E Cavuti ena iVolatabu na Puregatorio?

SARAVA/ROGOCA

Kena isau vakaivolatabu

E sega ni bau cavuti ena iVolatabu na vosa “puregatorio,” e sega tale ga ni tukuni kina ni lai vakasavasavataki e puregatorio na yalodra na sa mate. * E veisaqasaqa kei na ka e kaya na iVolatabu me baleta na ivalavala ca kei na mate na ivakavuvuli ni puregatorio. Raica mada eso na kena ivakaraitaki.

E vakasavasavataki na ivalavala ca ena vuku ni dra i Jisu, sega ni lai caka ya ena dua na vanua e vakatokai me o puregatorio. E kaya na iVolatabu ni ‘vakasavasavataki keda mai na noda ivalavala ca kece na dra i Jisu na luve ni Kalou. E kaya tale ga ni “o Jisu Karisito . . . e sereki keda mai na noda ivalavala ca ena nona dra.” (1 Joni 1:7; Vakatakila 1:5, New American Bible) A solia o Jisu “na nona bula me kedra ivoli e levu,” me vosoti kina na nodra ivalavala ca.—Maciu 20:28, NAB.
Era sega ni kila e dua na ka o ira na sa mate. “Era kila o ira na bula nira na mate, ia o ira na mate era sega ni kila e dua na ka.” (Dauvunau 9:5, NAB) Ni sa sega ni vakila e dua na ka o koya sa mate, e sega ni rawa ni lai vakasavasavataki ena bukawaqa e puregatorio.
Ni sa mate e dua, ena sega ni totogitaki tale ena vuku ni nona cala. E kaya na iVolatabu ni “isau ni ivalavala ca na mate,” e kaya tale ga ni “sa bokoci nona ivalavala ca o koya sa mate.” (Roma 6:7, 23, NAB) Na nona ivalavala ca e dua e kena itotogi kece ga na mate.

E vu mai vei na ivakavuvuli ni puregatorio?

Era vakabauta na kai Kirisi ena gauna makawa na Libo (itikotiko ni yalo ni gone matedole sega ni papitaiso) kei na puregatorio. E kaya o Clement mai Alexandria ni rawa ni vakasavasavataki ena bukawaqa nodra ivalavala ca o ira na sa mate. E yavutaki na vakasama qori ena nodra ivakavuvuli na kai Kirisi. Ia e vakamacalataka na ivola The History of Christian Doctrines ni kaya sara ga na tui tabu o Gregory na Ka Levu ni dodonu me vakabauti ni veivakasavasavataki na bukawaqa e puregatorio. E kaya tale ga na ivola qori ni o Gregory a tui tabu ena 590 ina 604 G.V., “e dau kilai tu me ‘o koya a tauyavutaka na ivakavuvuli ni puregatorio.’” A vakamacalataki ena bose ni lotu e Lyons (1274), Florence (1439), qai lai vakadeitaki tale ena bose ni lotu e Trent ena 1547 ni sa ciqomi me dua na ivakavuvuli ni Katolika na puregatorio.

^ para. 3 E kaya na ivola Orpheus: A General History of Religions, “ni sega ni bau tukuni ena Kosipeli” e dua na ka me baleti puregatorio. E kaya tale ga na ivola na New Catholic Encyclopedia: “Ni dikevi kece na kena ivakamacala, na ivakavuvuli ni Katolika me baleta na puregatorio e dua ga na ka sa vakabauti dede tu mai, e sega ni yavutaki ena iVolatabu.”—Second Edition, Volume 11, tabana e 825.

^ para. 8 Raica na ivola na New Catholic Encyclopedia, Second Edition, Volume 11, tabana e 824.