Ndi Mbre Mfọniso Ọdiọk?
Se Bible ọdọhọde
Kpa ye emi Bible mînen̄ekede itịn̄ n̄kpọ iban̄a mbre mfọniso, enyene se Bible etịnde emi ekemede ndin̄wam nnyịn idiọn̄ọ ke Abasi ada mbre mfọniso nte ata idiọkn̄kpọ.—Ephesus 5:17. a
Idiọkitọn̄ esinam mme owo ẹbre mbre mfọniso, ndien Abasi asua idiọkitọn̄ etieti. (1 Corinth 6:9, 10; Ephesus 5:3, 5) Okụk emi atakde mbon en̄wen ke mme ebre mbre mfọniso ẹsidia, edi Bible ọdọhọ yak nnyịn ikûsịn esịt ke n̄kpọ owo.—Exodus 20:17; Rome 7:7; 13:9, 10.
Ndisịn ekpededi ata ekpri okụk ke mbre mfọniso ekeme ndinam owo ọtọn̄ọ ndima okụk tutu enyịme ndikpa ke ntak okụk.—1 Timothy 6:9, 10.
Mme ebre mbre mfọniso ẹnịm ke usen kiet usen kiet ke mmimọ iyadia okụk. Ndien mbre emi esikabade etie nte abasi mmọ.—Isaiah 65:11.
Bible idọhọke idọn̄ ubọk ke ekpat itie iyom okụk emi nnyịn mîkan̄wan̄ake, edi akam ọdọhọ ida ubọk nnyịn inam utom. (Ecclesiastes 2:24; Ephesus 4:28) Mbon emi ẹnamde se Bible etịn̄de emi ẹsidia “udia oro mmọ ẹn̄wanade.”—2 Thessalonica 3:10, 12.
Mbre mfọniso esinam mme owo ẹmia mbuba etieti, ndien Abasi asasua utọ ido emi.—Galatia 5:26.
a Bible ọdọhọ ke mbonekọn̄ Rome ẹma ẹsịn afia ẹdeme ọfọn̄ Jesus. Mbre mfọniso ke mmọ ẹkebre oro.—Matthew 27:35; John 19:23, 24.