1 Corinth 16;1-24
16 Edi kaban̄a etịbe+ emi ẹdinọde ndisana owo,+ kpa nte n̄kọnọde uyo ke mme esop ke Galatia,+ mbufo ẹnam kpasụk ntre.
2 Ke kpukpru akpa usen urua yak owo mbufo kiet kiet ke ufọk esie osio n̄kpọ enịm n̄kan̄ kiet adan̄a nte enye oforode, man mbufo ẹkûtịp etịbe ke ini ndide ndisịm.
3 Edi ke ini nsịmde do, mme owo ekededi eke mbufo ẹdinyịmede ke leta,+ nyọdọn̄ mmọ emi nte ẹmen enọ mfọnido mbufo ẹka Jerusalem.
4 Nte ededi, edieke odotde ami n̄ko nditiene n̄ka do, mmọ ẹyesan̄a ye ami ẹka.
5 Edi nyedi ndise mbufo ke ini ndisan̄ade mbe ke Macedonia, koro nyom ndisan̄a ke Macedonia+ mbe;
6 ndien ndusụk nyadan̄ do esisịt mîdịghe ndu do ye mbufo ke ofụri ini etuep, man mbufo ẹkpeda+ mi ẹkeyak ke usụn̄.
7 Koro nyomke ndikụt mbufo isan̄ enye emi nte nsan̄ade mbe, koro mmodori enyịn ndidu do ke ndusụk ini ye mbufo,+ ke Jehovah+ enyịmede.+
8 Edi nyaka iso ndu ke Ephesus+ tutu usọrọ Pentecost okụre;
9 koro akwa usụn̄ emeberede ọnọ mi+ ndinam utom, edi ediwak mme andibiọn̄ọ ẹdu.
10 Nte ededi, edieke Timothy+ edide edisịm, ẹkụt ẹte enye ikopke ndịk ke otu mbufo, koro enye anam utom Jehovah,+ kpa nte ami nnamde.
11 Ke ntre, yak owo baba kiet okûse enye ke usụhọde.+ Ẹda enye ẹkeyak ke usụn̄ ke emem, man enye ekpedisịm mi, koro ami ye nditọete ke ibet enye.
12 Amaedi eyenete nnyịn Apollos,+ mma nsọn̄ọ n̄kpe ye enye nte asan̄a ye nditọete edise mbufo, edi enye ikaduakke ndidi kan̄a idahaemi; edi enye eyedi ke ini enye enyenede ifet.
13 Ẹdu ke edidemede,+ ẹsọn̄ọ ẹda ke mbuọtidem,+ ẹnam n̄kpọ nte irenowo,+ ẹkop odudu.+
14 Ẹnam kpukpru n̄kpọ ke ima.+
15 Edi nteme mbufo, nditọete, nte: Mbufo ẹmefiọk ẹte mbonufọk Stephanas ẹdi akpa mbun̄wụm+ ke Achaia ye nte ke mmọ ẹsịn idem ẹsan̄a utom ẹnọ ndisana owo.+
16 Mbufo n̄ko ẹkpekam ẹsụk ibuot ẹnọ utọ mbon oro ẹnyụn̄ ẹsụk ibuot ẹnọ kpukpru owo eke ẹdianade kiet ẹnam utom.+
17 Edi mmadara mban̄a edidu Stephanas+ ye Fortunatus ye Achaicus, koro mmọ ẹkenamde n̄kpọ ke itie emi mbufo ẹkpenamde.
18 Koro mmọ ẹmedemede spirit mi+ ye eke mbufo. Ke ntre ẹkpono utọ mbon oro.+
19 Mme esop ke Asia ẹte n̄kọm mbufo.+ Aquila ye Prisca ọkọrọ ye esop emi odude ke ufọk+ mmọ ẹkọm mbufo ke ofụri esịt ke Ọbọn̄.
20 Kpukpru nditọete ẹte n̄kọm mbufo. Ẹda edisana ntịminua ẹkọm kiet eken.+
21 Ami Paul nda ubọk mi n̄wet ekọm emi.+
22 Edieke owo ekededi mîmaha Ọbọn̄, osụk ọdọdiọk ọnọ enye.+ O Ọbọn̄ nnyịn, di!+
23 Mfọnido Ọbọn̄ Jesus oro owo mîdotke akpakam odu ye mbufo.
24 Ima mi akpakam odu ye kpukpru mbufo emi ẹdide mme anditiene Christ Jesus.