LUZIA ESIKỌKỌN̄ ASAN̄A SIA UKOT UFIEN ESIE AKPA. Ke ini enye ekedide eyenọwọn̄, enye ama ọdọn̄ọ udọn̄ọ emi ẹkotde polio. Udọn̄ọ emi esisọp ndibe owo, esinyụn̄ awak ndibiat owo ọkpọ asakedem. Enye esinam nditọwọn̄ ẹdi mbụn̄ọ. Ke ini Luzia ekedide isua 16, eyenan̄wan emi enye ekesinamde utom ọnọ ama ọdọhọ enye ke “Abasi anam enye edi mbụn̄ọ sia enye ekesisọn̄de ibuot ye eka esie.” Se eyenan̄wan oro eketịn̄de ama anam esịt obụn̄ọ Luzia. Enye ikọsọpke ifre ikọ oro.

KE INI ẸKEDỌHỌDE DAMARIS KE ENYE ENYENE KANSA KE MFRE, ete esie ama obụp enye ete: “Nso ke akanam? Etie nte ubọk fo isanake! Anaedi enyene idiọkn̄kpọ emi akanamde emi anamde Abasi amia fi utọ ufen emi.” Ikọ emi ama owot Damaris ofụri ofụri.

Ebịghi etieti mme owo ẹketọn̄ọ ndikere ke Abasi esida udọn̄ọ amia owo ufen. N̄wed emi ẹkotde Manners and Customs of Bible Lands ọdọhọ ke ediwak owo ke eyo Christ ẹkenịm ke “idiọkn̄kpọ owo m̀mê eke iman esie esinam owo ọdọn̄ọ, ndien ke ẹkeda udọn̄ọ oro ẹmia enye ufen.” N̄wed en̄wen oro ẹkotde Medieval Medicine and the Plague ọdọhọ ke ata ediwak isua ke Christ ama akakpa, ke “ndusụk owo ẹkenịm ke Abasi akada ndiọi udọn̄ọ amia mme owo ufen ke ntak idiọkn̄kpọ mmọ.” Ntre, ke ini udọn̄ọ okowotde mme owo ọkwọkudịm ke Europe ke n̄kpọ nte isua 700 emi ekebede, ndi Abasi akamia mme idiọkowo ufen? Mîdịghe, ndi n̄kpri unam udọn̄ọ akanam mme owo ẹdọn̄ọ, nte mbiausọbọ ẹkedide ẹdidiọn̄ọ? Ndusụk owo ẹkeme ndikere, ‘Ndi edi akpanikọ ke Abasi esinam mme owo ẹdọn̄ọ ke ntak idiọkn̄kpọ mmọ?’ *

KERE ISE: Edieke Abasi esidade udọn̄ọ ye mfịna eken amia mme owo ufen ke ntak idiọkn̄kpọ mmọ, ntak emi Jesus Eyen Abasi ekesikọkde mme owo udọn̄ọ? Ndi oro ikpọwọrọke ke enye ọbọbiọn̄ọ utom Abasi, inyụn̄ iyakke mme owo ẹbọ ufen oro Abasi ọnọde mmọ ke ntak idiọkn̄kpọ mmọ? (Matthew 4:​23, 24) Jesus ikemeke-keme ndibiọn̄ọ utom Abasi. Jesus ọkọdọhọ ke imọ ‘isinam n̄kpọ eke enemde Ete imọ esịt kpukpru ini,’ afiak ọdọhọ ke ‘kpa nte Ete imọ ọkọnọde imọ ewụhọ ete inam, kpa ntre ke imọ inam.’​—John 8:29; 14:31.

Bible ọdọhọ ke Jehovah Abasi ‘isikpehe ukwan̄ikpe.’ (Deuteronomy 32:4) Ke uwụtn̄kpọ, Abasi ikemeke-keme ndinam ubomofụm enyene aksiden onyụn̄ owot ediwak owo ke ntak emi enye oyomde ndinọ idiọkowo kiet emi etienede esịne ke ubomofụm oro ufen! Abraham ama ọdiọn̄ọ ke Abasi esinam se inende, ntak edi oro enye ọkọdọhọde ke Abasi ‘idisoboke ndinen owo ye mme idiọkowo.’ Enye ama onyụn̄ obụp ete: “Nte Ebiereikpe ofụri ererimbot idinamke se inende?” (Genesis 18:​23, 25) Bible ọdọhọ n̄ko ke ‘Abasi isinamke se idiọkde,’ isinyụn̄ ‘inamke se mînenke.’​—Job 34:​10-12.

Ke ini ibọde ufen, ifọnke ikere ke Abasi amia nnyịn ufen ke ntak idiọkn̄kpọ oro ikanamde. Ke ini Jesus ye mbet esie ẹkekụtde ete kiet emi akamanade nnan, se Jesus eketịn̄de ama owụt ke ifọnke ikere n̄kpọ ntre. Mbet esie ẹma ẹbụp enye ete: “Rabbi, anie akanam idiọkn̄kpọ, ndi owo emi m̀mê ete ye eka esie, esịnde enye amana nnan?” Jesus ama ọbọrọ ete: “Idịghe owo emi inyụn̄ idịghe ete ye eka esie, edi ekedi man ẹkpenam utom Abasi ẹyarade ke idem esie.”​—John 9:​1-3.

Sia mbon eyo Jesus ẹkesikerede ke Abasi esinọ owo ufen ke ntak idiọkn̄kpọ esie, anaedi idem ama  akpa mbet Jesus ke ini enye ọkọdọhọde mmọ ke idịghe idiọkn̄kpọ owo oro m̀mê eke ete ye eka esie akanam enye edi nnan. Jesus ama anam owo oro okụt usụn̄, ndien se enye akanamde oro ama owụt ke inenke ndidi ẹma ẹkụt owo ọbọde ufen, mme owo ẹkere ke Abasi amia enye ufen ke ntak idiọkn̄kpọ esie. (John 9:​6, 7) Mbon oro ẹdọn̄ọde ikpọ udọn̄ọ mfịn ẹkpenyene ndifiọk ke idịghe Abasi ọtọ mmimọ udọn̄ọ. Mmọ ndifiọk emi ekeme ndidọn̄ mmọ esịt.

N̄wed Abasi ọdọhọ nnyịn ete

• “Owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” (JAMES 1:13) Ibịghike, Abasi ọmọn̄ anam kpukpru “idiọkn̄kpọ” oro ẹtịbede ọnọ mme owo ke ediwak isua idahaemi ẹtre, utọ nte udọn̄ọ, ubiak, ye n̄kpa.

• Jesus Christ ama “ọkọk kpukpru mbon emi idem mîsọn̄ke.” (MATTHEW 8:16) Jesus ndikanam idem ọsọn̄ kpukpru mbon oro ẹkedide ẹbịne enye okowụt se enye edinamde ke ofụri ererimbot ke ini Obio Ubọn̄ Abasi edikarade isọn̄ emi.

• “Enye [Abasi] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”​—EDIYARADE 21:​3-5.

Nso ndien inam mme owo ẹbọ ufen ntem ke ererimbot emi? Mbụme emi afịna mme owo ke ediwak isua. Edieke mîdịghe Abasi esinam mme owo ẹbọ ufen, anie ndien anam? Ẹyebọrọ mme mbụme emi ke ibuotikọ oro etienede.