Wɔ wiadze nyina no, Jehovah Adasefo wɔ tsintsimbea nkorbata ahorow 15. No mu kor nye nkorbata a ɔwɔ Central Europe no, ɔwɔ Selters wɔ Germany, wɔ bea bi a wɔfrɛ no Steinfels, a dza dzin yi kyerɛ wɔ German kasa mu nye dɛ “Ɔbo Bepɔw.”

Wɔ May 23-25, 2014 no, Central Europe nkorbata no too nsa frɛɛ anyɛnkofo, edwumayɛfo, nye aban mpanyimfo dɛ wɔmbɔhwɛ edwumayɛbea a wɔada no edzi no. Nna wɔato dɛm nhyiamu yi dzin “Mfrenhyia 30 wɔ Selters” osiandɛ wohyiraa dɛm nkorbata yi do wɔ April 21, 1984.

Ahɔho bɔbor 3,000 na wɔbɔhwehwɛɛ edwumayɛbea hɔ. Aban n’ananmusinyi a ɔnye aban no ayɛ edwuma bɛyɛ mfe 30 no kãa dɛ: “Aber biara a mebɛsera Jehovah Adasefo edwumayɛbea nkorbata no, mubu no dɛ adze tsitsir bi.” Ɔdze kãa ho dɛ: “Mbrɛ wowiee edwumayɛbea nkorbata no ho edwuma fi afe 1979 kesi 1984 ntsɛntsɛm wɔ Steinfels no maa moho dwuruuw me.”

Asɛntsir a nna ɔda dza wɔada no edzi no mu kor do nye “Jehovah Nkorɔfo wɔ Central Europe.” Ahɔho no hwehwɛɛ Adasefo a wɔwɔ dɛm bea yi hɔn mfrenhyia 120 ntamu abakɔsɛm mu. Sesei dze, ibotum abɔhwɛ dɛm abakɔsɛm yi aber biara wɔ nkorbata edwumayɛbea hɔ.

Adze fofor a wɔdaa no edzi nye Bible ahorow bi a ɔda nsew, naaso no ho yɛ nã. Dɛ nhwɛdo no, wɔdaa iyinom edzi: German Bible mu no nyina a wodzii kan yɛɛ no afe 1534, nye Elias Hutter’s Polyglot Bible ne fã bi a wɔyɛɛ no afe 1599 a no mu nsɛm no wɔ kasa ahorow 12 mu no. Bio so, video ahorow a woyii kyerɛe, dza wɔhyehyɛe nye ndzɛmba ahorow a wɔdaa no edzi no kyerɛɛ mbrɛ Bible mu ngyinadonsɛm ahorow ho hia ma hɛn ndɛber mu asetsena.

Wɔ aprɔwbɔ ebien bi a ahɔho no ankasa kɔree no mu no, wobohun mbrɛ nyimpa bɔbor 1,000 a wɔtse edwumayɛbea nkorbata hɔ na wɔyɛ edwuma wɔ hɔ no asetsena tse. Wɔ aprɔwbɔ a odzi kan a wɔato dzin “Hɛn Asetsena” (How We Live) no mu no, ahɔho no hwehwɛɛ adan a wɔda mu no mu bi mu. Afei so wodzidzii wɔ edzidzibea hɔ, na wɔbɔɔ aprɔw so wɔ paak no do. Ɔhɔho kor bi kãa dɛ: “Edwumayɛbea hɔ yɛ fɛw ma ɔbor do.”

Wɔ aprɔwbɔ a ɔtɔ do ebien a wɔato dzin “Dza Yɛyɛ” (Production) no mu no, wɔhwehwɛɛ mbea ahorow a wotsintsim nwoma, wɔpam nwoma, na wɔdze mona. Ahɔho no ankasa dze hɔn enyiwa hun mbrɛ wosi tsintsim Bible ho nwoma, wɔpam, na wɔdze mona kɔ aman ahorow 50 do. Ɔbarimba bi kãa dɛ: “Mennsusu ho da dɛ sãana Jehovah Adasefo yɛ wiadze nyina ahyehyɛdze. Hɔn nwoma ahorow nye dza ɔkã ho no du asaase ne mfɛndzanan nyina. Na dɛ wɔdze etuhoakyɛfo yɛ dɛm edwuma yi no yɛ anwanwadze kɛse.”

Adze tsitsir bi a wɔkãa ho asɛm nye jw.org pon a ɔdaa Jehovah Adasefo wɛbsaet edzi no. Mbofra nye mpanyin nyinara hwɛɛ video ahorow nye dza wɔada no edzi no, na wobuaa hɔn nsɛmbisa pii no nyinara so maa hɔn.

Aber a ahɔho no bɛtsee Jehovah Adasefo hɔn wiadze nyina edwuma no ase no, afei hɔn mu pii dze enyigye wiee nserahwɛ no, a woenya ahomka bi wɔ edwuma no mu. Ɔbarimba kor kãa dɛ: “Nna mowɔ adwen ahorow pii wɔ Adasefo no ho a ɔnnyɛ nokwar. Ohia dɛ mesan susu mo nsusui no ho bio.” Basia bi kãa no mpɛn pii dɛ: “Dɛm da yi etu enyimhwɛ ase papaapa.”