E vakamacalataka na iVolatabu ni veika e yaco tu nikua, na ituvaki kei na nodra itovo e levu e ivakatakilakila ni “ivakataotioti ni veika vakavuravura,” se “na ivakataotioti kei vuravura.” (Maciu 24:3; King James Version) E vakatoka na iVolatabu na gauna qori me “iotioti ni veisiga,” se “gauna ni icavacava.”—2 Timoci 3:1; Taniela 8:19; Easy-to-Read Version.

 E parofisaitaka na iVolatabu ni na yaco e levu na ka ena dua ga na gauna. Qori na “ivakatakilakila” ni otioti ni veisiga. (Luke 21:7) Dikeva mada qo eso na kena ivakaraitaki:

 Veivaluvaluti ena levu na vanua. E parofisaitaka o Jisu: “Era na veivaluvaluti na veivanua kei na veimatanitu.” (Maciu 24:7) E parofisaitaka tale ga na Vakatakila 6:4 e dua na dauvodo ose ivakatakarakara, e dusia na ivalu ena “kauta tani na sautu e vuravura.”

 Dausiga. E kaya o Jisu: “Ena vakilai na leqa ni kakana.” (Maciu 24:7) E parofisaitaka tale ga na Vakatakila e dua na dauvodo ose ivakatakarakara, e dusia na dausiga ena tarai vuravura.—Vakatakila 6:5, 6.

 Uneune lelevu. E kaya o Jisu ni na “yaco na uneune ena levu na vanua.” (Maciu 24:7; Luke 21:11) Ena vakavuna na rarawa, kei na mate ena ivakatagedegede e duatani sara.

 Tauvimate. E kaya o Jisu ni na veitauvi na matedewa, se “mate rerevaki.”—Luke 21:11, Contemporary English Version.

 Basulawa. Vica vata na senitiuri na kena yaco tiko na basulawa, qori sara ga na ka e kaya o Jisu ena “tubu na ivalavala tawadodonu” ena iotioti ni veisiga.—Maciu 24:12.

 Vakarusai tiko na vuravura. E kaya na Vakatakila 11:18 nira na “vakarusai vuravura tiko” na kawatamata. E levu na sala era na cakava kina qori me vaka na itovo kaukaua, cakacaka vakailawaki kei na nodra vakacacana na veika bula.

 Torosobu na itovo ni tamata. E kaya na iVolatabu ena 2 Timoci 3:1-4, ni levu era na “sega ni dau vakavinavinaka, era na sega ni yalodina, . . . era na sega ni via okati ena dua na veiyalayalati, era na dau vakauvosa, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veiliumuritaki, era na domoqa, era na dokadoka.” Na ca ni nodra itovo e tukuni kina ni na “duatani sara na iotioti ni veisiga.”

 Sega na veilomani ena vuvale. E kaya na 2 Timoci 3:2, 3, ni levu “sa na yali vei ira na veilomani vakaveiwekani.” Era na “talaidredre” tale ga na gone “vei ira nodra itubutubu.”

 Sega ni lomana na Kalou. E kaya o Jisu: “Ena batabata na nodra loloma e levu.” (Maciu 24:12) E vakaibalebaletaka tiko o Jisu ni levu era na sega ni lomana na Kalou. Qori tale ga na ka e tukuna na 2 Timoci 3:4, “era na lomana ga na marau era sega ni lomana na Kalou” ena iotioti ni veisiga qo.

 Veivakaisini na sokalou. E kaya na 2 Timoci 3:5, e vakarairai nodra qarava na Kalou, ra qai sega ni muria nona ivakatagedegede.

 Vakalevutaki na kilaka vakaivolatabu. E parofisaitaki ena ivola na Taniela ni na vakalevutaki na kilaka dodonu vakaivolatabu ena “gauna ni icavacava.” E okati kina na noda kila vinaka na veiparofisai qori.—Taniela 12:4, ivakamacala e ra.

 Cakacaka vakavunau e veiyasa i vuravura. E kaya o Jisu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura.”—Maciu 24:14.

 Levu era na sega ni kauai qai dau veivakalialiai. E kaya o Jisu e levu era na sega ni kauaitaka na ivakatakilakila ni sa voleka na icavacava. (Maciu 24:37-39) E kaya tale ga na 2 Pita 3:3, 4 ni so ena ka ni lasa vei ira ni tukuni sa voleka na icavacava, se era na sega sara ga ni vakabauta.

 Vakayacori na parofisai kece. E kaya o Jisu ni na yaco vata ga ena dua na gauna na parofisai kece qori ena iotioti ni veisiga.—Maciu 24:33.

 Io. Na ituvaki ni vuravura kei na ituvatuva ni gauna ena iVolatabu, e dusia ni tekivu na iotioti ni veisiga ena 1914. Qori na yabaki a yaco kina na iMatai ni Valu Levu. Sarava na vidio qo mo raica kina ni vakadinadinataki ena ituvaki kei vuravura nida sa bula tu ena iotioti ni veisiga:

 E tekivu veiliutaki na Matanitu ni Kalou mai lomalagi ena 1914. Na imatai sara ga ni ka e cakava e kolotaki Setani na Tevoro, kei ira na timoni mai lomalagi. Ena vakilai ga e vuravura na ka e cakava o Setani. (Vakatakila 12:7-12) Na nona veivakamuai e lai ca kina na nodra itovo e levu kei na ka era cakava, qori e dusia ni na “duatani sara na iotioti ni veisiga.”—2 Timoci 3:1.

 E levu era nuiqawaqawataka na dredre e vakilai ena iotioti ni veisiga. Sa sega ni vakilai na bula veiyaloni. Eso era rerevaka nira na veivakarusai ga vakai ira na tamata ena gauna se bera mai.

 Eso tale era nuiqawaqawataka na ituvaki kei vuravura, ia era nuitaka tu na veika totoka ena gauna se bera mai. Era nuidei ni sa voleka na gauna me vakaotia kina na Matanitu ni Kalou na leqa e tarai vuravura tu. (Taniela 2:44; Vakatakila 21:3, 4) Era vosota tiko me yacova na gauna ena vakayacora kina na Kalou na nona yalayala. E vakacegui ira tale ga na vosa i Jisu: “O koya e vosota me yacova na icavacava ena vakabulai.”—Maciu 24:13; Maika 7:7.