N̄kamana ke Acul, ekpri obio kiet ke n̄kan̄ ikpọ obot Guatemala. Idi mbon Maya emi ẹsemde usem Ixil, ndien mma nsisem Spanish n̄ko. N̄kamana ke ini ekọn̄. Ekọn̄ emi ama an̄wana ofụri isua 36 ke Guatemala. Mbon nnyịn ẹma ẹkpan̄a ẹwak.

Ke ini n̄kedide isua inan̄, eyeneka mi emi ekedide isua itiaba ama edue emen bọm ke isọn̄ akama ebre mbre. Bọm emi ama obomo owot enye onyụn̄ esịri mi enyịn. Nte n̄kasan̄ade ndi nnan edi oro. Ẹma ẹmen mi ẹkesịn ke ufọkn̄wed mme nnan emi odude ke Guatemala City. Do ke n̄kekpep ndikot n̄wed mme nnan. Mme andikpep ke ufọkn̄wed emi ikesiyakke nneme nneme ye nditọwọn̄ eken. N̄kọdiọn̄ọke ntak emi mmọ ẹkenamde utọ n̄kpọ oro, edi emi ama anam nditọ ufọkn̄wed nnyịn imaha ndibre mbre ye ami. Ndobo ama esinam mi kpukpru ini ndien n̄kesitetie mbet ini nduọkodudu ọfiọn̄ iba emi ikesinyenede ke isua man n̄ka n̄kodu ye eka mi. Enye ama esifọn ido onyụn̄ atua mi mbọm nte eka. Edi ke ini n̄kedide isua duop, eka mi ama akpa ọkpọn̄ mi. Enyịn ama anan mi sia n̄kekere ke n̄kukụre owo emi akamade mi ke ererimbot akpa ọkpọn̄ mi oro.

Mma mfiak nnyọn̄ obio nnyịn ini n̄kedide isua 11 n̄kodụn̄ ye eyenete mi ye ubon esie. Mmọ ẹma ẹse ẹban̄a mi, edi owo ndomokiet ikekemeke ndinam mi n̄kop inemesịt. Ndusụk ini, mma nsitua nnyụn̄ mbụp Abasi nte: “Ntak emi eka mi akakpade ọkpọn̄ mi? Ntak emi ndide nnan?” Mme owo ẹma ẹsidọhọ ke se iwọrọde mi edi uduak Abasi. Emi ama anam n̄kere ke Abasi ikereke iban̄a mi. N̄kukụre se ikanamde n̄kûwot idem edi ke n̄kekwe n̄kpọ oro n̄kpadade n̄wot idem.

Sia n̄kedide nnan, mme owo ẹma ẹsisọp ndinam mi ibak. Ini n̄kedide eyenọwọn̄, ẹma ẹsabade mi ediwak ini. N̄ketịn̄ke ofụri ibak oro ẹkesinamde mi nnọ owo ndomokiet sia n̄kekere ke idụhe eke ekerede aban̄a mi. Mme owo ikesiwakke ndineme nneme ye ami, n̄kesinyụn̄ ntịn̄ke ikọ ye owo. Mma nsifụhọ, ntie ikpọn̄ ikpọn̄, n̄konyụn̄ nnyeneke mbuọtidem ke idem owo ndomokiet.

Ini n̄kedide isua 13, n̄wan ye ebe emi ẹdide Mme Ntiense Jehovah ẹma ẹdi ẹbịne mi ke  ufọkn̄wed nnyịn ke ini mbre udia. Andikpep kiet ke ufọkn̄wed nnyịn ọkọdọhọ mmọ ẹdi sia mbọm mi ama esinam enye. Mmọ ẹma ẹda Bible ẹwụt mi ke Abasi ayanam mme akpan̄kpa ẹset ye nte ke usen kiet usen kiet, mme nnan ẹyefiak ẹkụt usụn̄. (Isaiah 35:5; John 5:28, 29) Mma mma se mmọ ẹkekpepde mi, edi ikememke utom ndineme nneme ye mmọ sia ikemeheke mi ndisineme nneme ye owo. Kpa ye oro, mmọ ẹma ẹfọn ido, ẹnyene ime, ẹnyụn̄ ẹka iso ẹsidikpep mi Bible. N̄wan ye ebe emi ẹma ẹsisan̄a se ibede itiat itiokiet, ẹbe ikpọ obot man ẹdisim obio nnyịn.

Eyenete mi ọkọdọhọ ke mmọ ẹsisịne ọfọn̄ ediye ediye kpa ye oro mmọ mînyeneke okụk. Edi mmọ ẹma ẹsikere ẹban̄a mi ẹnyụn̄ ẹnọ mi n̄kpri n̄kpri enọ. Mma n̄kere ke ata mme Christian kpọt ẹkpefọn uwem ntem.

N̄kada n̄wed emi Mme Ntiense Jehovah ẹnamde ẹnọ mme nnan n̄kpep Bible. Se n̄kekpepde ama an̄wan̄a mi, edi ama ọsọn̄ mi ndinịm ndusụk n̄kpọ. Ke uwụtn̄kpọ, n̄kenịmke ke Abasi ekere aban̄a mi, n̄konyụn̄ nnịmke ke mbon en̄wen ẹnyụn̄ ẹkere ẹban̄a mi. Ama an̄wan̄a mi ntak emi Abasi ayakde mme owo ẹbọ ufen, edi okosụk ọsọsọn̄ mi ndinịm ke Abasi edi edima Ete nnyịn. *

Se n̄kekpepde ke Bible ama anam ntọn̄ọ ndikpụhọde ekikere sụn̄sụn̄. Ke uwụtn̄kpọ, mma ndifiọk ke mbọm mbon oro ẹbọde ufen esinam Abasi. Abasi eketịn̄ ntem aban̄a ikọt esie oro ẹkebọde ufen: “Ke akpanikọ, mmokụt ukụt ikọt mi . . . mmetịm mfiọk ubiak mmọ.” (Exodus 3:7) Mma ndinen̄ede mfiọk Jehovah, ndien emi ama anam nyak idem nnọ enye. Mma nna baptism ke 1998 nnyụn̄ n̄kabade ndi Ntiense Jehovah.

Ke 1999, mma ntọn̄ọ n̄wed ke ufọkn̄wed mme nnan emi odude ekpere Escuintla. Ebiowo ke esop ama okụt ke imemke ndisito obio nnyịn n̄kodụk mbono esop. Se idude edi ke esop oro ekekperede akan okodu ke obio oro ebe ye n̄wan emi ẹkesikpepde mi Bible ẹkesitode ẹdi, ndien ama ọsọn̄ mi ndisan̄a utọ anyan usụn̄ oro. Ntre, ebiowo emi ama eneme n̄kpọ emi ye ubon Mme Ntiense kiet ke Escuintla ndien mmọ ẹma ẹnyịme mi n̄wọrọ ndidụn̄ ye mmimọ. Mmọ ẹsin̄wam mi ndụk mbono esop. Mmọ ẹda mi nte owo ubon mmọ, ndien tutu esịm emi, mmọ ẹsụk ẹse ẹban̄a mi.

Nditọete ke esop Mme Ntiense Jehovah ẹwụt ke imama mi ke ata ediwak usụn̄. Kpukpru emi anam nnịm ke Mme Ntiense Jehovah ẹdi ata mme Christian, ndien mmenem esịt ndidu ke otu mmọ.—John 13:34, 35.

Mmenyene idotenyịn nnyụn̄ n̄kereke aba ke n̄wọrọke n̄kpọ. Idahaemi, mmọdiọn̄ọ se n̄kpadade uwem mi nnam. Utu ke nditie n̄kere se iwọrọde mi, nsida ofụri ini mi n̄kpep mme owo akpanikọ emi esịnede ke Bible. N̄ko, ndi ebiowo ke esop Mme Ntiense Jehovah, mmesinyụn̄ n̄ka nsio nsio esop n̄kọnọ utịn̄ikọ Bible. Mmesinọ utịn̄ikọ Bible n̄ko ke akamba mbono Mme Ntiense Jehovah emi ata ediwak owo ẹdude.

Ke 2010, mma n̄kụre ukpep ke Ufọkn̄wed Unọ Mme Asan̄autom Ukpep (emi ẹkotde idahaemi Ufọkn̄wed Mme Ọkwọrọ Obio Ubọn̄) ke El Salvador. Ufọkn̄wed emi anam n̄keme ndinen̄ede nse mban̄a utom oro nnyenede ke esop. Ukpep oro n̄kọbọde mi anam ndiọn̄ọ ke Jehovah Abasi enen̄ede ama mi, ke enye onyụn̄ ekeme ndida owo ekededi nnam utom esie.

Jesus ọkọdọhọ ke “inemesịt odu ke ndinọnọ akan ke ndibọbọ.” (Utom 20:35) Mmokop inemesịt idahaemi. Mmekeme ndien ndin̄wam mme owo, okposụkedi emi n̄kekerede ke utọ n̄kpọ emi ikemeke nditịbe.