Ka nje te̱ wokono̱ o nin kalati nisadi, Bibe̱l e be̱n bete̱sedi jita be me̱nde̱ jongwa­ne̱ wa na ndabo ango̱ ńa mbia. Yehova a mapula ná lo be̱ bonam. A kakane̱ ná lo we̱le̱ te̱ jowe̱ lao oboso, “man me̱se̱ ma me̱nde̱ batabe̱le̱ bińo̱.” (Mateo 6:33) A mapula be̱ diko̱m lo̱ngo̱ na mbale̱. Bolane̱ me̱se̱ mena mongwane̱ wa ná o ńakise̱ mulatako mo̱ngo̱ na Loba. Nika ńe nde eto̱ti ende̱ne̱ e buki be̱se̱ moto eno̱ ná a be̱ne̱.—Mateo 22:37, 38.

NJE BIBE̱L E MAKWALANO̱: “ ‘Na me̱nde̱ be̱ bińo̱ sango, bińo̱ pe̱ lo me̱nde̱ be̱ mba bana ba bome na ba bito,’ e kwali Sango ńangum.” (2 Korinto 6:18) Loba a mapula be̱ diko̱m lo̱ngo̱ la batabata. Mbadi po̱ ńa sisea mo̱ be̱be̱ ńe nde tongwea na muka. Yehova a mapula ná o “kane̱ esibe̱ wo̱lo̱.” (1 Tesalonika 5:17) A be̱n ńo̱ngi ninde̱ne̱ o senga mo̱nge̱le̱ mo̱ngo̱ ma njiba na nje e matakise̱ wa (Filipi 4:6) O kane̱ te̱ na ndabo ango̱ ńa mbia, e me̱nde̱ je̱ne̱ ná Yehova e diko̱m lo̱ngo̱ na mbale̱.

O mbat’a kwalisane̱ Loba, wangame̱ne̱ sengane̱ mo̱. We nde ná o bola nika tongwea na jokwa l’Eyal’ao nikame̱ne̱ pe̱ na kalati i se̱medi o Bibe̱l. (Myenge 1:1, 2) Dutea o nje o mokwano̱. (Myenge 77:12, 13) Sengane̱ la Loba di mabaise̱ pe̱ ná wukeye ponda na ponda te̱ o ndongame̱n ya mwemba.—Myenge 122:1-4.

Bīse̱ la bane̱ nja Yehova eno̱ le nde mbadi nipe̱pe̱ ńa mweńa ni mouse̱ mulatako mo̱ngo̱ na mo̱. Nika o mabe­ngano̱ bola nika, nika pe̱ nde o mabatano̱ sisea Yehova be̱be̱.—Mateo 28:19, 20.

NJE WENO̱ NÁ O BOLA:

• Te̱se̱ ponda buńa te̱ o langa Bibe̱l na o kane̱

• Ndabo a mbia ńe̱se̱ e bole ­jokwa, bolanga ba Bibe̱l na ­dikalo epol’a boso to̱ biana e malonge̱le̱ ńolo

NJE BIBE̱L E MAKWALANO̱: “Sisea be̱be̱ na Loba, nde mo̱ pe̱ a masisea be̱be̱ na bińo̱.” (Yakobo 4:8) Wangame̱ne̱ te̱se̱ buńa na ponda ońola jowe̱ oteten a ndabo a mbia; o bupe̱ pe̱ mo̱. (Bebotedi 18:19) Nde omo̱ń a nika e mapula ná buńa te̱ mbia mu ko̱lo̱ngo̱ne̱ o kwalea ońola mambo ma mudī. Ouse̱ mulatako ma ndabo ango̱ ńa mbia na Loba tongwea na kwalea jombwea mo̱ “ke̱ o jai omboa, ke̱ o madangwa o ngea, ke̱ o mananga wase, to̱ ke̱ o mate̱me̱ mo̱ń.” (Ndimbisedi 6:6, 7) Be̱ne̱ janda o be̱ ka Yosua nu kwali ná: “Nde mba na ndabo am di mabolea nde Yehova.”—Yosua 24:15.

NJE WENO̱ NÁ O BOLA:

• Te̱se̱ mudango ma jokwa bupisane̱ ńo̱ng’a elongi ya ndabo ango̱ ńa mbia te̱