Kpukpru nnyịn imoyom okụk man ikeme ndise mban̄a ubon nnyịn. (Mme N̄ke 30:8) Bible ọdọhọ ke okụk ekeme ‘ndikpeme owo.’ (Ecclesiastes 7:12) Ekeme ndisọn̄ mbufo ndisineme n̄kpọ mban̄a okụk nte ebe ye n̄wan, edi ẹkûyak okụk ada ikọ edi ke ndọ mbufo. (Ephesus 4:32) Akpana ebe ye n̄wan ẹnyene mbuọtidem ke idem kiet eken ẹnyụn̄ ẹtie kiet ẹbiere se mmọ ẹdidade okụk inam.

BIBLE ỌDỌHỌ ETE: “Anie ke otu mbufo emi oyomde ndibọp tọwa [m̀mê ufọk] mîdibemke iso isụhọde itie ibat se iditakde, man okụt m̀mê enye enyene okụk emi ekemde ndida mbọp mma?” (Luke 14:28) Akpana mbufo ẹtie kiet ẹneme se ẹdidade okụk mbufo ẹnam. (Amos 3:3) Ẹbiere se ẹyomde ndidep ẹnyụn̄ ẹbiere m̀mê okụk ifan̄ ke ẹdibiat. (Mme N̄ke 31:16) Owo ndinyene okụk iwọrọke ke ana enye edep se enye okokụt. Ẹkûdep n̄kpọ ke isọn; ẹdep ke ini ẹnyenede okụk.—Mme N̄ke 21:5; 22:7.

SE AKPANAMDE:

• Edieke okụk mbufo ọyọhọde osụhọ ke utịtọfiọn̄, ẹtie kiet ẹbiere se ẹdidade okụk oro ẹnam

• Edieke okụk okụrede ọkpọn̄ mbufo, ẹtie ẹneme nte ẹkpesiode urua ke se ẹsibiatde. Ke uwụtn̄kpọ, ẹmekeme nditem udia ke ufọk utu ke ndidia bar

BIBLE ỌDỌHỌ ETE: “Imanam eti ndutịm, idịghe ke iso Jehovah kpọt, edi n̄ko ke iso owo.” (2 Corinth 8:21) Ebe, nam n̄wan fo ọdiọn̄ọ m̀mê okụk ifan̄ ke esidia ke ọfiọn̄ ye se esibiatde. N̄wan, nam kpa ntre ye ebe fo.

Edieke enyenede akpan n̄kpọ emi anade ada okụk anam, ẹtie kiet ẹneme. (Mme N̄ke 13:10) Ndisineme nneme ntem ayanam ẹdụn̄ ke emem. Kûdọhọ ke afo ikpọn̄ enyene okụk emi an̄wanade, ti ke mbufo mbiba ẹnyene.—1 Timothy 5:8.

SE AKPANAMDE:

• Ẹbiere ibat okụk oro owo mbufo kiet kiet ekemede ndibiat edi ibụpke owo enye eken

• Ẹkûbet tutu mfịna ọtọn̄ọ mbemiso ẹnemede nneme okụk