EPERELI 8, 2024
RUSIA

Tokoni Ratou tu ga o Jiova

SARAVA/ROGOCA

Ena vakarau tauca na mataveilewai na Novocherkassk City Court of the Rostov Region e Rusia, na lewa me baleti Sister Lyubov Galitsyna, Brother Garegin Khachaturyan, kei Brother Gevorg Yeritsyan. E se bera ni kerea na dauveibeitaki na kedratou itotogi.

Kedratou iTukutuku

Lyubov Galitsyna

Sucu: 1959 (Plastunovskaya, Yasayasa o Krasnodar)

Me baleti koya: A idinia tu ena dua na kabani, ia sa cegu mai ena nona cakacaka

E taleitaka me vulica na iVolatabu ni oti nona kila na inuinui ni bula ena sega kina na tauvimate kei na mate. Papitaiso me iVakadinadina i Jiova ena 1995

Takali o watina ena 2015

Ka e Tukuna

Sala cava e vukei iko kina o Jiova ena dua na yabaki, va na vula o vesu tu kina?

E sega ni rawarawa na vesu tu kei ira na dau vakayagataki wainimategaga, daubutako kei ira na daubasulawa voravora. E levu na gauna au lomabibi. Ena so gauna au na masu vei Jiova ena bogi taucoko me vakaraitaka vei au na sala meu vosota kina na ituvaki au sotava. E sivia ni le 25 na tamata era veiveisau ga ena noqu sela ena gauna au vesu tu kina. Ia nona veivuke o Jiova e rawa niu veimaliwai vinaka kina kei ira kece. Na ituvaki tale ga qo e vukei au meu kila qai vakavinakataka na noqu malumalumu. Au vakavinavinakataka tale ga ni rawa kina meu vakavinakataka na noqu itovo vaKarisito.

Garegin Khachaturyan

Sucu: 1967 (Azerbaijan)

Me baleti koya: E cakacaka vakamatai. A tu mai Poladi kei Jamani, oti sa qai toki e Rusia ena 1995

E qoroya na donu ni veika e volai ena iVolatabu, kei na yaga ni kena ivakavuvuli. Papitaiso ena 1994

Rau vakamau kei Kseniya ena 2008. E dua na luvedrau tagane

Ka e Tukuna o Kseniya na Wati Garegin a

Cava e vukei kemudrau vakaveiwatini mo drau vosota?

Qo na ka e vola mai vei au Garegin: “Au vakavinavinakataki Jiova ena nona veitokoni. Au vakayaloqaqataki vakalevu ena ivola era vakauta mai na mataveitacini ena ivavakoso. Au lomavakacegu tale ga niu kila nira tokoni iko tiko. Au vakila niu volekati Jiova sara vakalevu.” Au duavata kei na ka e tukuna ya o Garegin. Keirau vakila ni keirau volekati Jiova, kei na nona dau vukei keirau e veisiga.

Dina nira na saga na dauveitusaqati mera vakacacani keda, ia eda nuidei ni o Jiova ena vakalougatataki ira tiko ga nona dauveiqaravi yalodina, ena “tini vinaka” tale ga.—Vakatekivu 50:20.

Veitaravi ni Gauna

Okosita 11, 2022

Tekivu vaqaqai o Lyubov, Garegin, kei Gevorg. Caka na vaqaqara ena nodratou vale. Rau vesu tu vakawawa o Garegin kei Gevorg
Okosita 12, 2022

Kau o Garegin kei Gevorg me rau lai vesu
Okosita 16, 2022

Vesu tu vakawawa o Lyubov
Okosita 17, 2022

Kau o Lyubov me lai vesu
Seviteba 20, 2023

Ratou veilewaitaki
Tiseba 25, 2023

Sere mai o Lyubov qai vakatatabutaki e vale

a b Sa vesu tiko o Brother Khachaturyan kei Brother Yeritsyan ena gauna e vakarautaki kina na ulutaga qo. E sega kina ni rawa ni rau vakatarogi.

Rawa ni o Wilika Tale ga

ITUKUTUKU VOU

Vesu ena Vuku ni Nodra Vakabauta—Rusia

Era vesu ena vuku ni nodra vakabauta na iVakadinadina i Jiova mai Rusia. Vulica na kedra itukutuku, qai tabaka (print) tale ga na lisi ni yacadra kece na iVakadinadina i Jiova era vesu tiko ena gauna qo.

ITUKUTUKU VOU