Denbaya kura juu be sigi furu sababu lo la. I furunin kɔ, hali n’i bena to k’i bangebagaw kanu ani k’u bonya, mɔgɔ si koo man kan ka gwɛlɛya i ma dugukolo kan ka se i furuɲɔgɔn ma. N’a sɔrɔ i wolobagaw n’i balima dɔw tɛna sɔn o ma joona. Nka Bibulu ka ladiliw be se k’i dɛmɛ ka koow kɛ k’a dama kɛɲɛ. O la, hɛɛrɛ bena to e n’i wolobagaw n’i balimaw cɛ ani i bena se k’i jija k’i ka denbaya kura sabati.

BIBULU BE MIN FƆ: “I faa n’i baa bonya.” (Efɛzikaw 6:2). I sanda mana kɛ min o min ye, i bele ka kan k’i bangebagaw jati ani k’u bonya. I k’a lɔn ko i furuɲɔgɔn fana ye dɔ ka deen lo ye. Ale fana ka kan k’a janto a bangebagaw la. “Kanuya be mɔgɔ min dusu la . . . keliya t’a dusu la.” O kama, kana a miiri abada ko i furuɲɔgɔn be jɛnɲɔgɔnya min kɛra n’a somɔgɔw ye, o bena i ka furu bila farati la.— 1 Korɛntikaw 13:4; Galatikaw 5:26.

I BE SE KA MIN KƐ:

• Kana koow dama tɛmɛ ka kuma sifa dɔw fɔ, i n’a fɔ: “I somɔgɔw be ne dɔgɔya tuma bɛɛ” wala “Ne be min kɛ, o man di i bamuso ye fewu”

• A ɲini ka i yɛrɛ bila i furuɲɔgɔn nɔɔ na

BIBULU BE MIN FƆ: “Cɛɛ ben’a faa n’a baa to yen ka nɔrɔ a muso la, u fila be jɛn ka kɛ kelen ye.” (Zɛnɛzi 2:24). N’i furula, i bangebagaw be se k’a miiri ko olu lo ka kan k’i ka koow ɲɛnabɔ halibi. O kama, u be se k’a ɲini k’u daa don i ka denbayakow la kojugu.

E n’i furuɲɔgɔn lo ka kan k’a latigɛ ɲɔgɔn fɛ aw bena sɔn min na ani aw tɛna sɔn min na. O kɔ, a’ y’o fɔ aw bangebagaw ye. A’ y’o kɛ ni kanuya ye. A’ ye aw kɔnɔ gwɛ ka tiɲɛn fɔ u ye, nka a’ y’o kɛ nɛmɛnɛmɛ na (Talenw 15:1). Majigilenya, dususuman ni muɲuli bena aw dɛmɛ ka jɛnɲɔgɔnya ɲuman kɛ n’aw somɔgɔw ye ani ka to ka “ɲɔgɔn ka kow muɲu ni kanuya ye.”—Efɛzikaw 4:2, ABM.

I BE SE KA MIN KƐ:

• N’i somɔgɔw b’u daa don kojugu i ka denbayakow la, ani o koo b’i kɔnɔ gwan, i ka baro kɛ n’i furuɲɔgɔn ye o koo la tuma min na aw fila bɛɛ dusu sumanin lo

• A’ ye bɛn a la aw bena o koow ɲɛnabɔ cogo min na