Dua na gauna balavu nodra vinakata na dauveisele e dua na mataqali drega me veivuke ena gauna ni veisele, me mavo totolo tale ga kina na yago. Levu na drega e tu nikua e sega ni rawa ni vakayagataki ena gacagaca ni yago. Na vuna? Eso era gaga, sega ni kaukaua, sega tale ga ni kabi rawa ena vanua suasua. Ia era dikeva na saenitisi, na drega kabikabi ni bosucu a e rawa ni walia qori.

 Vakasamataka mada: Ni vakarerei na bosucu, ena drodro tani mai yagona e dua na wai weliwelia e vaka na drega kabikabi. Qori ena vukea me kabi dei ena draunikau suasua, taqomaki koya, qai vakalaiva me veimoiyaka na yagona.

 Era raica na dauvakadidike ni tiko e vica na ka e kabikabi kina na drega qori. Kena ivakaraitaki, e tiko kina na wainimate kei na dua na mataqali wai e kabikabi. Qori e vukea na bosucu me kabi dei ena vanua e toka kina. Ke kau laivi mada ga, na drega qori ena vakalesui koya tale ena vanua ga e tiko kina. Era bulia kina na dauvakadidike e dua na drega e kaukaua cake me vakayagataki ena veisele, me kabi dei tale ga ena gacagaca ni yago. Me vaka ga nodra “kabi vata na sui kei na sui malumu, qori tale ga na ka e cakava na drega kabikabi ni bosucu ina gacagaca.”

 Era kaya na kenadau ni na yaga vakalevu na drega qori ena veisele me isosomi ni kena dau culai na yago. E rawa tale ga ni vakavinakataka na sui malumu, se vakarawarawataka na vakayagataki ni misini ena yago. Sa vakayagataki tale ga na drega qori me vakavinakataka na uto ni vuaka, kei na yate ni kalavo.

 Era dikeva na saenitisi na iwali vinaka duadua ni leqa, oya na noda kila na veika buli era tu wavoliti keda. E kaya kina o Donald Ingber, e dairekita ena dua na koronivuli torocake era bulia e dua na drega kabikabi: “E vakatau sara ga ena ka o raica qai saga mo kila na ka vinaka e rawa ni cakava.”

 Cava o nanuma? E buli se bula vakaidewadewa na drega kabikabi ni bosucu?