GOSPEL Matthew ọdọhọ ete: “Jesus odụk temple onyụn̄ ebịn kpukpru mmọ eke ẹnyamde ẹnyụn̄ ẹdepde n̄kpọ ke temple osion̄o, onyụn̄ onụk okpokoro mme okpụhọ okụk ye nnyan n̄kpọitie mme anyam ibiom ọduọn̄ọ. Enye onyụn̄ ọdọhọ mmọ ete: ‘Ẹwet ẹte, “Ẹdikot ufọk mi ufọk akam,” edi mbufo ẹmenam enye edi itie udịbe mbon n̄wo.’ ”​—Matt. 21:12, 13.

N̄wed mbụkeset mme Jew ọdọhọ ke mbon oro ẹkesinyamde n̄kpọ ke temple ẹma ẹsitụk mbon emi ẹkesibọde mmọ n̄kpọ ẹdep. Ke uwụtn̄kpọ, n̄wed ibet mme Jew emi ẹkotde Mishnah (Keritot 1:7) ọdọhọ ke enyene ini emi urua ibiom iba ọkọdọkde ekesịm denar m̀mê denarius gold kiet ke eyo mme apostle. Okụk utom usen 25 ekedi oro. Abasi ama enyịme mme ubuene ẹsiwa ibiom, edi ẹma ẹnyam ibiom ọsọn̄ urua akaha tutu mme ubuene ikekemeke aba ndidep. (Lev. 1:14; 5:7; 12:6-8) N̄kpọ emi ama ayat Simeon eyen Gamaliel, emi ekedide Rabbi, tutu enye osụhọde ibat uwa emi akanade mme owo ẹwa. Emi ama anam ibiom iba oro ẹkesidade okụk utom usen 25 ẹdep osụhọde urua tutu edi se ẹdade okụk utom hour ita kpọt ẹdep.

Se inemede emi owụt ke ikọdiọkke Jesus ndikot mbon oro ẹkesinyamde urua ke temple “mbon n̄wo” ke ntak emi mmọ ẹkesitụkde mme owo ẹnyụn̄ ẹdiọkde itọn̄.