IBUOTIKỌ IKPAEDEM | AFO EMEKEME NDIKPERE ABASI
Ndi Etie Fi Nte Emekpere Abasi?
“Ndidi ufan Abasi esinam esịt ana owo sụn̄, anam owo okop inem uwem, inyụn̄ iyakke n̄kpọ enen̄ede etịmede owo esịt. Esitie owo ke idem nte Abasi oyom n̄kpọ ọfọn imọ kpukpru ini.”—CHRISTOPHER, ETE KIET KE GHANA.
“Abasi okụt kpukpru se iwọrọde fi, enen̄ede ama fi, onyụn̄ ese aban̄a fi akan nte afo eben̄ede enye.”—HANNAH, EYEN ISUA 13 KE ALASKA, U.S.A.
“Idụhe se inemde inyụn̄ inamde esịt ana owo sụn̄ nte enye ndidiọn̄ọ ke idi ufan Abasi!”—GINA, N̄WAN JAMAICA EMI EBEDE ISUA 40.
Idịghe Christopher, Hannah, ye Gina kpọt ẹnịm ke mmimọ idi ufan Abasi. Ediwak owo ke ofụri ererimbot ẹnịm ke Abasi ada mmimọ nte ufan. Nso kaban̄a fi? Ndi etie fi nte emekpere Abasi? Mîdịghe ndi akpama ndikpere Abasi m̀mê ndinen̄ede n̄kpere enye? Omosụk ekeme ndikere ete, ‘Ndi owo ke isọn̄ emi ekeme ndidi ufan Ata Ọkpọsọn̄ Abasi? Edieke edide ntre, nso ke ẹkpenam?’
AFO EMEKEME NDIKPERE ABASI
Bible ọdọhọ ke mme owo ẹkeme ndidi ufan Abasi. Ke uwụtn̄kpọ, Isaiah 41:8 ọdọhọ ke Abasi okokot Abraham, emi ekedide ete ete nditọ Israel, “ufan mi.” Se n̄ko se James 4:8 ọdọhọde nnyịn inam mi: “Ẹsan̄a ẹkpere Abasi, ndien enye ayasan̄a ekpere mbufo.” Itien̄wed emi owụt ke owo ekeme ndikpere Abasi nnyụn̄ ndi ufan esie. Sia owo mîkemeke ndikụt Abasi, didie ke afo ekeme ‘ndisan̄a n̄kpere’ enye nnyụn̄ ndi ufan esie?
Man ibọrọ mbụme emi, yak ise nte owo iba ẹsisan̄ade ẹdi ufan. Mmọ ẹsibem iso ẹsiak enyịn̄ mmọ ẹnọ kiet eken. Ekem, nte mmọ ẹnemede nneme kpukpru ini, ẹtịn̄de se mmọ ẹkerede ye nte etiede mmọ ke idem, mmọ ẹsinen̄ede ẹkpere kiet eken. Ndien nte mmọ ẹnamde n̄kpọ ẹnọ kiet eken, ntre ke mmọ ẹdidọdiọn̄ ikpere. Ukem oro n̄ko ke edi ye owo emi oyomde ndidi ufan Abasi. Ẹyak ise nte emi edide ntre.
Ekeme Ndidi Ayama Mmọ Emi N̄ko
ENYỌN̄-UKPEME
Ndi Ọmọfiọk Enyịn̄ Abasi Esinyụn̄ Okot Enye?
Abasi ada Bible anam fi ọdiọn̄ọ owo emi imọ idide. Se se enye ọdọhọde mi: “Ami ndi Jehovah. Enyịn̄ mi edi oro.”
