Osman ye n̄wan esie ye eyen mmọ an̄wan ẹma ẹda ukpatn̄kpọ ẹdọn̄ n̄wed ẹkeda ẹkpere itie emi ẹsibụkde owo ẹkwọrọ ikọ ke Chile. Nte mmọ ẹsụk ẹdade, mme owo ẹma ẹyịre udịm ẹmen owo ẹdi ndibụk, ke ẹbre, ke ẹkwọ. Ndusụk mmọ ẹma ẹfehe ẹkefat Osman ẹkere ke edi pastọ mmimọ ẹnyụn̄ ẹdọhọ enye ẹte: “Pastọ, amanam nte abakde edi, ima ikere m̀mê ini efe ke edidi idisịm!”

 Osman ama ọdọhọ mmọ ke imọ idịghe pasto, edi uyom ikayakke mmọ ẹkop ikọ esie ọfọn. Mmọ ẹma ẹdụk ẹka itie udi, ekem ke minit ifan̄ ebede, owo ifan̄ ke otu mmọ ẹma ẹfiak ẹdidọhọ enye ete, “Pastọ, ke ibet fi-o.”

 Ke uyom ama eketre ekpri, Osman ama ọdọhọ mmọ owo emi enye edide, ye se ikadade enye idi do. Otuowo ẹma ẹyat esịt nte pastọ mmọ mîkedịghe. Ekem mmọ ẹma ẹdọhọ Osman ete: “Mbọk di dineme ekpri n̄kpọ ke Bible ye nnyịn.” Osman ama enyịme.

 Nte mmọ ẹsụk ẹsan̄ade ẹka itie udi, Osman ama obụp mmọ n̄kpọ ifan̄ aban̄a akpan̄kpa oro, onyụn̄ ekere itie Bible emi enye edikotde inọ mmọ. Ke ẹma ẹkesịm itie udi oro, enye ama anam otuowo ẹdiọn̄ọ ke imọ idi Ntiense Jehovah, ke isikwọrọ eti mbụk inọ mme owo.

 Ekem enye ama okot Ediyarade 21:3, 4 ye John 5:28, 29 ọnọ mmọ, onyụn̄ anam mmọ ẹfiọk ke Abasi ikoyomke mme owo ẹkpa. Enye ama ọdọhọ mmọ ke ibịghike ke Abasi ayanam mme akpan̄kpa ẹset, ke mmọ ẹyekeme ndidu uwem ke isọn̄ emi ke nsinsi. Ke Osman ama okokụre, ediwak owo ẹma ẹfat enye ẹnyụn̄ ẹkọm enye ke eti mbụk emi enye ọkọkwọrọde ọnọ mmọ. Ekem enye ama afiak akada ke itie emi enye ekenịmde ukpatn̄kpọ ọkwọrọ ikọ.

 Ke ẹma ẹkebụk owo oro ẹma, ndusụk owo emi ẹkedide ubụkowo oro ẹma ẹka ẹbịne Osman ke itie ukpatn̄kpọ oro ẹkebụp ediwak n̄kpọ ke Bible. Nneme oro ama ebịghi; ayak ekpri mmọ ẹkpekebọ kpukpru n̄wed emi ọkọdọn̄ọde ke ukpatn̄kpọ oro.