Vakasamataka mada na ituvaki qo: E kauaitaka o Julia na kena levulevu ni tirovi koya ena iloilo. Erau kaya na nona itubutubu kei ira na nona itokani ni “lila,” ia e nanuma o Julia ni dodonu me “vakalutu yago.”

E vakasamataka o Julia me kua ni kana me vica na siga, me lutu mada ga kina na yagona ena “rua vakacaca na kilo.” Ia qori e rawa ni vakaleqai koya tale . . .

Na cava o na cakava ke o tu ena ituvaki ya?

Sega ni cala ke o dau kauaitaka na kemu irairai. Era vakamacalataki mada ga ena iVolatabu eso na yalewa kei na tagane rairai totoka me vakataki Sera, Raijeli, Josefa, Tevita, kei Apikali. E cavuti tale ga ena iVolatabu na “goneyalewa matavinaka” o Apisaki.—1 Tui 1:4.

Ia e levu na itabagone era kauaitaka tale vakasivia na kedra irairai. Qori e dau vakavuna tale e levu na leqa. Vakasamataka mada qo:

• E laurai ena dua na vakadidike ni 58 na pasede na goneyalewa era kaya nira levulevu, ia e 17 ga na pasede era levulevu dina.

• Ena dua tale na vakadidike, era nanuma nira levulevu e 45 na pasede na yalewa lila!

• Era sega ni dau viakana eso na itabagone ena kaukaua ni nodra vinakata mera vakalutu yago. Ia qori e rawa ni vakaleqa tale na nodra bula.

 E vinaka mo kere veivuke ke o kila ni tauvi iko tiko na mate ni sega ni viakana (anorexia). Talaucaka na nomu leqa vei rau na nomu itubutubu, se dua tale e qase cake o nuitaka. E kaya na iVolatabu: “Na itokani dina e loloma ena veigauna, e tacida ena gauna ni rarawa.”—Vosa Vakaibalebale 17:17.

E sega ni vakatau ena irairai e sau na kena totoka e dua. Raica mada na ka e kaya na iVolatabu me baleti Apisalome na luvei Tui Tevita:

“E sega ni dua e. . . . qoroi vakalevu na kena totoka. . . . E sega ni dua na ka e vakamelei rawa.”—2 Samuela 14:25.

Ia na cauravou qori e dokadoka, dau vaqara rogo, veidabui tale ga! E sega ni vinaka na ka e kilai me baleti Apisalome ni tukuna na iVolatabu ni dau veibeci, tawayalodina, qai yaloca.

Sa rauta meda vakasalataki ena iVolatabu:

“Ni sulumaka na itovo vou.”—Kolosa 3:10.

“Me kua ni kemuni idivi na veika e sau . . . , me kemuni idivi ga na tamata e loma.”—1 Pita 3:3, 4.

Sega ni cala ke o cakava eso na ka mo rairai vinaka kina. Ia e bibi cake mai na kemu irairai na nomu itovo vinaka. Qori na ka ena yaga tawamudu vei iko, o na taleitaki tale ga kina, sega ni nomu musudonu se tolo maresa! E kaya e dua na goneyalewa o Phylicia: “Ena rairai totolo nomu raikiviti ena totoka ni kemu irairai, ia era na qoroi iko vakalevu eso tale ke vinaka na lomamu kei na nomu itovo.”

Vakacava o sega ni dau taleitaka na kemu irairai?

O bau vakasamataka mo sele se muria e dua na ivakarau ni kanamusu e rawa ni veivakaleqai, ni o vinakata me veisau na kemu irairai?

Ke rawa, na cava o na via veisautaka ena kemu irairai? (Toqarukutaka na ka o via veisautaka.)

• KEMU BALAVU

• KEMU BI

• ULUMU

• KEMU IBULICAKI

• MATAMU

• KULINIYAGOMU

Ke o sauma ena io na imatai ni rua na taro, qai vica toka na ka o toqarukutaka ena ka o via veisautaka ena kemu irairai, vakasamataka qo: De dua e duatani na nodra rai eso tale me baleti iko, o iko ga e cala na nomu rai. Io, e rawa ni sivia tale na ka o cakava ke o sa rui kauaitaka vakalevu na kemu irairai.—1 Samuela 16:7.