E tukuni ena iVolatabu ni qori e isolisoli ni Kalou vei rau na veiwatini. E buli keda “na tagane kei na yalewa” qai raica na veika e bulia ni sa bau “totoka dina.” (Vakatekivu 1:​27, 31) Ni kauti rau mai na imatai ni tagane kei na yalewa na Kalou me rau vakamau, e kaya ni rau sa na “lewe dua ga.” (Vakatekivu 2:​24) Qo e okati kina na marautaki ni veiyacovi kei na nodrau veivolekati na veiwatini.

 E vakamacalataki ena iVolatabu na marau e vakila na tagane vakawati: “Mo marautaka mada ga na yalewa o vakawatitaka mai na gauna o se cauravou kina . . . Me vakamarautaki iko mada ga na sucuna ena veigauna. Me rawai iko tiko ga na nona dodomo.” (Vosa Vakaibalebale 5:​18, 19) E inaki ni Kalou me marau tale ga na yalewa vakawati. E kaya na iVolatabu: “Na tagane vakawati kei watina me rau vakaceguya nodrau dui gagadre ni veiyacovi.”​—1 Korinica 7:3, God’s Word Bible.

E vakadonui ga vei ira na vakawati

 Na Kalou e vakatara ga na veiyacovi vei ira na vakawati, e tukuna na Iperiu 13:4: “Meda rokova kece na vakawati, me kua tale ga ni vakadukadukalitaki na imocemoce ni vakawati, ni na lewai ira na dau veiyacovi tawadodonu kei ira na veibutakoci na Kalou.” Mera dei tiko ga na veiwatini ena nodra veidinadinati ni vakawati. Era na marau vakalevu nira muria na ivakavuvuli vakaivolatabu: “E marau vakalevu o koya e solia na ka, vakalailai o koya e taura na ka.”​—Cakacaka 20:35.