YALA i tagara ka ye Sangir Besar guun dennin kan Ɛndonezi jamana na wa? N’i tagara yen a saan damanin ye nin ye, n’a sɔrɔ i ye an balimamuso saba dɔw ye kɔgɔji daa la. U lɔnnin lo kosɔbɛ o guun kan u ka waajuli baara kosɔn: U be mɔgɔw dɛmɛ ka Bibulu faamu. Nka u be baara wɛrɛ lo kɛra kɔgɔji daa la.

A fɔlɔ, u be don jii kɔnɔ ka kabakurubaw yaala ani k’u ta ka na n’u ye kɔgɔji daa la. O kabakuru dɔw bonya be balɔn bɔ. O kɔ, u be sigi sigilan dennin kan ani ka marito kɛ k’o kabakuruw ci ci k’u kɛ kabakuru misɛnw ye minw bonya ma se sisɛfan ma. Kɔfɛ, u be o kabakuru misɛnw don mananson dɔw kɔnɔ ani u be yɛlɛ ɛsikaliye dɔ kan ka taga n’u ye u ka soo. O kɔ, u b’o bɛrɛw don bɔrɔbabaw kɔnɔ ani kamiyɔnw b’u ta ka taga sira dilanyɔrɔw la.

O balimamusow dɔ tɔgɔ ko Hulda. Ale ka koow cogoya kosɔn, a tun be se ka wagati caaman kɛ o baara la ka tɛmɛ fila tɔɔw kan. A tun b’o baara kɛ walisa ka wari sɔrɔ k’a ka denbaya ka loon o loon makoɲɛfɛnw san. Sisan, a tun be ni laɲinita wɛrɛ ye tugun. A tun b’a fɛ ka tablɛti san walisa ka JW Library^® sɔrɔ. A tun b’a lɔn ko videwow ani fɛɛn wɛrɛ minw be o aplikasɔn kɔnɔ, o bena a dɛmɛ k’a ka cidenya baara fisaya ani ka Bibulu faamu koɲuman.

Kalo kelen ni tilan kɔnɔ, loon o loon sɔgɔma, a ye baara kɛ lɛri fila kɔnɔ. A ye kabakuru caaman ci ci ani a sera ka kamiyɔn dennin dɔ fa. A laban, a ye tablɛti wari sɔrɔ.

Hulda ko: “N’ tun sɛgɛnnin lo kosɔbɛ ani n’ fari yɔrɔ bɛɛ tun be n’ dimi o kabakuruci kosɔn. Nka n’ sinna ka ɲinɛ o sɛgɛn n’o dimi bɛɛ kɔ, tuma min na n’ y’a daminɛ ka baara kɛ n’o tablɛti kura ye. A be n’ dɛmɛ ka n’ ka waajuli kɛcogo fisaya ani ka kafo ka lajɛnw labɛn cogo nɔgɔman na.” A y’a fɔ fana ko o tablɛti y’a dɛmɛ COVID-19 fɔɲɔbana daminɛ tuma na sabu o wagati la, kafo ka lajɛnw ani waajuli baara tun be kɛ vidéoconférence sababu fɛ. An dusu ka di k’a ye ko Hulda y’a ka laɲinita dafa.