SE MME DỌKTA ẸDỌHỌDE

N̄wed kiet emi ẹkotde Harvard Mental Health Letter ọkọdọhọ ke “esịt esinem mbon oro ẹsiwakde ndikọm mbon oro ẹnamde n̄kpọ ẹnọ mmọ. Ndisikọm owo esinam owo okop inemesịt, anam idem enem owo, anam owo ekeme ndiyọ mfịna, onyụn̄ anam owo enyene nti ufan.”

SE BIBLE ỌDỌHỌDE

Bible ọdọhọ nnyịn isikọm owo. Apostle Paul ekewet ete: “Mbufo . . . ẹwụt esịtekọm.” Enye ke idemesie ama esinyụn̄ anam emi. Ke uwụtn̄kpọ, enye ama ‘esikọm Abasi’ ke ini mme owo ẹkenamde se enye ekekpepde mmọ. (Colossae 3:15; 1 Thessalonica 2:13) Se isinamde owo enen̄ede okop inemesịt idịghe ndikọm owo ke ini ke ini, edi edi ndisikọm owo kpukpru ini oro ẹnamde n̄kpọ ẹnọ enye. Edieke isikọmde owo kpukpru ini, nnyịn idikereke iban̄a idem nnyịn kpọt, idifịbeke ufụp, idinyụn̄ isịnke owo ke esịt sia mme ido ntem idiyakke mme owo ẹdian idem ye nnyịn idinyụn̄ iyakke ikop inemesịt.

Abasi ke idemesie esiwụt esịtekọm—esiwụt ke imama se inamde inọ imọ! Mme Hebrew 6:10 ọdọhọ ete: “Abasi ikwan̄ake eke ekpesịnde enye efre utom mbufo ye ima eke mbufo ẹwụtde ẹban̄a enyịn̄ esie.” Abasi ada nte ke imọ ndifre ofụri se nnyịn inamde inọ imọ edi idiọkn̄kpọ.

“Ẹdat esịt kpukpru ini. Ẹnọ ekọm ke kpukpru n̄kpọ.”—1 Thessalonica 5:16, 18.

SE ISITỊBEDE

Ke ini ikọmde owo ke ofụri esịt ke ini mmọ ẹnọde nnyịn n̄kpọ, ẹn̄wamde nnyịn, m̀mê ẹdọn̄de nnyịn esịt, mmọ ẹyekop inemesịt ẹnyụn̄ ẹkụt ke imama se mmimọ inamde inọ nnyịn. Idem mbon oro mîmeheke ye nnyịn ẹsikop inemesịt ke ini ikọmde mmọ ke eti n̄kpọ oro mmọ ẹnamde ẹnọ nnyịn.

SE BIBLE ỌDỌHỌDE

Jesus Christ ọkọdọhọ ete: “Ẹnọ owo n̄kpọ, ndien ẹyenọ mbufo n̄kpọ. Ẹyedomo ọyọhọ udomo, eke ẹmịn̄de osụhọde, eke ẹnyen̄ede onyụn̄ ọyọhọde ọduọhọ, ẹsịn mbufo ke ọfọn̄.” (Luke 6:38) Kere ban̄a se iketịbede inọ Rose emi edide inan onyụn̄ odụn̄de ke Vanuatu ke South Pacific.

Rose ama esidụk mbono esop Mme Ntiense Jehovah, edi enye ikesifiọkke se ẹkpepde sia enye mîkọdiọn̄ọke usem idiọn̄ọ, owo ndomokiet ke esop oro ikonyụn̄ ifiọkke usem oro. Ke ini ebe ye n̄wan kiet emi ẹfiọkde usem idiọn̄ọ ẹkedide esop oro ẹdikụt Rose, mmọ ẹma ẹtọn̄ọ ndikpep mme owo do usem idiọn̄ọ. Esịt ama enen̄ede enem Rose. Enye ọkọdọhọ ete: “Esịt enem mi ndinyene ediwak ufan emi ẹmade mi.” Ke ini ebe ye n̄wan oro ẹkekụtde nte esịt enemde Rose ye nte enye esitienede ọbọrọ mbụme onyụn̄ anamde n̄kpọ ke mbono esop, mmọ ẹma ẹnen̄ede ẹkop inemesịt. Rose ama onyụn̄ ama nte mbon en̄wen ke esop ẹkesịnde idem ẹkpep usem idiọn̄ọ man ẹsineme nneme ye imọ.—Utom 20:35.

“Owo eke awade ekọm nte uwa edi enye emi ọnọde mi ubọn̄.”—Psalm 50:23.

SE BIBLE ỌDỌHỌDE

Se nnyịn ikerede ke isiwak ndinam. Ke uwụtn̄kpọ, David ama ọbọn̄ akam ọnọ Abasi ete: “Mmetie n̄kere kpukpru utom fo; mmenyịme nditie n̄kere utom ubọk fo.” (Psalm 143:5) David ama esitie ekere se Jehovah akanamde ọnọ enye, ndien emi ama anam enye esikọm Jehovah kpukpru ini.—Psalm 71:5, 17.

Bible ọdọhọ ‘ika iso itie ikere n̄kpọ ekededi eke edide akpanikọ, eke ẹmade, eke ọwọrọde eti etop, ye n̄kpọ ekededi eke odotde itoro.’ (Philippi 4:8) Bible ndidọhọ ‘ika iso ikere’ owụt ke ndisitie n̄kere nti n̄kpọ ayanam emehe nnyịn ndisikọm owo ke ini ẹnamde n̄kpọ ẹnọ nnyịn.

“Esịt mi oyonyụn̄ ekere mme n̄kpọ oro ẹsịnede ifiọk.”—Psalm 49:3.