E tubu e liu na drauna, tarava na sena, qai muri sara na vuana.
29 Ia ni matua na itei, sega ni bera nona taya sara ena isele takelo ni sa gauna ni tatamusuki.”
30 E tomana: “Eda na vakatauvatana kei na cava na Matanitu ni Kalou, se, na vosa vakatautauvata cava e rawa nida vakamacalataka kina?
31 E vaka na sore ni musita, e sorenikau lailai duadua vei ira na sorenikau kece e vuravura+ ena gauna e tei kina.
32 Ia ni sa tei oti, e dau tubu me levu sara vei ira na itei kece, e lelevu tale ga na tabana, mera ro kina na manumanuvuka ni lomalagi.”
33 E levu na vosa vakatautauvata+ va qo e vakamacalataka kina vei ira na vosa ni Kalou me vakatau ena ka era taura rawa.
34 E vosa ga vei ira o Jisu ena vosa vakatautauvata. Ia e dau qai vakamacalataka na kena ibalebale vei ratou na nona tisaipeli.+
35 Ena siga ya ni sa karobo, e kaya vei ratou: “Tou lele mada ina baravi e tai.”+
36 Nira sa talaci oti kece na ilala levu, eratou lele sara i tai, era tu e kea eso tale na waqa.+
37 E qai tubu mai e dua na batinicagi kaukaua, e suaigelegele na waqa ena kaukaua ni ua ni roba mai na babana, e voleka sara kina ni luvu.+
38 Ia e davo koto o Jisu ena muaimuri ni waqa, e vakailokoloko toka. Eratou mani vakayadrati koya ena nodratou kaya: “Qasenivuli, oni sega ni bau kauaitaka na ka e yaco tiko? Tou sa voleka ni mate!”
39 Ni rogoca ya, e duri sara ga me vunauca na cagi, e kaya ina wasawasa: “Mo maravu!”+ Mai ruru yani na cagi, e maravu tale ga na wasawasa.
40 E qai kaya vei ratou: “Na cava dou sa rui rere* kina? Dou se sega tiko ga ni vakabauta?”
41 Ia eratou rere vakalevu, ratou kaya: “O cei mada qo, ni talairawarawa sara ga vua na cagi kei na wasawasa?”+
iVakamacala e ra
^ Se “ena itabagauna qo.” Raica na iVakamacala ni Vosa.
^ Se “basikete ni vakarau.”
^ Se “yalolailai.”
