E vakarota na iVolatabu meda kua ni taura na dra. Eda na sega gona ni taura na dra se dua na kena iwasewase lelevu, oya me laukana se vakacurumi i yagoda. Wilika mada e vica na tikinivolatabu qo:

•   Vakatekivu 9:4. E vakadonuya na Kalou me ratou kania na lewenimanumanu o Noa kei na nona vuvale ni oti na Waluvu, ia e vakarota me ratou kua ni kania na dra. E kaya na Kalou vei Noa: ‘Na lewena ga e tiko kina na vu ni bula, io na kena dra, dou kua ni kania.’ Na ivakaro qo e vauci ira kece na bula ena gauna ya me yacova mai qo nida kawa kece nei Noa.

•   Vunau ni Soro 17:14. “Moni kua ni kania na dra ni kabula kece, ni tiko ena dra na bula ni veimataqali kabula kece ga. Ena muduki laivi o koya e kania.” E raica na Kalou ni tiko ena dra na bula, e nona. A soli duadua ga na lawa qo ina matanitu o Isireli, e vakaraitaka ni raica vakabibi na Kalou na lawa ni kena vakatabui me laukana.

•   Cakacaka 15:20. “Me tabu . . . na dra.” E vakaroti ira na lotu vaKarisito na Kalou ena ivakaro vata ga e vakaroti Noa kina. E vakaraitaka na ivolatukutuku nira sega ni vakadonuya na lotu vaKarisito taumada mera kania na dra se vakayagataka ena veiqaravi vakavuniwai.

Na cava e vakaroti keda kina na Kalou me tabu na dra?

 E tiko na vuna vinaka vakavuniwai meda kua ni taura kina na dra. E bibi sara ni vakarota na Kalou me tabu na dra, ni ka tabu vua na ka e vakatakarakarataka.—Vunau ni Soro 17:11; Kolosa 1:20.