O Desicar e dua na tacida yalewa itubutubu le dua e tiko e Venezuela na vanua e vakilai vakalevu kina na leqa vakailavo. E via vakarabailevutaka nona cakacaka vakaitalatala me painia tudei. Dua na ka nona marau, ia na gauna sara ga me painia kina e veitauvi tale ga na matedewa na COVID-19.

 E dredre vua me muria eso na iwalewale vou ni vunau ena gauna ni matedewa. Kena ivakaraitaki, e ka ni sasaga me vunau ni vola ivola. E sega ni rawa tale ga ni vakayagataka na internet ena cakacaka vakavunau ni sa rui saulevu ena nona yasayasa. E kaya: “Dua na ka noqu yalolailai, e sega ni levu kina na gauna au vakayagataka ena cakacaka vakavunau. Au nanuma ni sa sega ni yaga noqu painia.”

 Ena Janueri 2021, e vakadonuya na valenivolavola ni tabana ni iVakadinadina i Jiova e Venezuela me tuvanaki na cakacaka vakavunau lavotaki. E mani vakarautaki e rauta ni 60 na siteseni ni retio kei na 7 na porokaramu ni tivi, me kaburaka eso na ivunau vakaivolatabu ena lima na muanimacawa ni vula ya. Era uqeti na tacida mera sureti ira na tataleitaki mera rogoca qai sarava na ivunau. E vakarautaka tale ga na valenivolavola ni tabana na taro kei na tikinivolatabu ena ivunau yadua. Ra qai vakayagataka qori na tacida nira vunau ena talevoni se vola ivola. E veiuqeti tale ga na valenivolavola ni tabana mera vunau na tacida nira vakauitukutuku ena talevoni. Qori na iwalewale vou ni vunau era vakayagataka e levu na mataveitacini e Venezuela.

 E marautaka o Desicar me vakaitavi ena cakacaka vakavunau lavotaki qori. Ia e se bera vakadua ni vunau ni vakauitukutuku ena talevoni, e mani nanuma me tovolea mada. E vinakati gona e dua me vukei koya, e kaya: “Au sega ni kila vinaka na vakayagataki ni iyaya vakalivaliva.” E mani kerei luvena me vakavulici koya. E totolo ga nona kila o Desicar na kena icakacaka, e vakaitavi sara ena vunau lavotaki.

 Nona vakayagataka o Desicar na iwalewale qori e sureti ira kina e levu mera rogoca na ivunau e katoni. E sega vakadua ni tadra ni levu era na ciqoma nona veisureti mera rogoca na ivunau qai levu na nodra taro. Eso era sega ni sema yani, ia era kerei Desicar me vakamacalataka vei ira na ivunau. E kaya: “Au wasea vei ira na veika au vakavola ena gauna ni soqo. Se qai vakadua me sivia ni 5 na noqu veisikovi lesu ena dua na vula, ni mai cava na cakacaka vakavunau lavotaki sa 112 noqu veisikovi lesu!” a

 A sureti tuakana tale ga o Desicar rau tiko veitikivi me rogoca na ivunau ena retio. E kaya. “Au kidacala ni ciqoma noqu veisureti. Ena walu na kaloko ena veimataka ni Sigatabu, au na gole i nona vale me keirau lai rogoca vata na ivunau. E levu na nona taro ena gauna e caka tiko kina na porokaramu kei na gauna e oti kina.” A tiko tale ga o tuakana ena iVakananumi ni Mate i Jisu ni sema ena internet. E vakadonuya tale ga me vakayagataka o Desicar na nona internet ena cakacaka vakavunau.

 E kaya o Desicar: “Au vakavinavinakataki Jiova vakalevu, kei ira na qase ni ivavakoso ena nodra vakayaloqaqataki au. Era vukei au meu marautaka tale noqu cakacaka vakavunau.” (Jeremaia 15:16) E se painia tiko ga o Desicar qai vakavulici ira na tataleitaki a vunau kina ena talevoni.