NGE mi nga ke fep moan ékôr mang Sangir Besar Indonesia éé ntoo ayôm mimbu, éyong ézing mi nga ye yen bekal bèè belal nsa mang. Be mbe béé tugha be yem ékôr mang té, akal ésèñ minkanghle deba, béé vole bôt a wokh Bible. Ve, tam té, be mbe béé bo ngura aval ésèñ éfe.

Ôsusua, be mbe béé ke ba wulu a mang été naa ba toa bôra mekokh ye zu me nsa mang. Mekokh mézing me mbe menen ane bibuma bi ndama. Akôre ye vèè, binenga beté be mbe béé tobe a boan bibang ayô, éyong té be mbe béé belane be martillos nge ki be marteau naa ba buiñ mekokh meté naa, me bo avitsang ane mekî mekup. Niène ba mane buiñ mekokh meté be furu me alôm été, ye bere ékaza da ke kuiñ é vôm be too. A kôre ye vèè, ba furu mekokh meté é bôra minfakh ba ye dèè é bôra bemetua été ye belane mie akal a long bisala.

Mboo y’été a mbe kal dèè Hulda. Étéñ déñ é nga likh naa, a lôt abuiñ tam naa, a bo éséñ té y’é bôt bevoo. Bebela a ne naa, a mbe é kômô belane mono té naa a dzale mekômgha me y’é nda bôt dzeñ. Ve, tam té, a mbe éé señ ya ngura nsonghane ézing ôsiman. A mbe éé kômô kus tableta naa a belane évole JW Library®. Hulda a mbe éé yem naa, bingengeng y’é mam mefe me ne été, ma ye ñe vole naa a yem songhane ésèñ minkanghle dèñ ye tugha wokh Bible.

Hulda a nga sèñ mewôla mebèñ mekiri mesese ébe ngura ngoan y’étun éé buiñ abuiñ mekokh naa a dzale é boan be bemetua be bele ékalikh a mvus. Asughlan, ane a nga bele abim mono a nga yi naa a kus tableta.

Hulda a nga dzô naa : « Amben me mbe mvoaran ye wokh ñuu mintèñ étom a buiñ mekokh, me nga dzigha vuène minzukh ye mintéñ misese mité, éyong me nga belane nféféñ tableta wom, naa me tugha songhane ésèñ minkanghle dam ye kôman akal bisulan bi y’ékôan. » A nga dzô fe naa tableta té, a nga vole ñe atarga ye môra ôkoan amu bisulane bisese bi mbe bii boban ngalane videoconferencia. Bia vakh ya kal dèè Hulda amu a nga dzale nsonghane wèñ.