Ndi Abasi Akanam Kpukpru N̄kpọ Ẹfoforo?
Se Bible etịn̄de
Abasi ikanamke mme n̄kpọ ẹfoforo. Bible ọdọhọ ke Abasi okobobot owo, unam, mbiet ye mme eto ke “orụk” mmọ. a (Genesis 1:12, 21, 25, 27; Ediyarade 4:11) Bible ọdọhọ n̄ko ke kpukpru nnyịn ito Adam ye Eve emi ẹdide akpa ete ye eka nnyịn. (Genesis 3:20; 4:1) Edi Bible idọhọke ke Abasi akanam mme n̄kpọ emi ẹdude uwem ẹfoforo. Se idude edi ke ntaifiọk ndidọhọ ke ndusụk odu-uwem n̄kpọ ẹdu ke utọ ke utọ ekem ye se Bible etịn̄de.
Ndi Abasi akanam mme n̄kpọ ẹfoforo?
Mbon oro ẹnịmde ke Abasi akanam mme n̄kpọ ẹfoforo ẹnyene nsio nsio ekikere ẹban̄a nte Enye akanamde emi. Ke uwụtn̄kpọ, n̄wed Encyclopædia Britannica etịn̄ ke ndusụk owo ẹnịm ke nte ndusụk n̄kpọ ẹsikpụhọrede ke idem mmọ owụt usụn̄ emi Abasi akadade anam mme n̄kpọ ẹfoforo.
Ndusụk se mmọ ẹnịmde edi:
Ke kpukpru n̄kpọ oro ẹdude uwem idahaemi ẹketọn̄ọ ke mme n̄kpọ oro ẹkedude uwem ke eset.
Ke odu-uwem n̄kpọ kiet ekeme ndiforo odu-uwem n̄kpọ en̄wen ofụri ofụri.
Ke Abasi kpọt ọdiọn̄ọ nte mme n̄kpọ emi ẹsiforode.
Ndi ntaifiọk ndidọhọ ke mme n̄kpọ ẹkefoforo ekem ye se Bible etịn̄de?
Ndusụk ntaifiọk ẹdọhọ ke se Bible etịn̄de aban̄a nte Abasi okobotde n̄kpọ, nte Genesis etịn̄de inenke. Edi Jesus ọkọdọhọ ke se idude ke n̄wed Genesis edi akpanikọ. (Genesis 1:26, 27; 2:18-24; Matthew 19:4-6) Bible ọdọhọ ke mbemiso Jesus edide isọn̄, ke enye okodu ke heaven an̄wam Abasi obot “kpukpru n̄kpọ.” (John 1:3) Ntre ntaifiọk ndidọhọ ke Abasi akanam mme n̄kpọ ẹfoforo ikemke ye se Bible ekpepde.
Ndi unam ye eto ndikeme ndidu uwem ke nsio nsio itie owụt ke mmọ ẹkefoforo?
Bible itịn̄ke nte nsio nsio odu-uwem n̄kpọ ẹsikpụhọrede eketre ke orụk mmọ. Bible ifan̄ake ke nsio nsio unam ye eto emi Abasi okobotde ekeme ndidu uwem ke nsio nsio itie. Kpa ye emi ndusụk ntaifiọk ẹkerede ke mme unam ye eto ndikeme ndidu ke nsio nsio itie owụt ke mmọ ẹkefoforo, oro inenke sia mme n̄kpọ emi ẹma ẹdodu.
a Bible ada ikọ oro ke “orụk mmọ” etịn̄ aban̄a nsio nsio odu-uwem n̄kpọ, edi ntaifiọk ẹsiwak ndida “uduot” ntịn̄ mban̄a nsio nsio odu-uwem n̄kpọ. Ikọ emi ke “orụk mmọ” anam ẹkụt ke n̄kpọ edi ke utọ ke utọ akan ikọ oro “uduot.” Ediwak ini, ntaifiọk ẹma ẹdọhọ ke n̄kpọ kiet oforo n̄kpọ en̄wen, se ọwọrọde edi ke n̄kpọ oro iforoke n̄kpọ en̄wen, edi edi kpa ukem n̄kpọ oro ke orụk en̄wen nte ẹwụtde ke n̄wed Genesis.
Ekeme Ndidi Ayama Mmọ Emi N̄ko
SE BIBLE EKPEPDE EMI ANADE OWO ỌDIỌN̄Ọ
Ndi Ẹkebobot Ekondo?
Bible ọdọhọ ke ẹkebobot ekondo. N̄kpọ emi isin̄wan̄ake ndusụk owo, ndusụk mmọ ẹsikam ẹda enye nte n̄ke. Edi ndi se Bible etịn̄de emi esịne ifiọk?
ABAN̄A NNYỊN
Dọhọ Mmọ Ẹdi Ufọk
Se nte Bible ekemede ndibọrọ mbụme fo, mîdịghe kpep n̄kpọ ban̄a Mme Ntiense Jehovah.