ENA 14 Epereli, 1989, era curuma yani na vakailesilesi vakamatanitu na vale keimami soqoni tiko kina ena tauni o Maumere, ena yanuyanu o Flores. Era vesuki au kei na le tolu tale.

Era veivakasaurarataki na ovisa ni valeniveivesu me keitou vakarokorokotaka na kuila. Keitou sega ni via cakava ya, keitou mani moku, caqelaki, qai lima na siga na neitou duri tu e tuba ni warumisa sara tu ga na matanisiga. E sega ni tukuni rawa na levu ni neitou wawale, qai momosi na yago i keitou ena vuku ni mavoa. Na rumu tale ga keitou biu kina e ka lalai qai vakasisila. Keitou sautaninini ena bogi ena batabata ni simede. E vuki tukuna vei keitou na ovisa ni valeniveivesu me keitou cakitaka na neitou vakabauta, ia keitou kaya: “Keitou na sega ni vakarokorokotaka na kuila me yacova na neitou mate.” Me vakataki ira ga e levu na mataveitacini ena veigauna sa oti, e ka dokai me keitou “vakararawataki . . . ena vuku ni ka dodonu.”—1 Pita 3:14.