Nna Wɔma Mo Mbɔdɔm No Biscuit
ƆBARIMBA bi a wɔfrɛ no Nick tse Oregon, U.S.A. Ɔkãa dɛ, “Wɔ March 2014 bosoom no mu hɔ beebi no na mehyɛɛ ase dɛ medze mo mbɔdɔm mba ebien bi rutu mpasar wɔ kurow mu.” Ɔtoaa do dɛ: “Aber biara, nna muhu Jehovah Adasefo no dɛ wogyinagyina hɔn trɔk ho wɔ beebi a hɔ bɔ hyew paa wɔ kurow no mu. Ibohu hɔn biara so nna woesiesie hɔnho kama, na obiara a obotwa mu wɔ hɔ no so, wɔserew kyerɛ no.
“Nna ɔnnyɛ nyimpa a worutwa mu wɔ hɔ no nkotsee na Jehovah Adasefo no serew kyerɛ hɔn, mbom no, nna wɔnye mo mbɔdɔm no so dzi agor. Dza ɔbae nye dɛ, da kor bi, aber a menye mo mbɔdɔm no dur hɔ no, basia bi a ogyina trɔk no ho no maa hɔn biscuit. Nna wɔfrɛ no Elaine. Ofi dɛm da no, nna aber biara a yebodu hɔn nkyɛn no, ebɔhwɛ no nna mo mbɔdɔm no rotwe me kɔ trɔk no ho. Nna wonyim dɛ ɔnyɛ dɛn ara a wobenya biscuit bi awe.
“Nna yedu hɔ biara a, mo mbɔdɔm no kɛgye biscuit, na mo so menye Jehovah Adasefo no bɔ nkɔmbɔ kakra. Iyi kɔr do abosoom kakra. Naaso nna memmpɛ dɛ menye hɔn bɔ nkɔmbɔ kɔ ekyir. Nna medzi abor mfe 70. Afei so, nna mennhyɛ da ara nnyim Jehovah Adasefo hɔn nkyerɛkyerɛ. Nna ɔsom ahorow a wɔkã dɛ wɔyɛ Christianfo no ama me nsa esi famu, ntsi nna muhu dɛ sɛ mankasa metsena me fie sũa Bible no a, oye.
“Merekã yi ara, sɛ nna mefa kurow mu a, muhu Jehovah Adasefo binom so dɛ wogyinagyina hɔn trɔk no ho wɔ mbea afofor. Hɔn nyinara so, ibohu hɔn no, nna hɔn enyim ayɛ sereserew. Sɛ mibisa hɔn asɛm biara so a, na wɔatwe hɔn Bible dze eyi me ano. Dɛm a wɔyɛe no maa mebɛgyee hɔn dzii paa.
“Da kor bi, Elaine bisaa me dɛ, ‘Inyim dɛ mbowa wɔ hɔ yi, wɔyɛ akyɛdze a Nyankopɔn dze ama hɛn a?’ Miyii no ano dɛ, ‘Nyew, megye dzi paa!’ Afei, ɔkenkaan Isaiah 11:6-9 kyerɛɛ me. Ɔwɔ mu dɛ nna memmpɛ dɛ megye nwoma biara fi Adasefo no hɔ kɛkenkan dze, naaso dɛm nkɔmbɔ no a yɛbɔe no maa misii gyinae dɛ mubosũa Bible no akɔ ekyir.
“Ofitsi dɛm aber no rokɔ no, nna ɔyɛ a menye Elaine na no kun Brent bɔ Bible mu nkɔmbɔ. Nna yɛnnkyɛr dze, naaso nna m’enyi gye nkɔmbɔ no ho paa. Wɔkãa kyerɛɛ me dɛ, sɛ mepɛ dɛ muhu ndzɛmba a ɔsɛ dɛ Christiannyi mapa yɛ a, ɔno menkenkan Matthew nkesi Asomafo Ndwuma nwoma no. Megyee too mu dɛ mebɛkenkan, na ampaara, mekenkanee. Ɔno ekyir no, wɔannkyɛr biara na mepeen do dɛ Brent na ne yer Elaine nye me mbosũa Bible no. Iyi kɔr do wɔ June 2016.
“Nna memmfa me Bible adzesua nye asafo nhyiamu a mokɔ no nndzi agor koraa. Ntsi dapɛn biara, nna me yamu a nkyɛ ber aso ma yeesũa adze anaa yɛakɔ Ahendzi Asa do. M’enyi gyee paa dɛ nna murusũa dza Bible no kyerɛkyerɛ no. Iyi ntsi afe kor na abosoom kakra ekyir no, wonumaa me ma mara so mebɛyɛɛ Jehovah Dasefo. Seseiara medzi mfe 79, na meda Jehovah ase paa dɛ ɔama mehu nokwar no. Jehovah ama mabɛka n’ebusua kɛse yi ho. Dɛm nhyira yi dze, murunntum mmfa nntoto biribiara ho!”
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
