Jita we̱nge̱ ba si mala pe̱ o mandabo ma bebasi ońolana ba si makusa bediedi to̱ belo̱ko̱medi. Ońola nje so̱ jangame̱ne̱no̱ o jukea o ndongame̱n ya Mboṅ a Yehova e? Nje o matombwane̱no̱ oten e?

Muńe̱nge̱ ma be̱ne̱ mako̱m ma ndolo ma mombweye̱ wa. Kriste̱n a boso i ta i boka ka myemba, i ko̱to̱me̱ o jowe̱ Loba, jokwa Bibe̱l na o jumwe̱le̱ mō̱ na nune̱. (Bonahebe̱r 10:24, 25) O mu mulatako ma ndolo ba ta mako̱m ma mbale̱, bonasango na bonańango o mudī. (2 Tesalonika 1:3; 3 Yohane 14) Mulemlem m’eyembilan pe̱ nde di mabiano̱ we̱nge̱, ońola nika nde biso̱ pe̱ di be̱nno̱ mulemlem ma muńe̱nge̱.

Muse̱ṅ ma jokwa bia ne̱ni weno̱ ná o we̱le̱ betiledi ba Bibe̱l o ebolo. Kana o ponda Mose, we̱nge̱ pe̱ bome, bito na bana, ba mako̱to̱me̱ mwemba. Balēdi ba bwam ba mabolane̱ Bibe̱l o jongwane̱ biso̱ ná di dangwe bupisane̱ bete̱sedi ba Loba. (Ndimbisedi 31:12; Nehemia 8:8) Biso̱ be̱se̱ di mapuse̱le̱ dipita lasu tongwea na bola malabe̱ na lo̱ngo̱ la myenge m’esese.​—Bonahebe̱r 10:23.

Muse̱ṅ ma jouse̱ dube̱ lo̱ngo̱ la Loba. Ńamuloloma Paulo a tiledi mwemba mō̱ ma pond’ao mo̱ na: ‘ne ńo̱ngi o je̱ne̱ bińo̱, ná mba pe̱ ná kuse jembame̱ ke̱ ne oteten ańu ońola jemea lasu, la mō̱ na nune̱, bińo̱ ońola lam, mba pe̱ ońola lańu.’ (Roma 1:11, 12) O ndongame̱n asu, mulatako masu na bane̱ bonasango mu membe̱ dube̱ lasu ná di tike be̱ kriste̱n ya mbale̱.

Na we̱ne̱ na miso̱ mo̱ngo̱, ya jukea o ndongame̱n asu ni maye̱. O me̱nde̱ kasabe̱ na ndolo. O si be̱n ná o sawe to̱ lambo.

• Ndongame̱n asu i se̱medi nde o njik’eyembilan e?

• Njika muse̱ṅ weno̱ ná o kusa yete̱ná wukedi o ndongame̱n asu e?