Ratou vunau tiko ena qiqi o Osman, na watina, kei na luvedrau yalewa ena yasa ni dua na vanua ni veibulu e Chile. E vakasauri ga ra sa basika yani e dua na ilala levu mera lai veibulu, qai rogo levu na nodra ivakatagi. Eso era kilalecataki Osman me nodra italatala. Era nanuma ni lai vunau yani ena veibulu o Osman, era mani lako vua ra qai kaya, “iTalatala, vinaka vakalevu na yaco totolo mai keimami namaki iko sara tiko ga!”

 E saga o Osman me vakamacalataka vei ira ni sega ni nodra italatala, ia na levu ni nodra sosa era sega ni rogoci koya rawa. Era mani gole ena ibulubulu, oti e vica na miniti ratou lesu eso qai kaya vei Osman, “iTalatala, keimami sa waraki iko tiko.”

 Ni sa via rogo lailai na sosa sa qai vakamacalataki koya o Osman, kei na vuna e tiko kina e kea. Ratou cudru sara ga ni sega ni lako yani na nodra italatala, ratou mani kerei Osman, “Rawa ni o tukuna e vica na ka mai na iVolatabu?” E vakadonuya sara o Osman.

 Ni ratou gole tiko ena ibulubulu e tarogi ratou o Osman eso na ka me baleti koya e mate. E vakasamataka tale ga eso na tikinivolatabu me na vakamacalataka. Ni ratou yaco ena vanua ni veibulu, e vakamacalataki koya sara vei ira na tiko e kea. E kaya tale ga ni dua na iVakadinadina i Jiova, qai vakaitavi ena vunautaki ni itukutuku vinaka vei ira na tamata kece.

 Oti sa qai vakamacalataka o Osman na Vakatakila 21:3, 4 kei na Joni 5:28, 29, ni sega ni nona inaki na Kalou meda mate na kawatamata. E kaya tale ga ni na vakarau vakaturi ira na mate na Kalou, ena rawa tale ga nira bula tawamudu e vuravura. Oti nona vakamacala, e levu era mokoti koya, ra qai vakavinavinakataka na nona “itukutuku vinaka mai vei Jiova.” Oti e lesu tale o Osman ina qiqi.

 Ni oti na veibulu eso era lesu ina qiqi, ra qai tarogi ratou o Osman na taro me baleta na iVolatabu. E balavu na nodra veitalanoa, qai voleka nira kauta kece na ivola vakaivolatabu e tu ena qiqi ena gauna era biubiu kina.