Mme owo ẹsisari mbon emi ẹtode idụt en̄wen, obio en̄wen, m̀mê ẹsemde usem en̄wen. Ndusụk owo ẹsisari owo ke ntak ufọkabasi emi owo akade, ntak emi owo edide eren m̀mê n̄wan, m̀mê ke ntak owo edide imọ m̀mê ubuene. Mbon en̄wen ẹsisari owo ke ntak isua emana, ke ntak ifiọkn̄wed, ntak owo obiomode, m̀mê ke ntak uyai. Edi mmọ ẹkeme ndidọhọ ke mmimọ isinamke asari.

Ndi emekere ke emesinam asari? Ediwak nnyịn imesisọp ndikụt ke mbon en̄wen ẹsisari owo. Edi esisọn̄ ndikụt ke nnyịn n̄ko imesisari asari. Se idude edi ke idụhe owo nnyịn ndomokiet emi mînamke asari akanam. Prọfesọ David Williams emi esikpepde n̄kpọ aban̄a nte mme owo ẹsinamde n̄kpọ ye kiet eken ọdọhọ ke ini mme owo ẹnyenede idiọk ekikere ẹban̄a mbon obio en̄wen, ke ini mmọ ẹkụtde owo obio oro, “ke enyene nte mmọ ẹdinamde n̄kpọ ye owo oro edi idiọn̄ọke ke imanam utọ n̄kpọ oro.”

Ke uwụtn̄kpọ, ke idụt Balkan kiet emi Jovica odude, enyene mbon ekpri obio kiet emi mme owo mîsidaha ke n̄kpọ. Jovica ọdọhọ ke ‘imọ ikesikere ke owo mmọ ndomokiet ifọnke, edi imọ ikadaha oro nte asari sia mmọ ẹma ẹnyụn̄ ẹdiọk ke akpanikọ.’

Ediwak ukara ẹsinịm ibet man mme owo idisari mbon idụt en̄wen m̀mê ndisari mme owo ke ntak en̄wen ekededi. Edi kpa ye oro asari itreke. Ntak-a? Sia ibet mmọ esinyụn̄ akpakpan mme owo ndinam asari edi isioho asari ke esịt owo ifep. Asari esitọn̄ọ ke esịt owo. Ndi ikọ ọwọrọ ke owo ikemeke nditre asari? Ndi enyene se ikemede nditre asari?