E levu na itubutubu era sega ni vakatarai luvedra mera vakayagataka na sala ni veikilai ena internet, nira vakasamataka na leqa e rawa ni yaco kina. Ia ke o vakatara mera vakayagataka na internet, o na vukei ira vakacava mera kila na leqa e rawa ni yaco kei na sala mera qaqarauni kina?

Ena ulutaga qo

•  Cava me bibi duadua vei luvemu itabagone?

•  Na ivakarau ni lomana

•  Nona itovo ena internet

•  Ka me vakasamataki

 Ka mo kila: E rawa nida bobula ena sala ni veikilai ena internet, e bibi gona mo vukei luvemu me qarauna na levu ni gauna e vakayagataka kina.

 iVakavuvuli vakaivolatabu: “Vakadeitaka na veika era bibi sara.”—Filipai 1:10.

 Vakasamataka mada: Vakacava e vakaleqa tiko nona veimaliwai e vale o luvemu, nona moce, kei na nona ka ni vuli nona dau vakayagataka na sala ni veikilai ena internet? Era kaya na dauvakadidike ni dodonu me ciwa na aua nodra moce na itabagone ena bogi. Ia o ira na vakayagataka e vica vata na aua ena sala ni veikilai ena internet, ena rawa ni lailai mai na vitu na aua nodra moce.

 Ka o rawa ni cakava: Veivosakitaka kei luvemu na ka e dodonu me bibi vua, kei na vuna e ka vakavuku kina me yalana na gauna e vakayagataka ena sala ni veikilai ena internet. Biuta na lawa e ganiti koya, kena vakaraitaki me kua ni dua na talevoni se tablet me tiko ena vanua e moce kina ena bogi. Mo vukei luvemu me lewai koya vinaka, qori na itovo ena yaga vua ni sa uabula.—1 Korinica 9:25.

 Ka mo kila: Ena rawa ni galili qai yalolailai o luvemu ke raica ena internet na kedra itaba rairai vinaka na nona itokani, ra qai cakava tu eso na ka marautaki.

 iVakavuvuli vakaivolatabu: “Biuta laivi . . . na vuvu.”—1 Pita 2:1.

 Vakasamataka mada: Vakacava e sega ni taleitaka o luvemu na kena irairai ni vakayagataka na sala ni veikilai ena internet? E nanuma ni vakavucesa na nona bula ni vakatauvatani kei ira eso tale?

 Ka o rawa ni cakava: Veivosakitaka kei koya na rerevaki ni nona vakatauvatani koya kei na so tale. Mo nanuma tiko nira dau kauaitaka vakalevu na goneyalewa na kedra irairai ni vakatauvatani kei ira na gonetagane. Rawa ni o kaya sara ga vua me kua ni vakayagataka ena so na gauna na internet. E kaya e dua na cauravou o Jacob: “Eso na gauna au dau kauta laivi mai na noqu talevoni eso na porokaramu ni veikilai ena internet. Qori e vukei au meu vakasamataka tale na veika e bibi, kei na noqu rai me baleti au kei ira eso tale.”

 Ka mo kila: Noda vakayagataka na sala ni veikilai ena internet, e vaka ga era sarava tu na noda bula e levu. Ena rawarawa gona ni basika na duidui, kei na veileti.

 iVakavuvuli vakaivolatabu: “Me kau tani vei kemuni na yaloca, na cudrucudru, na yalokatakata, na karakara, na vosavakacaca . . . Moni veilomani.”—Efeso 4:31, 32.

 Vakasamataka mada: Vakacava sa okati tu o luvemu ena kakase, veileti se vosavakacaca ena nona vakayagataka na sala ni veikilai ena internet?

 Ka o rawa ni cakava: Vukei koya me vinaka tiko ga na nona itovo ni vakayagataka na internet. E tukuni ena ivola na Digital Kids: “E noda itavi sara ga na itubutubu meda vakavulici ira na luveda ni sega ni dodonu mera yalocataka e dua ena internet, se vanua cava ga.”

 Nanuma tiko e sega ni bibi sara na sala ni veikilai ena internet. E sega ni levu tale ga na itubutubu era vakatarai luvedra mera vakayagataka qori. Ia ke o vakatara me vakayagataka o luvemu na sala ni veikilai ena internet, mo vakadeitaka ni na rawa ni yalana na gauna e vakayagataka kina. Ena bucina na veitokani vinaka, qai sega ni sarava kina na iyaloyalo vakasisila.