Genesis 17;1-27
17 Ke ini Abram esịmde isua anan̄ ye efịtenan̄, Jehovah owụt Abram idem onyụn̄ ọdọhọ enye ete:+ “Ami ndi Ata Ọkpọsọn̄ Abasi.+ San̄a ke iso mi nyụn̄ nana ndudue.+
2 Ndien nyenịm ediomi mi ke ufọt mi ye afo,+ man n̄kpanam fi awak ata etieti.”+
3 Ntem Abram ọduọ ekịbi iso+ esie ke isọn̄, ndien Abasi ọdọhọ enye ete:
4 “Sese! ediomi mi odu ye afo,+ ndien afo ayakabade edi ete ediwak idụt.+
5 Afo udukereke aba Abram, edi edikere Abraham, koro nyanam fi edi ete ediwak idụt.
6 Nyanam fi ọtọt ata etieti nnyụn̄ nnam fi edi ediwak idụt, ndien ndidem ẹyeto fi ẹwọn̄ọ.+
7 “Nyonyụn̄ nnam ediomi mi oro n̄kanamde ke ufọt mi ye afo,+ ye mfri fo emi editienede fi nte emana mmọ ẹdide, ọsọn̄ọ ada, kpa nsinsi ediomi+ ndidi Abasi fo ye eke mfri fo emi editienede fi.+
8 Ndien nyọnọ fi ye mfri fo emi editienede fi isọn̄ emi afo odụn̄de nte esenowo,+ kpa ofụri isọn̄ Canaan, nte inyene fo ke nsinsi; nyonyụn̄ ndi Abasi mmọ.”+
9 Ndien Abasi ọdọhọ Abraham ete: “Afo enyene ndinịm ediomi mi, afo ye mfri fo emi editienede fi nte emana mmọ ẹdide.+
10 Emi edi ediomi mi emi mbufo ẹdinịmde, ke ufọt mi ye mbufo, idem ye mfri fo emi editienede fi:+ Kpukpru irenowo mbufo ẹnyene ndina mbobi.+
11 Ndien mbufo ẹnyene ndina mbobi ke ndisịbe edụt mbufo, emi oyonyụn̄ edi idiọn̄ọ ediomi ke ufọt mi ye mbufo.+
12 Kpukpru irenowo, ke ofụri emana mbufo, emi ẹsịmde usen itiaita ke emana ẹnyene ndina mbobi,+ owo ekededi eke amanade ke ufọk ye owo ekededi eke ẹdepde ẹto owo esenidụt emi mîtoho ke mfri fo.
13 Kpukpru irenowo eke ẹmanade ke ufọk fo ye kpukpru irenowo eke afo edepde, ẹkûtre ndina mbobi;+ ndien ediomi mi emi odude ke obụkidem mbufo enyene ndidi nsinsi ediomi.+
14 Erenowo oro mînaha mbobi, eke owo mîsịbeke enye edụt, ẹyesịbe ukpọn̄ oro ẹfep ke otu ikọt esie.+ Enye amabiat ediomi mi.”
15 Ndien Abasi ọdọhọ Abraham ete: “Amaedi Sarai n̄wan fo, kûkot enye Sarai aba, koro Sarah edide enyịn̄ esie.+
16 Nyọdiọn̄ enye nnyụn̄ nnam enye aman eyeneren ọnọ fi;+ ndien nyọdiọn̄ enye, enye oyonyụn̄ akabade edi ediwak idụt;+ ndidem mme idụt ẹyeto enye ẹwọn̄ọ.”+
17 Ndien Abraham ọduọ ekịbi iso ke isọn̄, ọtọn̄ọ ndisak onyụn̄ ọdọhọ ke esịt esie ete:+ “Nte erenowo isua ikie ekeme ndibon eyen, n̄ko nte Sarah n̄wan isua anan̄ ye duop ekeme ndiman eyen?”+
18 Ekem Abraham ọdọhọ ata Abasi ete: “Ishmael akpakam odu uwem ke iso fo!”+
19 Ntem Abasi ọdọhọ ete: “Sarah n̄wan fo ayaman eyeneren ọnọ fi, ndien afo oyosio enye enyịn̄ Isaac.+ Ndien nyanam ediomi ye enye, kpa nsinsi ediomi ye mfri esie.+
20 Edi amaedi Ishmael, mmokop se afo etịn̄de. Sese! Nyọdiọn̄ enye nyonyụn̄ nnam enye ọtọt onyụn̄ awak ata etieti.+ Enye oyobon mbọn̄ duopeba, nyonyụn̄ nnam enye edi akwa idụt.+
21 Edi ndinam ediomi mi ye Isaac+ emi Sarah edimande ọnọ fi ke ukem ini emi isua efen.”+
22 Ekem Abasi okụre nditịn̄ ikọ ye Abraham onyụn̄ ọkpọn̄ enye.+
23 Abraham ada Ishmael eyen esie ye kpukpru irenowo eke ẹmanade ke ufọk esie ye kpukpru mbon oro enye ekedepde, kpukpru irenowo ke ufọk Abraham, ndien enye esịbe mmọ edụt ke usen oro kpa nte Abasi eketemede enye.+
24 Abraham ekedi isua anan̄ ye efịtenan̄ ke ini ẹkesịbede enye edụt.+
25 Ishmael eyen esie ekedi isua duopeta ke ini ẹkesịbede enye edụt.+
26 Usen emi ke Abraham ye Ishmael eyen esie ẹkena mbobi.+
27 Kpukpru irenowo ke ufọk esie, owo ekededi eke amanade ke ufọk esie ye owo ekededi emi ẹkedepde ke okụk ẹto owo esenidụt, ẹnyụn̄ ẹna mbobi.+
