E iVakadinadina i Jiova o Daiane, qai cakacaka vakaitalatala vakatabakidua e Brazil. Dua na siga e vunau ena talevoni vua e dua na veiwatini, rau mani tataleitaki. Rau kaya sara vei Daiane ni rau na toki ena dua na koro e toka vakayawa, e sega kina na livaliva, na internet, e sega tale ga ni dua na tacida e tiko i kea. Rau mani solia vua na naba ni talevoni ni lewenivanua e tiko ena koro me rawa ni tomani tiko ga nodratou veitalanoa ena iVolatabu. Ratou tuvanaka sara na siga kei na gauna me ratou dau veitalanoa kina.

 Na gauna kece e qiri kina o Daiane rau na sauma mai na veiwatini! Ena rua tale na macawa e tarava, sa tomani rau tale ga na veiwatini e le tolu tale.

 Oti qori rau sa sega ni sauma mai na qiri na veiwatini. Ia e sega ni yalolailai o Daiane, e qiri tiko ga ena talevoni qori vakatolu e veimacawa. O koya ga e sauma mai na talevoni sa dau vunau sara kina o Daiane. E tauyavutaka kina e vica vata na vuli iVolatabu ena koro ya.

 Dua na siga e caka vuli iVolatabu tiko ena talevoni o Daiane kei watina vua e dua na cauravou. A rogoca sara e dua na italatala ni lotu ena koro na nodratou veitalanoa. E mani lai duri e yasai cauravou me rogoca vinaka na ka ratou veivosakitaka tiko. E kerea sara na italatala me vosa vei rau na veiwatini. E kaya vei rau ni taleitaka na ka e rogoca, e vinakata tale ga me vulica na iVolatabu!

 Toso na gauna, rau sa veivakavulici tiko ena talevoni qori o Daiane kei watina vei ratou e le ono na vuli iVolatabu, wili kina na italatala ni lotu. Eso nodrau vuli iVolatabu sa tiko ena soqoni ni ratou sema ena talevoni ni lewenivanua. Dua vei ratou qori e cakava sara ga na idabedabe me ratou dabe kina ena gauna ni vuli.

 Rau vakavinavinakataka o Daiane kei watina ni rawa ni rau wasea na itukutuku ni Matanitu ni Kalou ena koro tu yawa qo. E kaya o Daiane, “O Jiova ena raica me vunautaki na itukutuku vinaka vei ira na tamata kece, se mani vacava na yawa ni vanua era tiko kina.”