“Jehova Seerew tun tɛ mɔgɔw dɔrɔn lo minɛ ni ɲumanya ye, u tun be n’ ka wuluw fana minɛ ni ɲumanya ye. Loon dɔ, Elaine tun lɔnin be waajulikɛ wotoro gɛrɛfɛ ani a ye bisiki di n’ ka wulu fila ma. Kabi o tuma, n’an tun be tɛmɛna waajulikɛ wotoro gɛrɛfɛ, n’ ka wuluw tun b’a fɛ ka gwɛrɛ Jehova Seerew la walisa ka bisiki sɔrɔ.

“Kalow tɛmɛtɔ, n’ ka wuluw tora k’u ka bisiki diyabɔ ani a tun ka di ne fana ye ka baro denninw kɛ ni Jehova Seerew ye. Nka, n’ tun t’a fɛ ka baro kɛ n’u ye caaman. N’ tun be ni saan 70 ni kɔ ye ani n’ tun tɛ Jehova Seerew ka lannakow lɔn ka ɲɛ. Kerecɛn diinan caaman tun ye n’ jigi tigɛ minkɛ, n’ y’a miiri ko a ka fisa n’ ka Bibulu sɛgɛsɛgɛ n’ yɛrɛ ma.

“O wagati la, n’ tun be to ka Jehova Seere wɛrɛw lɔnin ye u ka waajulikɛ wotorow gɛrɛfɛ, yɔrɔ caaman na dugu kɔnɔ. Olu fana tun be mɔgɔw minɛ teriya la. U tun be basigi Bibulu kan tuma bɛɛ ka n’ ka ɲiningaliw jaabi. O y’a to n’ lara u la ka tɛmɛ fɔlɔ kan.

“Loon dɔ, Elaine ye n’ ɲininga ko: ‘I lanin b’a la ko bɛgɛnw ye Ala ka nilifɛn ye wa?’ N’ y’a jaabi ko: ‘Ɔnhɔn, n’ lanin b’o la!’ O kɔ, Elaine ye Ezayi 11:6-9 kalan n’ ye. Kabi o wagati, n’ tun b’a fɛ ka dɔ lɔn Bibulu koo la. Nka, n’ bele tun t’a fɛ ka Jehova Seerew ka sɛbɛw kalan.

“Loon minw tugura o kɔ, n’ ye baro surunw kɛ ni Elaine n’a cɛɛ Brent ye. O barow ye n’ nafa yɛrɛ le! U y’a fɔ n’ ye ko ni n’ b’a fɛ k’a faamu a kɔrɔ ye min ye ka kɛ kerecɛn sɔbɛ ye, ko n’ ka Matiyo ka kitabu kalan fɔɔ ka taga se kɛwalew ka kitabu ma. N’ y’o lo kɛ. Dɔɔni o kɔ, n’ sɔnna Brent ni Elaine ka bibulukalan kɛ ni n’ ye. O kɛra saan 2016 cɛmancɛ la.

“Lɔgɔkun o lɔgɔkun, n’ tun kɔrɔtɔnin lo n’ ka bibulukalan ani lajɛnw wagati ka se. N’ ninsɔn tun ka di kosɔbɛ k’a lɔn Bibulu be min fɔ tigitigi. Saan kelen tɛmɛnin kɔ dɔrɔn, n’ batizera ka kɛ Jehova Seere ye. Sisan n’ be ni saan 79 ye ani n’ b’a lɔn ko n’ be tiɲɛn sira lo kan. Jehova ye n’ duga a kɛtɔ ka n’ dɛmɛ n’ kɛra a ka denbayamɔgɔ dɔ ye, o min be duniɲa kuru bɛɛ kɔnɔ.”