“Ni sega ni dredre vua na Kalou me vakayacora nona vosa.”—Luke 1:37, iVakadewa ni Vuravura Vou.

 “Ni na sega ni dredre vua na Kalou e dua na ka.”—Luke 1:37, King James Version.

 E rawa vua na Kalou Kaukaua Duadua me cakava na ka eda sega ni rawata mai na rai vakatamata. E sega ni dua na ka e rawa ni tarova nona vakayacora na ka e tukuna se yalataka.

 Na vosa taumada “vakayacora” e rawa ni vakaibalebaletaka e dua na “vosa” se ka e “tukuni.” Ia na tikinivolatabu qori e vakaibalebaletaka na ka e tukuna na Kalou o Jiova, a kei na kena yaco na ka e tukuna. E dau yaco dina na ka e tukuna na Kalou, na Luke 1:37 e rawa tale ga ni vakadewataki: “E sega vakadua ni daro na yalayala ni Kalou,” se “E sega ni dua na ka e dredre vua na Kalou.” Na vakadewa taumada ni vosa vaKirisi e vakavotuya na ka dina qo: Ena yaco na ka e tukuna se yalataka na Kalou ni sega ni dua na ka e dredre vua.—Aisea 55:10, 11.

 E laurai vakalevu ena iVolatabu na matavosa va qori me baleta nona yalayala na Kalou. Kena ivakaraitaki, e vakayagataka o Jiova nona agilosi me tukuna ni o Sera na wati Eparama ena vakaluveni ni sa itabaqase. E kaya tale na Kalou: “E dua na ka e dredre vei Jiova?” (Vakatekivu 18:13, 14) Ni oti nona vakasamataka na peteriaki o Jope na ibulibuli ni Kalou, e kaya: “E sega...ni dredre moni cakava na ka oni vakasamataka.” (Jope 42:2) Era kauai na imuri i Jisu ena sala mera rawata kina na ivakatagedegede ni Kalou mera vakabulai, ia e vakadeitaka o Jisu vei ira ni “rawarawa vua na Kalou na ka kece.”—Maciu 19:25, 26. b

 Na agilosi o Keperieli a cavuta na vosa ena Luke 1:37 vua na goneyalewa Jiu o Meri. E kaya vua ni na vakasucuma na “Luvei koya e Cecere Duadua”, qai “vakayacani koya o Jisu.” Ena yaco me Tui ni Matanitu ni Kalou qai veiliutaki me tawamudu.—Luke 1:26-33; Vakatakila 11:15.

 E lomatarotarotaka qori o Meri ni se sega ni vakawati, e ‘sega tale ga ni se veiyacovi kei na dua na tagane.’ (Luke 1:34, 35) Ia e kaya vua o Keperieli ni Kalou ena vakayagataka nona yalo tabu se igu kaukaua. Na gauna qori o Jisu e luve vakayalo ni Kalou mai lomalagi, sa qai vakayagataka o Jiova nona yalo tabu me tokitaka na bula i Luvena mai lomalagi ina katonigone i Meri. (Joni 1:14; Filipai 2:5-7) E veivakurabuitaki nona bukete o Meri. Me rawa ni vaqaqacotaki nona vakabauta na kaukaua ni Kalou, e kaya na agilosi vua ni dua na wekana o Ilisapeci sa “kenamarama” e bukete tiko. A sega ni rawa ni vakaluveni o Ilisapeci na wati Sakaraia. (Luke 1:36) Ia e qai sucu na luvedrau tagane e vakatokai o Joni na Dauveipapitaisotaki, a parofisaitaka tale ga o Jiova na nona cakacaka vakaitalatala.—Luke 1:10-16; 3:1-6.

 Nona cavuta na agilosi o Keperieli na vosa ena Luke 1:37, de dua a vakasamataki rau tiko o Meri kei Ilisapeci. Na veika vata ga e tukuna qori e vakadeitaka vei ira na dauveiqaravi i Jiova nikua ni na vakayacora tiko ga o Jiova na nona vosa ni yalayala. Qori e okati kina nona yalayala ni na sosomitaka na matanitu vakatamata na veiliutaki dodonu i Luvena o Jisu Karisito, na Tui ni Matanitu ni Kalou.—Taniela 2:44; 7:13, 14.

 Sarava na ivakamacala lekaleka ni ivola na Luke.