E Vakavulica na iVolatabu Nida na Dewa ina Dua Tale na Bula?

SARAVA/ROGOCA

Kena isau vakaivolatabu

Sega. E sega ni laurai vakadua ena iVolatabu na vakasama nida na “dewa ina dua tale na bula.” Na vakabauta qori e yavutaki ena ivakavuvuli ni bula tiko e dua na ka ni mate e dua. a Ia e tukuna na iVolatabu ni a buli na tamata mai na qele, gauna e mate kina e sega tale ni bula tiko na yalona. (Vakatekivu 2:7; Isikeli 18:4) Ni mate e dua, ena sega tale ni bula tiko vua e dua na ka.—Vakatekivu 3:19; Dauvunau 9:5, 6.

Na cava na kedrau duidui na noda dewa ina dua tale na bula kei na veivakaturi?

Na ivakavuvuli vakaivolatabu ni veivakaturi e sega ni yavutaki ena ivakavuvuli ni bula tiko e dua na ka ena gauna e mate kina e dua. Ena vakayagataka na Kalou nona kaukaua me vakabulai ira tale na mate ena gauna ni veivakaturi. (Maciu 22:23, 29; Cakacaka 24:15) Na veivakaturi e vakarautaka na inuinui totoka ni kena vakalesui mai na vuravura vou ena sega kina na mate.—2 Pita 3:13; Vakatakila 21:3, 4.

Na rai cala ni ivakavuvuli qo kei na ka e kaya na iVolatabu

Rai cala: E kaya na iVolatabu ni dewa o Ilaija me o Joni na Dauveipapitaisotaki.

Ka Dina: Sa tukuna tu mai na Kalou: “Au sa talai Ilaija yani na parofita vei kemuni.” O cei e qai vakayacora na parofisai qo? E tukuna o Jisu ni o Joni na Dauveipapitaisotaki. (Malakai 4:5, 6; Maciu 11:13, 14) E sega ni kena ibalebale qori ni dewa na bula i Ilaija me lai Joni na Dauveipapitaisotaki. E tukuna mada ga vakadodonu o Joni ni sega ni o Ilaija o koya. (Joni 1:21) Ia e cakava o Joni na cakacaka vata ga e cakava o Ilaija. Qori na kena kacivaki na itukutuku ni Kalou me baleta na veivutuni. (1 Tui 18:36, 37; Maciu 3:1) E vakaraitaka tale ga o Joni ni “kaukaua qai qaqa me vakataki Ilaija.”—Luke 1:13-17, Good News Translation.

Rai cala: Na iVolatabu e dusia na nona dewa e dua ina dua tale na bula me “sucu tale.”

Ka Dina: E vakaraitaka na iVolatabu ni nona sucu tale e dua e dusia nona sucu vakayalo, ena yaco qori ni se bula tiko. (Joni 1:12, 13) Ena sega ni vakatau na sucu tale qori ena ka e cakava e dua ena gauna sa oti, ia e dusia tiko ga na veivakalougatataki ni Kalou vei ira e duidui na nodra inuinui ena gauna se bera mai.—Joni 3:3; 1 Pita 1:3, 4.

a E yavutaki ena ivakavuvuli makawa vakaPapiloni na vakabauta ni bula tale tiko na yalo, kei na nona lai dewa ina dua tale na bula o koya sa mate. Era mani tauyavutaka kina na vuku mai Idia na ivakavuvuli na Karma. E vakamacalataki ena Britannica Encyclopedia of World Religions, ni ivakavuvuli ni Karma oya na “nomu ivakarau ni bula ena gauna qo ena vakatau kina na mataqali bula o na sucu tale kina.”—Tabana 913.