Nte n̄kosụk n̄n̄wanade karet usen kiet ye owo emi n̄kesidade n̄kpep ndin̄wana karet, mma ndue ntịgha enye ibuo nnọ unan idiọk idiọk. Unan emi n̄kọnọde enye ama anam esịt afịna mi, ami nnyụn̄ ntọn̄ọ ndikere m̀mê ikpedịghe se ntrede karet ndien. Mma mma karet etieti, mma nnyụn̄ n̄kpep ke ediwak isua. Edi nso ikpanam ndien yak ndudue ini kiet oro anam n̄kere m̀mê ekpedi se ntrede? Yak mbem iso mbụk nnọ mbufo nte n̄kasan̄ade ntọn̄ọ ndin̄wana karet.

 Itie emi n̄kokponde ekekpere obio Buffalo, ke New York, ke U.S.A. Kpukpru owo ke ufọk nnyịn ẹkesika Catholic, ikonyụn̄ idụn̄ emem emem, mfịna idụhe. Ufọkabasi Catholic ẹkenyene mme ufọkn̄wed emi n̄kakade, mma nsinyụn̄ ndu ke enyọn̄ mbot ke ufọkabasi n̄n̄wam oku. Ete mi ye eka mi ẹkeyom mi ye akamba eyeneka mi an̄wan idi n̄kpọ ke uwem, inyụn̄ ikop inem uwem. Ntre mmọ ikesikpanke mi ndibre mbre mbuba ke ini n̄wed asuanade, ikonyụn̄ ikpanke mi ndisisio usen nnam utom nnyene okụk, ama akam edi ke nsụk mbebe n̄wed. Mme n̄kpọ oro ẹma ẹnam mbak ndiọn̄ọ idem.

 N̄kọtọn̄ọ ndikpep karet ini ndide isua 17. Mma nsida usen itiokiet ke urua n̄kpep ndin̄wana karet, hour ita ke usen. N̄kanam ntem ke ata ediwak isua. N̄kpọ efen emi n̄kesinamde kpukpru urua ekedi ndisitie n̄kere nsio nsio usụn̄ emi n̄kemede ndin̄wana en̄wan oro, mma nsinyụn̄ nse mme vidio emi ẹdin̄wamde mi n̄n̄wana karet ọfọn. Enye emi ekesinen̄erede enem mi ekesidi ndimen n̄kpọ mbọp ke enyịn mi ndomo ndin̄wana karet. Mma nsikam mbọp n̄kpọ ke enyịn n̄kpep ndikama akan̄kan̄ n̄n̄wana. Ẹkpenịm eto m̀mê ibio itiat, n̄kesitọ ubọkita kiet nsuan. Mma nsịne ke otu mbon emi ẹkenen̄erede ẹdiọn̄ọ ndin̄wana karet, mma nsinyụn̄ n̄kan ke ediwak mbuba. Ndin̄wana karet ekedi ata akpan n̄kpọ ke uwem ọnọ mi.

 N̄kekere ke mmedi n̄kpọ. Ini n̄kụrede ufọkn̄wed ntaifiọk, n̄kesịne ke otu mbon emi ẹdiọn̄ọde n̄wed ẹkan. Enyene ini emi n̄kesidiọn̄de kọmputa nnọ ata akamba kọmpeni kiet. Kọmpeni oro ẹma ẹsinọ mi n̄kpri n̄kpri okụk ye mme n̄kpọ eken emi ẹkesinọde mbonutom ẹdian ye okụk utịtọfiọn̄. Mma nnyene ufọk idemmi nnyụn̄ nnyene eyenan̄wan emi n̄kamade. Mbon emi ẹdade-da ẹkụt mi ẹkesikere ke mmenen̄ede n̄kop inemesịt, edi ke isọn̄ esịt mi esịt ikenemke mi, sia ama enyene mme mbụme emi ẹkesifịnade mi, emi mmen̄kọdiọn̄ọke ibọrọ.

 Mma ntọn̄ọ ndika ufọkabasi ikaba ke urua nnyụn̄ mbọn̄ akam nnọ Abasi m̀mê oyoto ke oro ami n̄kụt ibọrọ mme mbụme emi ẹkefịnade mi. Nneme emi n̄kenemede ye ufan mi usen kiet ama okpụhọde uwem mi. Mma mbụp enye: “Ndi akanam emekere se ikanamde Abasi obot owo?” Ekem ndọhọ enye: “Mfịna awak etieti, ẹnyụn̄ ẹfịk mme owo ẹkaha!” Enye ama ọdọhọ mi ke imọ ima isibụp ukem mbụme oro, edi ke ima ikụt ibọrọ ke Bible. Enye ama ọnọ mi n̄wed Afo Emekeme Ndidu Uwem ke Nsinsi ke Paradise ke Isọn̄. a Ufan mi oro ama ọdọhọ mi n̄ko ke imọ ikpep Bible ye Mme Ntiense Jehovah. N̄koyomke ndikot n̄wed oro akpa akpa sia n̄kekere ke n̄wed ufọkabasi nnyịn kpọt ke n̄kpesikot. Edi sia ọkọdọn̄de mi ndikụt ibọrọ mme mbụme oro ẹkesifịnade mi, mma ndọhọ yak n̄kot nse ise m̀mê se Mme Ntiense Jehovah ẹsikpepde enyene ibuot.

 Ama akpa mi idem ndidiọn̄ọ mme n̄kpọ emi Bible ekpepde. Mma n̄kụt ke Bible, ke ini Abasi okobotde owo, ke enye okoyom yak mmọ ẹdụn̄ ke nsinsi ke Paradise ke isọn̄ emi. Mma nnyụn̄ n̄kụt n̄ko ke se Abasi aduakde oro eyetịbe usen kiet usen kiet. (Genesis 1:28) Ama akpa mi idem ndikụt ke Jehovah emi edide enyịn̄ Abasi, mmọdo ewere ke Bible King James emi n̄kenyenede, ke enyịn̄ oro ke ami n̄kesinyụn̄ mbọn̄ akam mban̄a ini ntịn̄de Akam Ọbọn̄. (Psalm 83:18; Matthew 6:9) N̄kpọ efen edi ke ama edinen̄ede an̄wan̄a mi se inamde Abasi okûnam ufen emi mme owo ẹbọde etre idahaemi. Ke otu kpukpru se n̄kekpepde oro, idụhe ndomokiet emi eketiede nte n̄ke! Ama enem mi tutu.

 Ndifreke nte eketiede mi ke idem akpa usen emi ndụkde mbono esop Mme Ntiense Jehovah. Kpukpru owo ẹkenam n̄kpọ ye ami ufan ufan ẹnyụn̄ ẹyom ndidiọn̄ọ enyịn̄ mi. Ke akpa mbono esop emi n̄kodụkde, akpan ibuotikọ emi ẹkekwọrọde akaban̄a mme akam emi Abasi esikopde. Mma nnen̄ede n̄kpan̄ utọn̄ sia ofụri emi n̄kosụk mbọn̄ akam ndọhọ Abasi an̄wam mi. Ekem mma ndụk Editi n̄kpa Jesus. Se ikakpade mi idem ke mboho Mme Ntiense Jehovah mbiba oro ekedi ke ẹma ẹsasiak itie Bible, idem nditọwọn̄ ẹyekụbọde. Nsonso oro ekesidi ẹma ẹsiak itie Bible, n̄kesidiọn̄ọke ebiet emi odude. Edi Mme Ntiense Jehovah ẹma ẹkpep mi.

 Nte n̄kodụkde mbono esop Mme Ntiense Jehovah n̄ka, ntre ke n̄kenen̄ede mma nte mmọ ẹsikpepde Ikọ Abasi. Mma ndikụt ke Mme Ntiense Jehovah ẹsikpep ata Ikọ Abasi. Inyeneke mbono esop emi n̄kodụkde ntre ndikpep n̄kpọ. Ini ekededi emi n̄kade mbono esop nnyọn̄, ekesinenem mi ke idem. Ekem owo ama edidọhọ mi ke ikpama ndikpep Bible ye ami.

 Se n̄kokụtde ke otu Mme Ntiense Jehovah ama enen̄ede okpụhọde ye se n̄kokụtde ke ufọkabasi nnyịn. Mma n̄kụt ke Mme Ntiense Jehovah ẹdiana kiet, ke mmọ ẹdi mbon akpanikọ emi ẹdomode ofụri ukeme mmọ ndinam se inemde Abasi esịt. Mma nnen̄ede nnịm ke mmọ ẹma idemmọ, ke mmọ ẹdi ata mme Christian, sia Bible ọkọdọhọ ke ima ke ẹdida ẹdiọn̄ọ ata mme Christian.—John 13:35.

 Nte n̄kesịnde idem n̄kpep Bible n̄ka, ntre ke n̄kenen̄ede n̄kpụhọde man ndu uwem nte Bible ọdọhọde. Edi eketie mi nte ke ndikemeke nditre ndin̄wana karet tutu amama. Ama esinem mi ndikpep karet nnyụn̄ n̄n̄wana karet ke mbuba. Ekedi ntịn̄ nte eketiede mi ke idem nnọ owo emi ekesikpepde Bible ye ami, enye ama ọdọhọ mi ete, “Kam sịn idem kpep Bible, mmọdiọn̄ọ ke eyebiere nnennen n̄kpọ.” Enye eketịn̄ ikọ oro ke usụn̄ emi owụtde ke enye ekere aban̄a mi. Utọ ikọ ndọn̄esịt oro ke n̄koyom ndikop. Nte n̄kesịnde idem n̄kpep Bible n̄ka, ntre ke ekenen̄ede ọdọn̄ mi ndinam se inemde Jehovah Abasi esịt.

 Ini n̄keduede ntịgha owo emi nsidade n̄kpep karet ibuo, nte n̄ketịn̄de ke ntọn̄ọ ntọn̄ọ mbụk emi, ke n̄kebiere nditre karet. N̄kpọ oro ama anam mi nnen̄ede ntie n̄kere m̀mê mmosụk n̄keme ndika iso n̄n̄wana karet mfiak ndọhọ ke ndi owo emem, ke nnyụn̄ ndi mbet Christ. Mma n̄kpekpep ke Isaiah 2:3, 4 ke Abasi ama ọdọhọ ke mbon emi ẹdinamde se imọ itịn̄de ‘idikpepke aba ekọn̄.’ Jesus ama onyụn̄ ekpep mme mbet esie ete yak mmọ ẹkûsunam n̄kpọ afai afai, ọkpọkọm mme owo ẹnam n̄kpọ ye mmọ ke usụn̄ emi mîfọnke. (Matthew 26:52) Ke ntak oro mma mbiere nditre karet, kpa ye emi n̄kamade karet nte nso.

 Ke mma n̄ketre karet, mma nnam item Bible emi ọdọhọde: “Nọ idemfo ukpep ye uduak edinyene uten̄e Abasi.” (1 Timothy 4:7) Mma mmen ofụri ini ye ukeme emi n̄kesisịnde ke karet n̄kabade nsịn nda nnam se idin̄wamde mi nnen̄ede n̄kpere Jehovah, nnyụn̄ nnam n̄kpọ nnọ enye. Eyenan̄wan emi n̄kamade ikamaha nte n̄kanamde mme n̄kpọ emi n̄kekpepde ke Bible, ke ntre ima idian̄ade. Mma nna baptism ke January 24, 1987 n̄kabade ndi Ntiense Jehovah. Ibịghike ke mma n̄kana baptism, mma ntọn̄ọ ndida ofụri ini mi n̄kwọrọ ikọ nnyụn̄ n̄kpep mbon en̄wen Bible. Ke nsụk nnanam oro tutu emi. Ama akam enyene ini emi n̄kakade n̄kodu ke ibuot itieutom Mme Ntiense Jehovah ke New York, ke U.S.A. nnam n̄kpọ Abasi.

 Idahaemi nnen̄erede ndiọn̄ọ Abasi mi, mmokụt se n̄koyomde. Itiehe mi aba nte enyene se mmennyeneke. Utu ke oro, mmọdiọn̄ọ se ndade uwem mi nnam, mmenen̄ede nnịm ke ini iso ọyọfọn, mmonyụn̄ nnen̄ede n̄kop idatesịt. Nsụk nsesịn̄ede idem, edi idịghe enye oro edi akpan n̄kpọ ọnọ mi aba ke uwem. Ndinam n̄kpọ nnọ Jehovah Abasi edidi akpan n̄kpọ ọnọ mi idahaemi.

 Ini n̄kesin̄wanade karet, ekesidi n̄kpodu ke itie emi mme owo ẹdude, n̄kesitiehe mfre idem enyịn. N̄kesisụk n̄kere se n̄kpanamde edieke owo edide en̄wan ye ami. Mfịn, n̄kpodu ke ebiet emi mme owo ẹdude, nsisụk ntiehe mfre idem enyịn, edi isidịghe man ndiọn̄ọ nte n̄kpan̄wamde idemmi edieke owo emende en̄wan edi. Nsinam ntre man ndiọn̄ọ nte n̄kpasan̄ade n̄n̄wam mbon emi ẹdude ẹkpere mi ẹdiọn̄ọ Abasi. Bible an̄wam mi ndi owo emi atatde ubọk ọnọ mme owo n̄kpọ, onyụn̄ an̄wam mi ndi eti ebe, nnyụn̄ nnam uwem enem Brenda ediye an̄wan mi.

 Ke ini edem, ofụri ekikere mi ekesịne ke karet. Edi idahaemi, mmenyene ata eti n̄kpọ emi ndade uwem mi nnam. Se Bible etịn̄de ke 1 Timothy 4:8 enen̄ede owụt ufọn edinam n̄kpọ Abasi. Itie oro ọdọhọ: “Edisịn̄ede idem enyene esisịt ufọn; edi uten̄e Abasi enyene ufọn ke kpukpru n̄kpọ, koro enye akamade un̄wọn̄ọ uwem idahaemi ye eke uwem oro edidide.”