Esisịt ini mbemiso Jesus akpade, enye ama ọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matthew 24:14) Edi didie ke ẹdikeme ndikwọrọ ikọ ke ofụri ererimbot? Ebe ke nditiene uwụtn̄kpọ emi Jesus ekenịmde ke ini enye okodude ke isọn̄.—Luke 8:1.

Nnyịn imesidomo ndika mbịne mme owo ke ufọk mmọ. Jesus ekekpep mbet esie ndikwọrọ eti mbụk ke ufọk ke ufọk. (Matthew 10:11-13; Utom 5:42; 20:20) Ẹma ẹnọ mme ọkwọrọikọ eke akpa isua ikie oro efakutom ndikwọrọ ikọ. (Matthew 10:5, 6; 2 Corinth 10:13) Kpasụk ntre mfịn, ẹtịm utom ukwọrọikọ nnyịn ke ata eti usụn̄, ẹnyụn̄ ẹnọ esop kiet kiet ebiet emi mmọ ẹdikwọrọde ikọ. Emi an̄wam nnyịn ikeme ndinam se Jesus okowụkde ete “ikwọrọ ikọ inọ mme owo inyụn̄ inọ ọyọhọ ikọ ntiense.”—Utom 10:42.

Nnyịn imesidomo ndisobo ye mme owo ke ebiet ekededi oro mmọ ẹdude. Jesus ama enịm uwụtn̄kpọ n̄ko ke ndisikwọrọ ikọ nnọ mme owo an̄wan̄wa, utọ nte ke mbeninyan̄ m̀mê obube mmọn̄ obio. (Mark 4:1; John 4:5-15) Nnyịn imesinyene nneme Bible n̄ko ye mme owo ke ebiet ekededi oro ikemede—ke mme efak, ke mme itie mbubehe, ke mme itie unọ idem nduọkodudu, m̀mê ke telefon. Nnyịn n̄ko imesikwọrọ ikọ inọ mme mbọhọidụn̄ nnyịn, nsan̄autom, nsan̄a ufọkn̄wed, ye iman nnyịn ke ini inyenede eti ifet. Ofụri ukeme oro isịnde mi esinam ediwak miliọn owo ke ofụri isọn̄ ẹkop “eti mbụk edinyan̄a.”—Psalm 96:2.

Ndi ọmọfiọk mbon emi afo akpamade ndisian eti mbụk Obio Ubọn̄ Abasi ye se emi etịn̄de aban̄a ini iso mmọ? Kûtre ndisian mme owo etop idotenyịn emi. Nam mmọ ẹkop etop emi adan̄a nte ekekeme!

• Nso “eti mbụk” ke ana ẹkwọrọ?

• Didie ke Mme Ntiense Jehovah ẹkpebe uwụtn̄kpọ Jesus ke ndikwọrọ ikọ?