Okụk oro ẹbiatde ẹda ẹn̄wana ekọn̄ enyene ndịk!

•   Mbụk n̄kpọntịbe, The Washington Post, eke February 13, 2024 ọdọhọ ete: “Isua oko, ukara ke ofụri ererimbot ẹma ẹbiat se ibede triliọn $2 ke ekọn̄, akananam owo ibiatke utọ okụk emi ke ekọn̄.”

 Edi idịghe okụk ikpọn̄ atak. Se uwụtn̄kpọ kiet mi: Ekọn̄ oro ẹn̄wanade ke Ukraine.

•   Mbonekọn̄. Mme anam-ndụn̄ọde ẹdọhọ ke ibat mbonekọn̄ oro ẹdade unan m̀mê oro ẹwotde ekpere ndisịm 500,000 tọn̄ọ ekọn̄ oro ọkọtọn̄ọ isua iba emi ẹbede.

•   Mbon emi mîdịghe mbonekọn̄. Mbon United Nations ẹdọhọ ke mbon emi ẹkpan̄ade m̀mê ẹdade unan ẹbe 28,000. Edi, akamba owo United Nations ọkọdọhọ ete: “Owo ikemeke ndisiak ibat owo emi ekọn̄ emi owotde, mbon emi ẹdade unan, mbon emi ẹfehede ẹkpọn̄ ufọk ye mme n̄kpọ eken.” a

 Ufen emi mme owo ẹbọde ke ntak ekọn̄ ye en̄wan ke ofụri ererimbot, idịghe se ẹbụkde ẹwụt owo.

•   Miliọn 114. Ibat mbon oro ẹkpọn̄de ufọk mmọ ke ntak ekọn̄ ye afai ke ofụri ererimbot etisịm September 2023.

•   Miliọn 783. Ibat mbon oro mînyeneke udia idia. Mbon World Food Programme ẹdọhọ ẹte: “Ekọn̄ enen̄ede edi ata akpan ntak oro mme owo mînyeneke udia idia, sia n̄kpọ nte owo 7 ke otu owo 10 ke ofụri ererimbot, ẹdụn̄ ke ebiet emi ekọn̄ ye afai ọsọn̄de ubọk.”

 Ndi ekọn̄ eyetre tutu amama? Ndi imekeme ndidori enyịn ke emem oyodu? Ndi oyodu ini emi mme owo mîdibueneke aba, isọn̄ on̄wum nti n̄kpọ se mme owo ẹdia, ndien udia onyụn̄ ekem mme owo ubọk? Nso ke Bible etịn̄?

 Bible ama etetịn̄ ke ẹyen̄wana ekọn̄ ke nsio nsio itie ke ofụri ererimbot, enye akada ekọn̄ emi odomo ye awat enan̄-mbakara emi odorode ke edem enan̄-mbakara.

•   “Ndien enan̄-mbakara efen ọwọrọ edi, ididuot enan̄-mbakara; ndien ẹnọ andidoro enye ke edem odudu ndisio emem mfep ke isọn̄ man mmọ ẹkpewot kiet eken; ẹnyụn̄ ẹnọ enye akwa akan̄kan̄.”​—Ediyarade 6:4.

 Mme awat enan̄-mbakara iba en̄wen ẹtiene awat enan̄-mbakara oro adade aban̄a ekọn̄ do ke edem. Ndien mmọ ẹda ẹban̄a unana udia ye n̄kpa oro idiọk udọn̄ọ ye mme n̄kpọ eken ẹdade ẹdi. (Ediyarade 6:5-8) Edieke oyomde ndikpep n̄kpọ en̄wen mban̄a prọfesi Bible emi, ye ntak emi inen̄erede inịm ke enye ke osu mfịn, kot ibuotikọ emi, “Mmanie Ẹdi Mme Awat Enan̄-Mbakara Inan̄?”

 Idibịghike, owo ididaha inyene ererimbot emi in̄wana ekọn̄ aba. Edi idịghe mme owo ẹdinam emi etịbe. Bible ọdọhọ ete:

•   Abasi ayanam “ekọn̄ etre tutu esịm utịt isọn̄.”​—Psalm 46:9.

•   Abasi eyetre ofụri mfịna oro ekọn̄ esidade edi. “Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”​—Ediyarade 21:4.

•   Abasi ayanam kpukpru owo ẹnyene emem ke nsinsi. “Ndien ikọt mi ẹyedụn̄ ke ebietidụn̄ emem ye ke ebiet ifụre ye ke ebiet nduọkodudu emi anade sụn̄.”​—Isaiah 32:18.

 Prọfesi Bible owụt ke ekọn̄ ye mme n̄kpọ eken oro ẹtịbede mfịn anam ẹkụt ke ini emi idinyenede emem enen̄ede ekpere.

 Didie ke Abasi edinam inyene emem emi? Enye edida Obio Ubọn̄ esie m̀mê ukara esie eke heaven inam oro. (Matthew 6:10) Edieke oyomde ndidiọn̄ọ se Obio Ubọn̄ emi edide ye se enye edinamde inọ fi, se ekpri vidio emi Nso Idi Obio Ubọn̄ Abasi?